ហ្គាហ្សាៈ ប៉ុន្មានថ្ងៃនេះ តាំងពីរាត្រីថ្ងៃចន្ទ រហូតដល់ថ្ងៃពុធនេះ កងទ័ពអ៊ីស្រាអែល បានបើកធ្វើប្រតិបត្តិការយោធាវាយប្រហារយោធាដោយទ្រង់ទ្រាយធំមួយប្រឆាំងពួកហាម៉ាស់នៅជ្រោយហ្គាហ្សា ដែលធ្វើឲ្យជ្រោយមួយនេះ ពោរពេញដោយគ្រាប់ធ្លាក់ ផ្សែងខ្មៅខ្មួលខ្មាញ់កប់អាកាស និងបំផ្លាញអគារជាច្រើន។ នេះបើតាមវេបសាយបរទេសដេលីមែល កាលពីថ្ងៃពុធនេះ។
បើតាមអ្នកនាំពាក្យម្នាក់របស់កងទ័ពអ៊ីស្រាអែលអះ អាងថា ប្រតិបត្តិការនេះមានទិសដៅបញ្ចប់ការគំរាមកំហែងរាល់ថ្ងៃលើ អ៊ីស្រាអែល ដោយសារបាញ់ផ្លោងគ្រាប់រ៉ុក្កែតជាបន្តបន្ទាប់ចេញពីតំបន់ជ្រោយហ្គាហ្សាស្ទ្រីប ។ សូមរំឮកថា តាំងពីល្ងាចថ្ងៃទី៧ កក្កដា គ្រាប់រ៉ុក្កែតជាច្រើនសិបគ្រាប់ត្រូវបានបាញ់ចេញពីហ្គាហ្សា សំដៅទៅភាគខាងត្បូងអ៊ីស្រាអែល ក្នុងនោះមានគ្រាប់រ៉ុក្កែត៤គ្រាប់ត្រូវកម្ទេចពេលកំពុងហោះដោយប្រព័ន្ធការពារប្រឆាំងមីស៊ីល។
ប្រភពដែលយោងតាមកងទ័ពអ៊ីស្រាអែលថា ចាប់ពីយប់ថ្ងៃទី៦ កក្កដាមក គ្រាប់រ៉ុក្កែតយ៉ាងតិច៥គ្រាប់បានធ្លាក់នៅភាគខាងត្បូងអ៊ីស្រា អែល ។ ទាហានម្នាក់ត្រូវរបួសស្រាល ហើយផ្ទះ២ខ្នងរងការខូចខាត ។ ក្រោយ ការបាញ់គ្រាប់រ៉ុក្កែតទាំងនោះ កងទ័ពអាកាសអុីស្រាអែលបានចេញធ្វើការវាយប្រហារជាង៣០លើកលើភាគ ខាងត្បូងជ្រោយហ្គាហ្សា ។
ការវាយប្រហារតាមអាកាសថ្មីៗធ្វើនាយប់ថ្ងៃទី៧ មកទី៨ កក្កដា គ្រាប់រ៉ុក្កែត និងគ្រាប់កាំភ្លើងត្បាល់ជាង២៤០គ្រាប់ត្រូវបានបាញ់ចេញពីជ្រោយហ្គាហ្សាចាប់តាំងពីក្មេងជំទង់អ៊ីស្រាអែល៣នាក់ត្រូវចាប់ពង្រត់ ហើយសម្លាប់ ។ នៅក្នុងការប្រយុទ្ធគ្នានោះ ក្រុមហាម៉ាស់ប្រកាសថា សមាជិករបស់គេ៧នាក់បានត្រូវស្លាប់ ប៉ាឡេស្ទីនអះអាងថា ស្លាប់១២នាក់ ខណៈកងទ័ពអ៊ីស្រាអែលប្រកាសកេណ្ឌប្រមូលទាហានបម្រុង១.៥០០នាក់សម្រាប់ការបើកធ្វើប្រតិបត្តិការយោធានៅជ្រោយហ្គាហ្សាដំបូង។ ប៉ុន្តែបើតាមខុទ្ទកាល័យអ៊ីស្រាអែលកាលពីថ្ងៃអង្គារ ថាពួកគេត្រូវប្រមូលកងទ័ពជាង៤០០០០នាក់ សម្រាបប្រតិបត្តិការយោធាទ្រង់ទ្រាយធំនេះ ៕
