កំពង់ចាម: បន្ទាប់ពីទទួលបានសេចក្តីទុកចិត្ត ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម អ៊ុន ចាន់ដា ក្នុងនាមជាអភិបាលខេត្តថ្មី នៃខេត្តកំពង់ចាម ក្នុងថ្ងៃដំបូង នាព្រឹកថ្ងៃទី០៣ ខែកក្កដា ឆ្នាំ២០១៩នេះ បានដឹកនាំមន្ត្រីជំនាញពាក់ព័ន្ធ ចុះពិនិត្យស្ថានភាពខ្វះខាតទឹកធ្វើស្រែរបស់ប្រជាកសិករ ក្នុង
ភូមិកុមារ ភូមិដូនតោ និងភូមិសណ្ដែក ស្ថិតក្នុងឃុំសំពងជ័យ ស្រុកជេីងព្រៃ ខេត្តកំពង់ចាម ព្រមទាំងបានដាក់ម៉ាស៊ីនបូមទឹកជួយសង្គ្រោះស្រូវប្រជាកសិករ ១២៥ ហិកតា ក្នុងចំណោម ៥២០ ហិកតា ស្រូវដែលនៅសេសសល់នឹងត្រូវជួយសង្គ្រោះបន្តទៀត ទោះបីជាតំបន់នោះមានភ្លៀងធ្លាក់តិចឬច្រើនក៏ដោយ ។
ឯកឧត្តម អ៊ុន ចាន់ដា អភិបាលខេត្តកំពង់ចាម ដែលទើបចូលកាន់តំណែងបានប្រាប់ក្រុមអ្នកសារព័ត៌មាន បានឲ្យដឹងថា ដោយសារតែមួយរយះពេលកន្លងមក នៅតំបន់ខាងលើនេះ ជួបបញ្ហាគ្រោះរាំងស្ងួត ដែលបានធ្វើឲ្យស្រែរបស់ប្រជាពលរដ្ឋ ចំនួន៣ភូមិគឺប្រឈមទៅនឹងការខ្វះខាតទឹកប្រើប្រាស់។ ដោយមើលឃើញការជួបលំបាកនេះ និងមានការសម្របសម្រួលពីអជ្ញាធរឃុំគឺបានខិតខំដាក់ម៉ាស៊ីនដើម្បីធ្វើការបូមទឹក។ 
ជាមួយគ្នានេះរដ្ឋបាលខេត្តកំពង់ចាម ក៏បានប្រើប្រាស់ម៉ាស៊ីនបូមទឹកបន្ថែមទៀតរបស់មន្ទីរធនធានទឹក ដើម្បីបូមទឹកចូលប្រឡាយនានា ដើម្បីអាចឲ្យប្រជាពលរដ្ឋ អាចបូបបន្តចូលទៅក្នុងស្រែរបស់គាត់បាន ។
ឯកឧត្តមអភិបាលខេត្ត បានបញ្ជាក់ទៀតថា ក្នុងការចុះជួយសង្គ្រោះនេះគឺបានជួយសង្គ្រោះស្រែរបស់ប្រជាពលរដ្ឋបានចំនួន១២៥ហិកតា ក្នុងចំណោមស្រែរបស់ប្រជាពលរដ្ឋរងផលប៉ះពាល់ចំនួនជាង៥០០ហិកតា ហើយជាការរំពឹងទុក ប្រសិនបើមានភ្លៀងធ្លាក់បន្តទៀតដូចពេលនេះ គឺអាចជួយសង្គ្រោះស្រែជាងត៥០០ហិកតាឲ្យរួចផុតពីការខូចខាតជាមិនខាន ។ 
គួរបញ្ជាក់ផងដែរថា បើយោងតាមរបាយការណ៍ពីមន្ទីរធនធានទឹក និងឧត្តុនិយមខេត្តកំពង់ចាម បានបញ្ជាក់នៅថ្ងៃនេះថាសម្រាប់ខេត្តកំពង់ចាម គឺមានភ្លៀងធ្លាក់ទូទាំងស្រុក-ក្រុងទាំង១០ក្នុងខេត្តកំពង់ចាម ដោយឡែកចំពោះស្ថានភាពកំពស់ទឹកទន្លេមេគង្គវិញ គឺនៅថ្ងៃនេះទឹកមានកម្ពស់៤.០៦ម៉ែត្របើធៀបនឹងថ្ងៃម្សិលមិញទឹកឡើង០.១៩ម៉ែត្រ ៕
