ខេត្តពោធិ៍សាត់៖ នៅវេលាម៉ោង៨ និង១០នាទី ថ្ងៃទី២៤ ខែ ឧសភា ឆ្នាំ២០១៩ នៅលើកំណាត់ផ្លូវថ្នល់ជាតិលេខ៥ ស្ថិតក្នុងភូមិទួលម្កាក់ សង្កាត់រលាប ក្រុង.ខេត្តពោធិ៍សាត់ មន្រ្ដីជំនាញរដ្ឋបាលព្រៃឈើរួមមាន អធិការដ្ឋានខាងត្បូងបឹង ទន្លេ សាប ខណ្ឌ សង្កាត់ នៃមន្ទីរកសិកម្ម រុក្ខាប្រម៉ាញ់ និងនេសាទ ខេត្តពោធិ៍សាត់បង្រ្កាបឃាត់ចាប់រថយន្ត១គ្រឿង ឆែកឆេរឃើញ សត្វពស់ចំនួន ០៥ស្បោង ដាក់ក្នុងកេសបិតស្គត់ជិតចំនួន ០៥កេស មានទម្ងន់ប្រមាណជិត ១០០គីឡូក្រាម។
អ្នកបើកបរ និងជាម្ចាស់រថយន្តម៉ាកសាំយ៉ុង ចង្កូតឆ្វេង ពណ៏ស្លែ ពាក់ស្លាកលេខ បាត់ដំបង 2B 1410 មានប្រពន្ធ និងកូនស្រីតូចម្នាក់ផងនោះប្រាប់ឲ្យដឹងថា កេសក្រដាសចំនួន ០៥កេសបង្កប់សត្វពស់ជាច្រើនក្បាលទាំងនេះ ពួកគាត់សុីឈ្មួល ដឹកឲ្យគេចេញពីចំណុចភូមិ.ឃុំព្រៃស្វាយ ស្រុកមោងឬស្សី ខេត្តបាត់ដំបង ហើយពួកគាត់ថាអត់ដឹងថាសត្វពស់នោះទេ ។
សមត្ថកិច្ចបានឲ្យដឹងថា រថយន្តខាងលើម៉ាក សាំយ៉ុង ដឹកអ្នកដំណើរមានកេសក្រដាសបង្កប់សត្វពស់ បាននាំចូលខណ្ឌរដ្ឋបាលព្រៃឈើខេត្តពោធិ៍សាត់រួមទាំងអ្នកបើកបរ និងជាម្ចាស់រថយន្តដើម្បីចាត់ការបន្ត ។ជាក់ស្ដែងគេបកស្គត់ដែលបិត លើកេសក្រដាស ជិតម្ដងមួយៗ ក្នុង ០១កេសឃើញសត្វពស់ចំនួន ០១ស្បោង សរុបទាំងចំនួន ០៥កេស ស្មើនឹងចំនួន ០៥ស្បោង ដោយក្នុង០១ស្បោងៗ ស្មើនឹងទម្ងន់ប្រមាណចំនួន ៧៨គីឡូក្រាម។
