ខេត្តក្រចេះ៖ បើទោះបីលោក វែង សាខុន រដ្ឋមន្រ្តីក្រសួងកសិកម្មរុក្ខប្រម៉ាញ់និងនេសាទ ដាក់បទបញ្ជាឲ្យ លោក ប៊ួយ រតនា នាយខណ្ទរដ្ឋបាលព្រៃឈើក្រចេះ និងលោកប្រធានមន្ទីរកសិកម្ម ចងមុង រួមគ្នាបង្រ្កាបបទល្មើស ការដឹកជញ្ជូនឈើដោយខុសច្បាប់ក៏ដោយ ក៏បទបញ្ជានេះ មិនបានធ្វើឲ្យលោក តែ រី នាយសង្កាត់រដ្ឋបាលព្រៃឈើរលួស មានការខ្លាចញញើតនោះឡើយ ធ្វើឲ្យមានការសង្ស័យថាការដឹកជញ្ជូនឈើដោយខុសច្បាប់ ចេញពីស្រុកកោះញ៉ែកនេះ គឺមានការពេញចិត្តពេញថ្លើម ពីលោក វ៉ា ថន អភិបាលខេត្តក្រចេះ។
តាមប្រភពព័ត៌មានបានបញ្ជាក់ថា បទល្មើសព្រៃឈើ បានបង្កើនល្បឿនយ៉ាងកំហុក ក្នុងការដឹកជញ្ជូនឈើដោយខុសច្បាប់ ចេញពីស្រុកកោះញ៉ែក តាមរយះរថយន្តសាំយ៉ុង និងរថយន្តតូចធំ បន្តកន្ទុយគ្នា ដូចគេហែកៈឋិន ឆ្លងកាត់មុខស្នាក់ការរដ្ឋបាលព្រៃឈើសង្កាត់រលួស តែពុំត្រូវបានបង្រ្កាបពីសមត្ថកិច្ចជំនាញ ដែលស្ថិតក្នុងដែនសមត្ថកិច្ចមេព្រៃ ក្រោមការគ្រប់គ្រងរបស់លោក តែ រី ដែលជានាយសង្កាត់ តែផ្ទុយទៅវិញ គេសង្កេតឃើញថា លោក តែ រី ដែលជានាយសង្កេត់រដ្ឋបាលព្រៃឈើ បានយកតួនាទីជាមេព្រៃទៅសម្របសម្រួលជាមួយនឹងឈ្មួញដឹកឈើប្រកបដោយរលូនទៅវិញ ។
សេចក្តីរាយការណ៍ ពីសំណាក់អ្នកឃ្លាំមើលមន្រ្តីអនុវត្តច្បាប់ បានបញ្ជាក់ឲ្យដឹងថា ការដឹកជញ្ជូនឈើដោយ ខុសច្បាប់នេះ ហាក់បីដូចជាគ្មានការចាប់អារម្មណ៍ ទើសចិត្តចង្អៀតទ្រូង ពីសំណាក់លោក វ៉ា ថន អភិបាលខេត្តក្រចេះនោះឡើយ ដែលបច្ចុប្បន្នលោក ស្ថិតក្នុងឋានៈជាប្រធានគណបញ្ជាការឯកភាពរដ្ឋបាលខេត្តក្រចេះ តែបែរជាមានភាពកំសុយក្នុងការដាក់បទបញ្ជារឲ្យ សមត្ថកិច្ចពាក់ព័ន្ឋ បង្រ្កាបបទល្មើសព្រៃឈើ ដែលកំពុងតែសំរុកដឹក ជញ្ជូនយ៉ាងកក្រើកមេឃ រញ្ជួយដីនេះឆ្លងកាត់ស្នាក់ការមន្ត្រីជំនាញរដ្ឋបាលព្រៃឈើរលួស យកចែកចាយនៅចំណុចស្រែស្បូវ ឃុំក្បាលដំរី ស្រុកសំបូរ ខេត្តក្រចេះ ដើម្បីសាងដាក់រថយន្តសាំយ៉ុងកែច្នៃ ជាច្រើនគ្រឿងយកទៅលក់នៅតាមដេប៉ូនានានៅខេត្តត្បូងឃ្មុំ ខេត្តព្រៃវែង និងខេត្តកំពង់ចាមជាដើម។
សេចក្តីរាយការណ៍បាន បញ្ជាក់ថា សកម្មភាពនៃកាដឹកជញ្ជូនឈើ នៅតាមដងផ្លូវជាតិលេខ៧និងលេខ៧៣ គឺមានរថយន្តរបស់មន្ត្រីជំនាញរដ្ឋបាលព្រៃឈើ បញ្ឈនៅតាមស្នាក់ការនីមួយៗ សំកុកចាំរថយន្តដឹកឈើ ដើម្បីប្រមូលលាភស្ការៈ តែមិនបានទប់ស្កាត់បង្រ្កាបនោះទេ គឺបានប្រព្រឹត្តអំពើពុករលួយជាប្រព័ន្ឋ ធ្វើឲ្យមានការ រិះគន់និងសង្ស័យថា ប្រហែលជាលោក ទ្រី សុភ័ក្រ ប្រធានមន្ទីរកសិកម្មខេត្តក្រចេះ ដាក់បទបញ្ជាឲ្យធ្វើសកម្មភាពព្យុះភ្លៀងទេដឹង ទើបបានជាសមត្ថកិច្ចសង្កាត់រដ្ឋបាលព្រៃឈើ រលួសមានការ ព្រងើយកន្តើយនិងតួនាទីភារកិច្ច ក្នុងការអនុវត្តផ្ទុយពីច្បាប់ ក្នុងនាមជាមន្រ្តីអភិរក្សព្រៃឈើ តែបែជាយកតួនាទី និងភារកិច្ចមកបំរើឲ្យក្រុមឈ្មួញ ដែលជាឧក្រិដ្ឋជនព្រៃឈើទៅវិញ ។
ប្រជាពលរដ្ឋ បានសំណូមពរ ឲ្យសម្តេចអគ្គមហាសេនាបតីតេជោ ហ៊ុន សែន នាយករដកឋមន្រ្តី នៃព្រះរាជា ណាចក្រកម្ពុជា ជួយថែរក្សានូវធនធានធម្មជាតិព្រៃឈើផង និងបានសំណូមពរ លោក វែង សាខុន រដ្ឋមន្រ្តី ក្រសួងកសិកម្ម រុក្ខប្រម៉ាញ់មេត្តាជួយ ក្រលែកមើលលោក ទ្រី សុភ័ក្រ ប្រធានមន្ទីរកសិកម្មរុក្ខាប្រម៉ាញ់ និង នេសាទខេត្តក្រចេះ និងលោក ប៊ួយ រតនា នាយខណ្ទរដ្ឋបាលព្រៃឈើខេត្តក្រចេះ លោក តែ រី ជានាយសង្កាត់ព្រៃឈើរលួស ខណៈពេលដែលមានការសង្ស័យថា កំពុងតែបើកភ្លើងខៀវឲ្យឈ្មួញដឹកឈើយ៉ាងរលូន ដោយគ្មានការទប់ស្កាត់។ដោយ ខេមរា ដេលី
