តាកែវ៖ អភិបាលរងខេត្តតាកែវ លោក មូល វិចិត្រ បានជម្រុញ និងក្រ្រើនរំលឹកទៅដល់ក្រុមប្រឹក្សស្រុកអង្គរបូរី ដែលទើបនឹងប្រកាសចូលកាន់តំណែងអាណត្តិទី៣ និងរដ្ឋបាលសាលាស្រុក ត្រូវតែរួបរួមគ្នា ធ្វើយ៉ាងណាដោះស្រាយបញ្ហាប្រឈមនានាក្នុងមូលដ្ឋានឲ្យបានល្អ និងចាត់ទុកសំណូមពររបស់ប្រជាពលរដ្ឋជាអាទិភាព ។
ថ្លែងនៅចំពោះមុខសមាជិក សមាជិកា ក្រុមប្រឹក្សាស្រុកអង្គរបូរី នៅក្នុងពិធីប្រកាសចូលកាន់តំណែងក្រុមប្រឹក្សាស្រុកអង្គរបូរី អាណត្តិទី៣ នាព្រឹកថ្ងៃពុធ ទី១៩ ខែមិថុនា ឆ្នាំ២០១៩ ដែលរៀបចំធ្វើឡើងនៅសាលប្រជុំសាលាស្រុក លោក មូល វិចិត្រ អភិបាលរងខេត្តតាកែវ មានប្រសាសន៍ថា បញ្ហាប្រឈម ក៏ដូចជាការសំណូមពររបស់បងប្អូនប្រជាពលរដ្ឋ ក្នុងនាមយើងជាមន្រ្តីរាជការដែលជាអ្នក បម្រើពួកគាត់ ត្រូវតែដោះស្រាយឲ្យបានភ្លាមៗ ដើម្បីឆ្លើយតបទៅនឹងសេចក្តីត្រូវការរបស់ពលរដ្ឋ ដែលមានបំណងឲ្យយើងដែលជាមន្រ្តីជួយដល់គាត់ឲ្យបានឆាប់ តាមដែលអាចធ្វើបាន ។
លោក មូល វិចិត្រ អភិបាលរងខេត្តតាកែវ បន្ថែមទៀតថា ការដោះស្រាយបញ្ហា និងការសំណូមពររបស់ពលរដ្ឋឲ្យបានឆាប់រហ័សនេះ វានឹងធ្វើឲ្យពួកគាត់មានជំនឿជឿជាក់មកលើការដឹកនាំ របស់រាជរដ្ឋាភិបាលកម្ពុជា តាមរយៈសកម្មភាពការងាររបស់មន្រ្តីមូលដ្ឋាន ជាពិសេសពលរដ្ឋនឹងមានភាពកក់ក្តៅយ៉ាងខ្លាំង ព្រោះតែយើងដែលជាមន្រ្តីរាជការ បានបំពេញកាតព្វកិច្ចយ៉ាងល្អ ក្នុងការបម្រើសេវាសាធារណៈជូនពួកគាត់ដោយអស់ពីចិត្តនិងចេញពីបេះដូងពិតៗ ។
បើតាម លោក មូល វិចិត្រ ក្រៅតែពីការរួបរួមគ្នាដោះស្រាយបញ្ហាប្រឈមនានានៅក្នុមូលដ្ឋាន និងយកសំណូរពរប្រជាពលរដ្ឋជាអាទិភាពនោះ លោកក៏បានផ្តាំផ្ញើទៅដល់ក្រុមប្រឹក្សក្សាស្រុកនិងរដ្ឋបាលសាលាស្រុកអង្គរបូរី ត្រូវមានសាមគ្គីផ្ទៃក្នុងឲ្យបានល្អរឹងមាំ ដោយមិនត្រូវមានចិត្តគុំគួន ឬច្រណែនដាក់គ្នាទៅវិញទៅមកនោះឡើយ ដោយឈរលើគោលការណ៍ឯកភាពរដ្ឋបាលតែមួយ ពិសេសពិសេសធ្វើយ៉ាងណាឲ្យស្រុកអង្គរបូរី មានភាពរីកចម្រើន និងអភិវឌ្ឍន៍កាន់តែខ្លាំងឡើង ដើម្បីជាឧត្តមប្រយោជន៍សម្រាប់ប្រជាជន ៕
