ភ្នំពេញ ៖ជនសង្ស័យ២នាក់ ក្នុងចំណោមបក្សពួក៣នាក់ ត្រូវបានកម្លាំងនគរបាលប៉ុស្ដិ៍រដ្ឋបាល បឹកកក់២ នៃអធិការដ្ឋាននគរបាលខណ្ឌទួលគោក ធ្វើការឃាត់ខ្លួន កាលពីវេលាម៉ោង១ និង២០នាទីរំលងអាធ្រាត ឈានចូលថ្ងៃទី១ ខែកក្កដា ឆ្នាំ២០១៩ នៅក្បែរផ្លូវរថភ្លើង តាមបណ្ដោយផ្លូវ៦០៨ ស្ថិតក្នុងសង្កាត់បឹងកក់២ ខណ្ឌទួលគោល ដែលពាក់ព័ន្ធនិងករណីបន្លំលួចយករថយន្ត ។
សមត្ថកិច្ចបានឲ្យដឹងថា ជនសង្ស័យទាំង២នាក់ដែលត្រូវឃាត់ខ្លួន រួមមាន ទី១ ឈ្មោះ សឹុម សារិត ភេទប្រុស អាយុ៤5ឆ្នាំ និងមានមុខរបរសន្ត្តិសុខ ស្រុកកំណើត នៅភូមិសំរោងធំ ឃុំបន្ទាយដែក ស្រុកគៀនស្វាយ ខេត្តកណ្ដាល ។
និងទី២ មានឈ្មោះ ណារិត ហៅងិន ភេទប្រុស អាយុ៣៩ឆ្នាំ មានមុខរបបរើសអេតចាយ ស្នាក់នៅភូមិឬស្សី សង្កាត់ស្ទឹងមានជ័យ២ ខណ្ឌមានជ័យ ។
សមត្ថកិច្ចមូលដ្ឋានឲ្យដឹងទៀតថា នៅពេលកើតហេតុ ជនរងគ្រោះបានបើករថយន្តម៉ាក Toyota Prus ពណ៌ក្រហម ពាក់ស្លាកលេខ ភ្នំពេញ 2T .6522 យកមកចតនៅការាស់សាំង សូគីមិុច តាមបណ្ដោយផ្លូវនរក កែវផ្លូវលេខ២២៥ ក្នុងខណ្ឌ៧មករា ។
គ្រានោះដែរ ជនរងគ្រោះក៏បានឲ្យសោររថយន្តទៅជនសង្ស័យជាសន្ត្តិសុខខាងលើដើម្បីរៀបចំ ។
ខណះពេលនោះ ជនសង្ស័យក៏បានឆ្លៀតលួចយករថយន្តរបស់ជនរងគ្រោះ ព្រមទាំងដោះប្រព័ន្ធGPSចេញពីរថយន្តដើម្បីបំបាត់ការសង្ស័យ ។
ដោយឃើញបាត់រថយន្តទៅយូរពេក ម្ចាស់រថយន្តក៏បានឆែករក ព្រមទាំងរាយការណ៍ប្រាប់សមត្ថកិច្ចមូលដ្ឋានឲ្យជួយអន្តរាគមន៍ផងដែរ ។
ក្រោយមក ជនសង្ស័យ២នាក់ ត្រូវបានកម្លាំងនគរបាលខណ្ឌទួលគោក ធ្វើការឃាត់ខ្លួន និងសាកសួរ រង់ចាំដោះស្រាយតាមនីតិវិធីបន្ត រីឯបក្សពួកម្នាក់ទៀតរត់គេចខ្លួនបាត់ ៕
