កំពង់ធំ: ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានប្រគល់អដ្ឋិធាតុកងទ័ព ស្ម័គ្រចិត្តវៀតណាម ដែលបានពលីជីវិតក្នុងសម័យសង្រ្គាម ក្នុងទឹកដីខេត្តកំពង់ធំ ក្នុងបុព្វហេតុជួយវាយរំដោះប្រជាពលរដ្ឋ ខ្មែរ ចេញពីបនក្បត់ប្រល័យពូជសាសន៍ប៉ុលពត និងត្រូវបានកងកម្លាំង ជីករុករកអដ្ឋិធាតុ k70 និងK72 ជីករុករកឃើញ និងបានបញ្ជូនអដិ្ឋធាតុចំនួន ៣៣ មាតុភូមិនិវត្តន៍ប្រទេសកំណើតវិញ នៅព្រឹកថ្ងៃទី ២៨ ខែមិថុនា ឆ្នាំ ២០១៩។
ពិធីប្រគល់អដ្ឋិធាតុកងទ័ពស្ម័គ្រចិត្តវៀតណាម ត្រូវបានប្រារព្វឡើង នៅក្នុងបរិវេណបញ្ជាការដ្ឋានតំបន់ប្រតិបត្តិការសឹករង កំពង់ធំ និងមានការអញ្ជើញជាអធិបតីភាព ឯកឧត្ដម សុខ ហៃ អភិបាលរងខេត្តកំពង់ធំ និងជាប្រធានគណកម្មាធិការជីករុករកអដិ្ឋធាតុ ឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹងកំពង់ធំ និងលោកវរសេនីយ៍ឯក ង្វៀន ថាញ់ប៊ិញ អនុប្រធានគណបញ្ជាការយោធាខេត្តប៊ិញភឿក រួមទាំងមេបញ្ជាការរង នាយទាហាន លោកតា លោកយា សិស្សានុសិស្ស ចូលរួមជាង៥០០នាក់ ។
លោកវរសេនីយ៍ឯក ង្វៀន ថាញ់ប៊ិញ បានថ្លែងអំណរគុណដល់ អាជ្ញាធរខេត្តកំពង់ធំ និងប្រជាពលរដ្ឋ ជាពិសេស មេបញ្ជាការតំបន់ប្រតិបត្តិការសឹងកំពង់ធំ ដែលបានជួយសហការ សម្រួលដល់ការជីករុករកអដ្ឋិធាតុ កងទ័ពស្ម័គ្រចិត្តវៀតណាម ដែលបានពលី នៅក្នុងភូមិសាស្រ្តនានាក្នុងខេត្តកំពង់ធំ ធ្វើឲ្យកងកម្លាំងជីករុករកអដ្ឋិធាតុ k70 និងK72 អាចសម្រេចបានដោយជោគជ័យ និងបាននាំយកអដ្ឋិធាតុ ត្រឡប់ទៅប្រទេសកំណើត ដើម្បីប្រគល់ជូនសាច់ញាតិបងប្អូន ទទួលយកទៅ ធ្វើបុណ្យតាមប្រពៃណី។
ឯកឧត្តម ឧត្តមសេនីយ៍ទោ សោម ស៊ុន មានប្រសាសន៍ ក្នុងរយះពេលចន្លោះឆ្នាំ ២០១៨-២០១៩ កម្លាំងបញ្ជាការដ្ឋានតំបន់ប្រតិបត្តិការសឹករងកំពង់ធំ បានសហការជាមួយក្រុមបច្ចេកទេសជីករុករកអដ្ឋិធាតុកងទ័ពស្ម័គ្រចិត្តវៀតណាម កម្លាំង k70 និងK72 ជីកបានចំនួន៣៣អដ្ឋិធាតុបន្ថែមទៀត និងបានធ្វើមាតុភូមិនិវត្តន៍ទៅកាន់ប្រទេសកំណើតវិញ និងសូមបញ្ជាក់ងដដែរថា ចាប់តាំងពីឆ្នាំ ២០០៣ រហូតដល់ឆ្នាំ២០១៩ កម្លាំងក្រុមបច្ចេកទេសជីករុករកអដ្ឋិធាតុកងទ័ពស្ម័គ្រចិត្តវៀតណាមបានរកឃើញអដ្ឋិធាតុក្នុងភូមិសាស្រ្តខេត្តកំពង់ធំ ចំនួន១,១០៧ មកហើយ ។
ឯកឧត្តម សុក ហៃ អភិបាលរងខេត្តកំពង់ធំ បានមានប្រសាសន៍ កោតសរសើរចំពោះ កិច្ចសហការល្អ និងការទំនាក់ទំនងល្អ រវាង មេបញ្ជាការតំបន់ប្រតិបត្តិការសឹងកំពង់ធំ និងកម្លាំង k70 និងK72 ជីករុករកអដ្ឋិធាតុកងទ័ពស្ម័គ្រចិត្តវៀតណាម ដែលជាការខិតខំប្រឹងប្រែង ទាំងរដូវប្រាំង និងរដូវវស្សា និងអាចរកអដ្ឋិថាតុបានជាង១ពាន់អដ្ឋិធាតុ ក្នុងនោះឯកឧត្តម សុក ហៃ បានថ្លែងអំណរគុណដល់កងទ័ពស្ម័គ្រចិត្តវៀតណាម ដែលពុំអាចបំភ្លេចបាននូវគុណដ៏ធំធេងមកលើបងប្អូនប្រជាជនខ្មែរ រួមទាំងបានលះបង់អាយុជីវិតជួយវាយរំដោះប្រជាជនខ្មែរ ក្នុងនាមអាជ្ញាធរខេត្តក៏ដូចជារាជរដ្ឋាភិបាលកម្ពុជា និងគាំទ្រ ក្នុងការជីករុកអដិ្ឋធាតុបន្ថែមទៀត ដែលជាការតបស្នងសងគុណដល់កងទ័ពប្រជាជនវៀតណាម ដែលបានធ្វើឲ្យប្រទេសកម្ពុជាមានសុខសន្តិភាពក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណា ចក្រកម្ពុជា នាំសុខសន្តិភាពពេញលេញរហូតមកដល់សព្វថ្ងៃនេះ។
ដោយ ប៊ុន រដ្ឋា
