ខេត្តព្រៃវែង៖ ស្ត្រីម្នាក់រស់នៅខេត្តព្រៃវែង បានធ្វើរោងបុណ្យរង់ចាំទទួលសពកូន ក្រោយពីទទួលដំណឹងថាកូនបានជាប់នៅអគារបាក់រលំនៅខេត្តព្រះសីហនុនោះ រយៈពេលបីថ្ងៃមកហើយ កូនរបស់គាត់ឈ្មោះថា កាក់ គា ជាកម្មករសំណង់នៅអគារដួលរលំខាងលើ។ 
ក្រោយពីទទួលបានព័ត៌មានថាកូនក៏ជាប់នៅអគារនោះ រយៈពេលពីរ បីថ្ងៃហើយ នៅតែមិនទទួលដំនឹងស្លាប់ឬរស់ រូបគាត់ក៏បានធ្វើរោងបុណ្យរង់ចាំទទួលសពកូន ដោយក្តីរំពឹងថាកូនប្រុសថានៅមានជីវិត គឺគ្មាននៅសេសសល់ក្នុងខ្លួនឡើយ។
ជាសំណាងល្អ ទឹកដោះម្តាយថ្លៃ កូនរបស់គាត់ទើបទទួលដំណឹងកាលពីល្ងាចមិញ ថានៅមានជីវិត ស្ថិតក្នុងចំណោមកម្មករសំណង់ពីរនាក់ ដែលនៅរស់រានពីមានជីវិតពីគ្រោះថ្នាក់រលំ ធ្វើឲ្យគាត់រំភើបរកពាក្យអ្វីមកថ្លាថ្លែងពុំបាន រហូតដល់ស្រក់ទឹកភ្នែកអួលដើមកនិយាយលែងចេញ ក៏នាំគ្នារុះរោងបុណ្យនោះចោលវិញ។
សូមបញ្ជាក់ថា ប្រតិបត្តិការរុករកជនរងគ្រោះ ក្នុងករណីរលំបាក់អគារកម្ពស់៧ជាន់ នៅខេត្តព្រះសីហនុ បានបិទបញ្ចប់ហើយ នៅវេលាម៉ោង៧៖៣០នាទីយប់ ថ្ងៃទី២៤ ខែមិថុនា ឆ្នាំ២០១៩ បន្ទាប់ពីបើកប្រតិបត្តិការរុករក និងសង្រ្គោះអស់រយៈពេល២ថ្ងៃកន្លះ។ ករណីរលំបាក់អគារកម្ពស់៧ជា នៅខេត្តព្រះសីហនុ បានកើតឡើង កាលពីទាបភ្លឺថ្ងៃទី២២ ខែមិថុនា ឆ្នាំ២០១៩។ រហូតដល់ពេលនេះ ចំនួនអ្នកស្លាប់ ដែលត្រូវបានកាយឃើញបានកើនដល់២៨នាក់ និងអ្នករបួស២៦នាក់ ក្នុងករណីរលំបាក់អគារខាងលើនេះ៕
