កំពង់ចាម: ទោះបីជាផ្ទៃមេឃធ្លាក់ភ្លៀងយ៉ាងណាក៏ដោយ នារសៀលថ្ងៃទី០៣ ខែកក្កដា ឆ្នាំ២០១៩នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ បានអញ្ជើញចុះពិនិត្យស្ថានភាពបាក់ច្រាំងទន្លេក្រោយផ្ទះកំណើតរបស់ សម្តេចនាយករដ្ឋមន្ត្រី ហ៊ុន សែន នៅភូមិពាមក្រៅ ឃុំពាមកោះស្នា និងឃុំព្រះអណ្តូង ស្រុកស្ទឹងត្រង់ ខេត្តកំពង់ចាម ដែលកំពុងទទួលរងការគំរាមកំហែងដោយគ្រោះធម្មជាតិ ។
សូមបញ្ជាក់ថា ការបាក់ច្រាំងទន្លេជាបន្តបន្ទាប់ដែលឯកឧត្ដមអភិបាលខេត្ត បានចុះពិនិត្យនេះរួមមាន ១-ឃុំពាមកោះស្មា ច្រាំងទន្លេបានបាក់ស្រុត នៅភូមិពាមក្រៅ និងភូមិដីដុះ ។
២ ឃុំព្រះអណ្តូង ច្រាំងទន្លេបានបាក់ស្រុត នៅភូមិព្រះអណ្តូងទី១ និងភូមិព្រះអណ្តូងទី២ ។
មន្ត្រីជំនាញ បានអះអាងថា ចំពោះមូលហេតុនៃការបាក់ច្រាំងទន្លេ បណ្តាលឲ្យប៉ះពាល់ដល់លំនៅឋានប្រជាពលរដ្ឋ រហូតត្រូវបង្ខំចិត្តរុះរើផ្ទះនាពេលកន្លងមកនេះ គឺបណ្ដាលមកពីកត្តាធម្មជាតិ ជាក់ស្ដែងនៅតំបន់នេះ បេីទោះជាគ្មានការបូមខ្សាច់ក៏ដោយ ក៏នៅតែមានការបាក់ច្រាំងទន្លេជារៀងរាល់ឆ្នាំដែរ ព្រោះវាអាស្រ័យទៅលើចរន្តខ្សែទឹក បេីខ្សែទឹកហូរខ្លាំងបុកប៉ះចំត្រេីយខាងណាមួយ តំបន់នោះនឹងត្រូវរងការបាក់ស្រុតជា
មិនខាន បេីទោះបីជាដីផ្ទះកំណើតសម្តេចនាយករដ្ឋមន្ត្រី ហ៊ុន សែន យេីងបច្ចុប្បន្ននេះ រងការបាក់ស្រុតជិតដល់ផ្ទះហើយដែរ។
ចំពោះករណីបាក់ច្រាំងទន្លេនេះ ឯកឧត្តមអភិបាលខេត្ត ក៏បានជំរុញដាក់ផែនការឲ្យមន្ទីរធនធានទឹកនិងឧតុនិយម ត្រូវប្រមូលទិន្នន័យឲ្យបានគ្រប់ជ្រុងជ្រោយផងដែរ ដេីម្បីឈានទៅដល់បង្កើតផែនការដោះស្រាយបញ្ហាចំពោះមុខ ព្រោះក្នុង១ឆ្នាំៗ មានប្រជាពលរដ្ឋជាច្រើនគ្រួសារ ត្រូវប្រឈម និងរងគ្រោះដោយការបាក់ច្រាំង ជាបន្តបន្ទាប់ ៕
