សៀមរាបៈ នគរបាលប្រឆាំងការ ជួញដូរមនុស្សនិងការពារអនីតិជនខេត្ត បានចាប់ខ្លួនប្រធានអង្គការ អាន់ដឺព្រីវីលិកកម្ពុជា(Underbrivileged Cambodia) ម្នាក់ភ្លាមៗបន្ទាប់ពីមានការសង្ស័យថា នាំក្មេងប្រុសស្រីឲ្យរួមភេទ ជាមួយជនបរទេស ដែលជាថ្នូរប្រាក់ជំនួយសំរាប់ផ្គត់ផ្កង់ អង្គភាពអង្គការ។ ករណីការចាប់ខ្លួនជនខាងលើ ធ្វើឡើងនៅល្ងាចថ្ងៃទី៧ខែកក្កដាឆ្នាំ២០១៤ នៅស្នងការនគរបាលខេត្ត បន្ទាប់ពី កោះហៅមកសាកសួរ។ ជននេះមានឈ្មោះឡំ វេហា ភេទប្រុសអាយុ៣២ឆ្នាំ ជនជាតិខ្មែរមាន ស្រុកកំណើតនៅជិតស្នាក់ការ របស់ខ្លួនស្ថិតក្នុងភូមិសំបាត ឃុំខ្នារពោរ ស្រុកសូទ្រនិគមខេត្តសៀមរាប។
មុន ចាប់ខ្លួនស្នាក់នៅបន្ទប់ជួលភូមិតាភុល សង្កាត់ស្វាយដង្គុំក្រុងសៀមរាប ជាមួយក្មេងប្រុសស្រី៩នាក់។ នាយការិយាល័យនគរបាលប្រឆាំង ការជួញដូរមនុស្សនិងការពារ អនីតិជនខេត្ត លោកស្រីវរសេនីយ៏ទោ ដួង ថាវរី បានឲ្យដឹងថា ក្រោយមានការសង្ស័យសមត្ថកិច្ចបានតាមអង្កេត និងកោះហៅមកសាកសួរ។ ក្នុង ពេលសាកសួរ ចម្លើយជនរូបនេះជាប់ពាក់ពន្ធ័ និងការនាំក្មេងឲ្យរួមភេទជាមួយជនបរទេស ទើបសុំបញ្ជាព្រះរាជ អាជ្ញាឃាត់ខ្លួនតែម្តង។ ក្រោយពេលឃាត់ខ្លួន សមត្ថកិច្ចបានតាមទៅស្រាវជ្រាវដល់ស្នាក់ការ អង្គការឯស្រុក សូទ្រនិគម និងបន្ទប់ជួលក្នុងភូមិតាភុលក្នុងក្រុងសៀមរាប។
លោកស្រីបន្តថា នៅបន្ទប់ជួលជននេះមានក្មេង ប្រុសស្រី៩នាក់រស់នៅជាមួយជាប្រចាំ ដែលមានអាយុ១៦ដល់១៩ឆ្នាំ។ ក្មេងទាំង៩នាក់ត្រូវជនខាងលើ ចិញ្ចឹមឲ្យ រៀនសូត្រ ក្រោមការសុំជំនួយពីបរទេស តាមរយៈអនឡាញ និងសុំដោយផ្ទាល់មាត់។ តែបើម្ចាស់ជំនួយណាទាម ទារសំណង ប្រធានអង្គការនាំក្មេងទាំងនោះទៅឲ្យរួមភេទជាមួយ ដែលជាថ្នូរប្រាក់ជំនួយ ។ តែក៏មានម្ចាស់ជំនួយ ជាជនបរទេសខ្លះ មិនបានទាមទារសំណងដែរ។
លោកស្រីនាយការិយាល័យឲ្យដឹងទៀតថា ក្នុងចំណោមក្មេងប្រុសស្រីទាំង៩នាក់ ដែលរស់នៅជាមួយ ជាប្រចាំមានក្មេងប្រុសចំនួន៣នាក់ បានត្រូវលោកប្រធានអង្គការ នាំយកទៅឲ្យរួមភេទជាមួយជនបរទេស ជាថ្នូរ នឹងប្រាក់ជំនួយ។ ប៉ុន្តែប្រាក់ជំនួយដែលទទួលបាន ពីតាមរយៈសុំផ្ទាល់ អនឡាញ និងលក់ពេស្យាចារកុមារ ជន ខាងលើមិនបានយកមកផ្គត់ផ្កង់ក្មេងទាំងនោះទេ ដោយម្តាយឪពុកពួកគេ(ក្មេង) ជាអ្នកផ្តល់អង្ករ និងប្រាក់សំរាប់ រៀនសូត្រទៅវិញ។
ដោយឡែកនៅស្នាក់ការអង្គការ ឯស្រុកសូទ្រនិគមប្រធានអង្គការបានប្រមូលក្មេង ៧០ទៅ៨០នាក់ដែល មានអាយុ១៣ឆ្នាំចុះក្រោមឲ្យមករៀនម្តងម្កាល ដោយឲ្យប្អូនស្រីរបស់គេម្នាក់ ជាអ្នកនៅចាំជួយបង្រៀន។ ការធ្វើ របៀបនេះងាយស្រួលក្នុងការស្នើសុំជំនួយពីបរទេស។ តាមពិតអង្គការមួយនេះបើកស្នាក់ការ ពុំមានច្បាប់ទេ ហើយក៏មិនទាន់ដឹងថាមានរយៈ ពេលប៉ុន្មានឆ្នាំមកហើយដែរ ពីព្រោះមិនមានឯកសារ បញ្ជាក់ពីការបើក ស្នាក់ ការ ។ លោកស្រី ដួង ថាវរី បញ្ជាក់ថា បន្ទាប់ពីស្រាវជ្រាវដល់ស្នាក់ការ និងបន្ទប់ស្នាក់នៅ ពេលនេះសមត្ថកិច្ច កំពុងបន្តស្រាវជ្រាវ ជនដែលជាប់ពាក់ពន្ធ័ ការទិញពេស្យាចារ។ ចំណែកជនសង្ស័យ នឹងត្រូវបញ្ជូនទៅតុលាការ នៅថ្ងៃទី៩ខែកក្កដាឆ្នាំ២០១៤ ដើម្បីអនុវត្តជាបន្ត៕ 
