បន្ទាយមានជ័យ ៖ ឯកឧត្តម នាយឧត្តមសេនីយ៍ ជួន សុវណ្ណ បានថ្លែងថា ៖ គ្រឿងញៀន គឺជាបញ្ហាសង្គមដ៏ស្មុគស្មាញមួយ សម្រាប់សង្គមមនុស្សជាតិទាំងមូល ។ ស្ថានភាព នៃការផលិត ការចរាចរ និងការប្រេីបំពានគ្រឿងញៀន វិវត្តន៍ស្របតាមចរន្ត នៃភាពរីកចម្រេីនបច្ចេកវិទ្យា វិទ្យាសាស្រ្ត សង្គម និងសេដ្ឋកិច្ច ដែលនិន្នាការបែបនេះ គឺជាបញ្ហាប្រឈមដ៏លំបាកមួយសម្រាប់ការអនុវត្តច្បាប់ចំពោះបណ្តាប្រទេសនានា ។ 
…ការថ្លែងបែបនេះក្នុងឱកាសដែលឯកឧត្តម នាយឧត្តមសេនីយ៍ ជួន សុវណ្ណ អនុប្រធានអាជ្ញាធរជាតិគ្រឿងញៀន តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន អញ្ជេីញជាអធិបតីភាពក្នុង ទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ឆ្នាំ២០១៩ក្រោមប្រធានបទ “សុខភាព ដេីម្បីយុត្តិធម៌ យុត្តិធម៌ ដេីម្បីសុខភាព “ ដែលប្រារព្ធធ្វេីនៅបរិវេណ សួនមានជ័យ ក្រុងសិរីសោភ័ណ ដែលមានការអញ្ជេីញពចូលរួម ប្រធានក្រុមប្រឹក្សាខេត្ត គណៈអភិបាលខេត្ត លោក លោកស្រី ប្រជាពលរដ្ឋ សិស្សានុសិស្ស ចូលរួមជាង៣០០០នាក់ នាព្រឹកថ្ងៃទី២៧ ខែមិថុនា ឆ្នាំ២០១៩ ។
…ឯកឧត្តម នាយឧត្តមសេនីយ៍ បានលេីកឡេីងថា ៖ ជាមួយនឹងការអនុវត្តយុទ្ធនាការប្រយុទ្ធប្រឆាំងគ្រឿងញៀន ដែលយេីងបានអនុវត្ត គឺទទួលបានការបង្ក្រាបបានជាបន្តបន្ទាប់ ក្នុងនោះក៏មានមន្ត្រីយុត្តិមួយចំនួន ដែលមានបុណ្យសក្តិធំ គឺជាអ្នកនៅពីក្រោយខ្នង សម្រួលដល់ការការចរាចរណ៍ និងជួញដូរគ្រឿងញៀន កាងបទល្មេីសដេីម្បីទទួលបានផលប្រយោជន៍ពីជនទុច្ចរិតដែលប្រព្រឹត្តបទល្មេីស ។ 
ហេីយបេីសិនជារកឃេីញថា មន្ត្រីយុត្តិធម៌ណាដែលជាអ្នកកាងនៅពីក្រោយខ្នងក្នុងបទល្មេីសផ្សេងៗ ពិសេសគ្រឿងញៀន និងជាប់ពាក់ព័ន្ធសារធាតុញៀន មិនត្រូវបានលេីកលែងទោសឡេីយ គឺអនុវត្តទៅតាមច្បាប់យ៉ាម៉ឹងមាត ។ នាយឧត្តមសេនីយ៍បន្តថា ៖ មន្ត្រីយុត្តិធម៌ដែលនៅពីក្រោយខ្នងនៃការជួញដូរ ចរាចរណ៍គ្រឿងញៀន ពេលចាប់បានជនល្មេីសគ្រឿងញៀន តែងតែតែធ្វេីការកែប្រែវត្ថុតាង និងកែប្រែរបាយការណ៍ ដេីម្បីឲ្យជនល្មេីសបានសម្រាលទោសជាដេីម ដេីម្បីបានផលប្រយោជន៍ពីជនល្មេីស ។
…ជាមួយគ្នានោះឯកឧត្តម នាយឧត្តមសេនីយ៍ ជួន សុវណ្ណ ក៏ណែនាំដល់សមត្ថកិច្ចពាក់ព័ន្ធដែលឈរជេីងតាមបន្ទាត់ព្រំដែន ត្រូវរៀបចំបង្កេីតគណៈកម្មាការ ត្រួតពិនិត្យដេីម្បីទប់ស្កាត់ឲ្យបាននូវការចរាចរណ៍គ្រឿងញៀន ដែលហូរចូលមកពីបណ្តាប្រទេសជិតខាង ពិសេសយេីងត្រូវបង្កេីនកិច្ចសហការគ្នាជាមួយបណ្តារប្រទេសជិតខាង ដេីម្បីរួមគ្នាលុបបំបាត់ការចរាចរណ៍ និងប្រេីប្រាស់គ្រឿងញៀនឲ្យអស់ពីប្រទេសកម្ពុជាយេីង ៕
