ហាណូយ ៖ ឧទ្ធម្ភាគចក្រយោធារបស់វៀតណាម បានធ្លាក់នៅភាគខាងលិចនៃក្រុងហាណូយ កាលពីព្រឹកថ្ងៃចន្ទ ទី៧ ខែកក្កដា ឆ្នាំ ២០១៤ នេះ បណ្តាលឲ្យអ្នកស្លាប់បានកើនឡើងដល់១៦នាក់ ចំណែក៥នាក់ទៀតរងរបួស ។ នេះបើតាមទីភ្នាក់ងារ ដែលវេបសាយបរទេសចិនឆាយណាដេលីផ្សាយនៅថ្ងៃចន្ទនេះ។ ហេតុការណ៍ធ្លាក់នេះ បានកើតឡើង កាលពីវេលា ម៉ោងប្រហែល ៧ និង៤៥នាទីព្រឹក ម៉ោងក្នុងតំបន់ ថ្ងៃចន្ទ ស្ថិតនៅមូលដ្ឋានយោធាក្នុងសង្កាត់ ថាច់ថាត ខណៈឧទ្ធម្ភាគចក្រកំពុងធ្វើលំហាក់ហ្វឹកហ្វឺន ដោយទើបបានហោះចាកចេញពីភូមិតូចមួយ១៥នាទី មានចម្ងាយជាង២៤ម៉ាយ ស្មើនឹង៤០គីឡូម៉ែត្រ ភាគខាងលិចក្រុងហាណូយ ប្រទេសវៀតណាម។
បើតាមសាក្សី ដែលឃើញហេតុការណ៍ផ្ទាល់ភ្នែក បាននិយាយថា ឃើញមនុស្ស ០៣នាក់ បានលោតចេញពីឧទ្ធម្ភាគចក្រ ក្រោយពេលវាផ្ទុះ ដោយឃើញភ្លើងឆេះពេញខ្លួនប្រាណផងដែរ ។ បើតាមសាក្សី បន្តថា នៅពេលប៉ូលីសទៅដល់កន្លែងកើតហេតុ គេបានទាញសាកសពពី៧ទៅ៨នាក់ ចេញពីឧទ្ធម្ភាគចក្រដែលធ្លាក់ខ្ទេចខ្ទីនោះ ។
ដោយឡែកមូលហេតុដែលនាំឲ្យធ្លាក់អាជ្ញាធរវៀតណាមកំពុងបើកការស៊ើបអង្កេតពីករណីនេះ។ ឧទ្ធម្ភាគចក្រមួយគ្រឿងនោះជាប្រភេទMi-171 ធ្វើនៅប្រទេស រុស្ស៊ី (The Russian-made MI-171 helicopter) និងជារបស់កងកម្លាំងទ័ពអាកាសវៀណាម ។ វៀតណាមតែងតែទិញយន្តហោះបែបនេះពីរុស្ស៊ី ប្រមាណជា២០ឆ្នាំហើយ។
គ្រោះថ្នាក់កាលពីថ្ងៃចន្ទនេះត្រូវបានគេរាយការណ៍ថាជាគ្រោះថ្នាក់ធ្លាក់យន្តហោះយោធា លើកទី៣ហើយ ចាប់តាំងពីឆ្នាំ២០០៧មក។ នៅខែវិច្ឆិកា ឆ្នាំ២០០៧ យន្តហោះផលិតនៅរុស្ស៊ី ធុនមិច២១ (a Russian-made MiG-21 jet) របស់ទ័ពអាកាសវៀតណាមបានធ្លាក់នៅខេត្ត Binh Thuan កណ្តាលប្រទេស តែអាកាសយានិក២នាក់ បានលោតឆត្រយោង ហើយបាននៅរស់រានមានជីវិត និងត្រូវបានសង្គ្រោះ។ នៅឆ្នាំ២០០៨ បុគ្គលិកយោធា៥នាក់ត្រូវបានស្លាប់់ដោយសារយន្តហោះដឹកជញ្ជូនស្បៀង Antonov An-26 light turboprop transport បានធ្លាក់នៅស្រុក Thanh Tri. ប្រទេសវៀតណាម អំឡុងពេលហ្វឹកហាត់ ដឹកជញ្ជូនស្បៀងនាទីជនបទ នាក្រុងហាណូយ៕
