នៅប្រទេសវៀតណាម កងទ័ពបានប្រកាសឲ្យដឹងពីគ្រោះថ្នាក់ធ្លាក់ឧទ្ធម្ភាគចក្រមួយគ្រឿង ក្នុងថ្ងៃចន្ទ ទី៧ កក្កដានេះដោយបណ្តាលឲ្យមានមនុស្សស្លាប់ចំនួន ១៦នាក់ និងរបួស ៥នាក់ផ្សេងទៀត។ ឧប្បត្តិហេតុនោះបានកើតមានឡើងនៅក្នុងតំបន់គ្មានមនុស្សរស់នៅស្ថិត ប៉ែកខាងលិចទីក្រុងហាណូយ ខណៈពេលដែលកងទ័ពកំពុងធ្វើសមយុទ្ធលោតឆ័ត្រយោង។
យោងតាមប្រភពយោធាឲ្យដឹងថា ឧទ្ធម្ភាគចក្រដែលធ្លាក់នោះមានប្រភេទ MI-១៧១ សល់ពីសម័យសហភាពសូវៀត និងកំពុងដឹកទាហានចំនួន ២១នាក់នៅពេលមានគ្រោះថ្នាក់។ ឧត្តមសេនីយវ៉ូ វ៉ាន់ទាន់បានបញ្ជាក់ថា គ្រោះថ្នាក់ធ្លាក់ឧទ្ធម្ភាគចក្រនោះមិនបានបង្កឲ្យមានស្លាប់ ជនស៊ីវិលណាម្នាក់ទេ ព្រោះវាបានធ្លាក់ទៅលើតំបន់មួយដែលមិនសូវមានមនុស្សរស់នៅច្រើន ស្ថិតចម្ងាយប្រមាណជា ៣០គីឡូម៉ែត្រប៉ែកខាងលិចទីក្រុងហាណូយ។
គេនៅមិនទាន់បានដឹងពីមូលហេតុច្បាស់លាស់ជុំវិញគ្រោះថ្នាក់ធ្លាក់ ឧទ្ធម្ភាគចក្រនោះនៅឡើយទេ តែបើយោងតាមរូបឧត្តមសេនីយវ៉ូ វ៉ាន់ទាន់ដដែល គ្រោះថ្នាក់បានកើតចេញពីបញ្ហាបច្ចេកទេស គឺមិនមែនមកពីធាតុអាកាសមិនល្អ ឬមួយក៏មកពីវិច្ឆេទកម្មណាមួយទេ។ បើផ្អែកតាមសាក្សីមួយចំនួននៅក្បែរកន្លែងកើតហេតុឲ្យដឹងថា ឧទ្ធម្ភាគចក្រនោះហោះក្នុងកំពស់ទាប រួចក៏ប៉ះដីផ្ទុះតែម្តង និងថា អ្នកបើកឧទ្ធម្ភាគចក្របានព្យាយាមបើកបញ្ចៀសទីផ្សារ និងផ្ទះសម្បែងរបស់ប្រជាជនដែលរស់នៅម្តុំនោះ។
តាមរូបសាក្សីដដែល ដំបូងគេឮសូរសម្រែកសុំជំនួយ ក្រោយមកក៏ឮសម្លេងផ្ទុះមួយទៀតដែលបង្កប់ដោយផ្សែងខ្មៅងងឹត។ នៅក្រោយការផ្ទុះភ្លាម ប្រជាជនក៏បាននាំគ្នាចូលរួមជួយពន្លត់ភ្លើង និងទាញមនុស្សចេញពីឧទ្ធម្ភាគចក្រនោះ។ តុល្យការបណ្តោះអាសន្នចុងក្រោយ មានស្លាប់ ១៦នាក់ និងរបួស ៥នាក់នៅក្នុងចំណោមមនុស្សសរុបទាំង ២១នាក់ដែលជិះនៅក្នុងឧទ្ធម្ភាគចក្រនោះ។ ពេញមួយថ្ងៃចន្ទនេះ ផ្លូវធ្វើដំណើរទៅកាន់កន្លែងធ្លាក់ឧទ្ធម្ភាគចក្រ និងតំបន់ជុំវិញត្រូវបានបិទមួយរយៈ។ សូមរម្លឹកជូនថា កាលពីឆ្នាំ ២០០៨ ក៏ធ្លាប់មានគ្រោះថ្នាក់ធ្លាក់យន្តហោះមួយគ្រឿងផលិតក្នុងប្រទេស រុស្ស៊ីដែរនៅតំបន់ក្បែរទីក្រុងហាណូយក្នុងពេលធ្វើសមយុទ្ធដូចគ្នា នេះ ដោយបានបណ្តាលឲ្យស្លាប់អ្នកបើកយន្តហោះចំនួន ៥នាក់៕
