កំពង់ចាម៖ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានដឹកនាំកិច្ចប្រជុំត្រួតពិនិត្យការងារ ស្តីពីការត្រៀមរៀបចំ រក្សាសន្តិសុខ សណ្តាប់ធ្នាប់ បង្កលក្ខណៈងាយស្រួល និងផ្តល់ភាពសប្បាយរីករាយ ជូនប្រជាពលរដ្ឋ ក្នុងឱកាសចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នៅថ្ងៃទី១៤-១៥-១៦ ខែមេសា ឆ្នាំ២០១៩ខាងមុខនេះ។
កិច្ចប្រជុំនេះ បានធ្វើឡើងនាព្រឹកថ្ងៃទី៨ ខែមេសា ឆ្នាំ២០១៩ នៅសាលប្រជុំសាលាខេត្តកំពង់ចាម ដោយមានការអញ្ជើញ ចូលរួមពីឯកឧត្តម អភិបាលរងខេត្ត លោក លោកស្រី មន្ទីរអង្គភាព ពាក់ព័ន្ធ អភិបាល អភិបាលរងក្រុង-ស្រុកទាំង១០ និងថ្នាក់ដឹកនាំកងកម្លាំងប្រដាប់ផងដែរ។
ថ្លែងក្នុងពិធីនោះ ឯកឧត្តម គួច ចំរើន អភិបាលខេត្តកំពង់ចាម បានជំរុញឲ្យអាជ្ញាធរមូលដ្ឋាននីមួយៗ ខិតខំគាស់កកាយអំពីវប្បធម៌ ក្នុងតំបន់រៀងៗខ្លួន មកបង្ហាញដល់សាធារណៈជន បានទស្សនាកំសាន្តសប្បាយៗ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខនេះ។ ព្រោះបើយើងទាំងអស់គ្នា បានអភិរក្ស នូវល្បែងកំសាន្តទាំងអស់នោះ ក្រៅអំពី ផ្ដល់ភាពសប្បាយៗ ដល់ប្រជាពលរដ្ឋទូទៅ វាក៏បានរំលឹកនូវអត្តសញ្ញាណរបស់ដូនតាខ្មែរយើង ដែលបានកប់ និងបន្សល់ទុកតាំងពីអតីតកាល ឲ្យផុសឡើងសារជាថ្មីវិញ ផងដែរ។
ជាមួយគ្នានោះ ឯកឧត្ដមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ ដែលគ្រប់អាយុ តែនៅមិនទាន់បានធ្វើអត្តសញ្ញាណ សញ្ជាតិខ្មែរ គឺសូមមកធ្វើឲ្យបានគ្រប់ៗគ្នា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខនេះ ជាពិសេសបងប្អូនប្រជាពលរដ្ឋ ជាកម្មករ កម្មការិនី និងពលករក្រៅប្រទេស ដែលបានមកលេងកម្សាន្ដ នៅស្រុកកំណើត ព្រោះកម្លាំងនគរបាលយេីង ក្រៅពីការពារសណ្តាប់ធ្នាប់សាធារណៈ ក្នុងពិធីបុណ្យចូលឆ្នាំថ្មី និងចុះធ្វើអត្តសញ្ញាណ ជូនពលរដ្ឋនៅតាមមូលដ្ឋានផងដែរ។ ឯកឧត្ដមអភិបាលខេត្ត ក៏បានស្នើទៅដល់អាជ្ញាធរក្រុង ស្រុកទាំងអស់ បន្តដឹកនាំឃុំ សង្កាត់ នីមួយៗ ជួយផ្សព្វផ្សាយ អំពីទីកន្លែងឈរជើង របស់ក្រុមការងារអត្តសញ្ញាណកម្ម នៃស្នងការនគរបាល ដើម្បី ឲ្យប្រជាពលរដ្ឋ ជាពិសេស បងប្អូនពលករចំណាកស្រុក បានធ្វើអត្តសញ្ញាណប័ណ្ណសញ្ជាតិខ្មែរ ឲ្យបានគ្រប់ៗគ្នា ខណៈដែលពួកគាត់ បានមកកាន់ស្រុកកំណើតផ្ទាល់ នាឱកាសបុណ្យចូលឆ្នាំថ្មីនេះ។
សូមបញ្ជាក់ថា ក្នុងឱកាសបុណ្យចូលឆ្នាំកុរ នាឆ្នាំនេះ អាជ្ញាធរ បានត្រៀមគោលដៅសប្បាយភាព នៅតាមវត្តអារាម និងរម្មណីដ្ឋាននានា ក្នុងក្រុង ស្រុកទាំង ១០ ចំនួន ១៣កន្លែង ក្នុងនោះ ស្រុកកំពង់សៀម មាន ៤កន្លែង គឺ ៖ រម្មណីដ្ឋានប្រវត្តិសាស្ត្រ វត្តនគរបាជ័យ រម្មណីដ្ឋានប្រវត្តិសាស្ត្រភ្នំប្រុស ភ្នំស្រី រម្មណីដ្ឋានប្រវត្តិសាស្ត្រភ្នំហាន់ជ័យ និងរម្មណីដ្ឋានកែច្នៃ ឆ្នេរខ្សាច់កោះប៉ែន ។
