កំពង់ចាម: យ៉ាងហោចណាស់មានមនុស្សប្រុស-ស្រីចំនួន៣នាក់ បានរងរបួសធ្ងន់ នៅក្នុងចំណោមប្រជាពលរដ្ឋ ជាច្រើនអ្នកផ្សេងទៀតបានគេចផុត ខណៈពេលស្ទូចផ្ទះរំកិលប្តូរទីតាំង សង្ស័យខុសបច្ចេកទេស រលំដួលបាក់សង្កត់លើ។ ហេតុការណ៍នេះបានកេីតឡើងកាលពីវេលាម៉ោង ៩.២០នាទីព្រឹកថ្ងៃទី២២ ខែមិថុនា ឆ្នាំ២០១៩ ស្ថិតនៅក្នុងភូមិវត្ត ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម។
សមត្ថកិច្ចមូលដ្ឋានឲ្យដឹងថា នៅមុនពេលកេីតហេតុ លោក ទូច អ៊ន់ និងប្រពន្ធឆេង ឈឿន ដែលជាម្ចាស់ផ្ទះរលំបាក់ រស់នៅភូមិឃុំកើតហេតុខាងលើ បានហៅក្រុមជាង១ក្រុម និងពឹងពាក់បងប្អូនប្រជាពលរដ្ឋក្នុងភូមិជាច្រើននាក់ផ្សេងទៀត ឲ្យមកជួយស្ទួចផ្ទះ ដើម្បីរំកិលប្តូរទីតាំងផ្លាស់ទៅរកកន្លែងថ្មី។ ប៉ុន្តែជាអកុសលស្រាប់តែស្រុតរលំដួលក្នុងពេលរំកិល សង្ស័យខុសបច្ចេកទេស សង្កត់មកលើប្រជាពលរដ្ឋបីអ្នកបណ្តាលឲ្យរងរបួសធ្ងន់។
ដោយជនរងគ្រោះទី១មានឈ្មោះ មិន ឆុន ភេទប្រុស អាយុ៥៤ឆ្នាំ ទី២-ឈ្មោះ ឆុន ឈុយ ភេទប្រុស អាយុ៣២ឆ្នាំ និងទី៣-ឈ្មោះ គង់ ស្រូយ ភេទស្រី អាយុ៥៥ឆ្នាំ។ សមត្ថកិច្ចបានបន្តឲ្យដឹងដែរថា ផ្ទះដែលរលំបាក់សង្កត់មនុស្សឲ្យរងរបួសខាងលើនេះ ជាប្រភេទផ្ទះឈើ មានទំហំ៦x១១ម៉ែត្រ ជញ្ជាំងក្តារ ដំបូលប្រកក្បឿង។ ហើយនៅក្នុងករណីនេះ ក៏បណ្តាលឲ្យម៉ូតូចំនួន២គ្រឿងរងការខូចខាតផងដែរ។
បច្ចុប្បន្នជនរងគ្រោះទាំង៣នាក់ ត្រូវបានក្រុមគ្រួសារ រួមនិងអាជ្ញាធរ បញ្ជូនទៅសង្គ្រោះបន្ទាន់នៅមន្ទីរពេទ្យខេត្តកំពង់ចាមភ្លាមភ្លាមផងដែរ៕
