កំពង់ចាម: ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានថ្លែងថា យើងមិនបញ្ចប់ត្រឹមនេះទេ យើងនឹងបន្តកសាងតទៅមុខទៀត ដើម្បីបំពេញតម្រូវការនៃល្បឿនកំណើនប្រជាពលរដ្ឋ 
សមិទ្ធផលថ្ងៃនេះចាត់ទុកជាប្រវត្តិសាស្ត្រនៃការកសាងសមិទ្ធផលសម្រាប់កូនចៅប្រជាពរដ្ឋនៅតំបន់នេះ ដើម្បីសិក្សារៀនសូត្រក្នុងការអភិវឌ្ឍធនធានមនុស្ស ហើយសមិទ្ធផលនេះចេះតែវិវត្តន៍ទៅមុខ និងបន្តរីក ដែលនេះគឺជាមោទនភាពសម្រាប់យើងទាំងអស់គ្នា។ ការថ្លែងយ៉ាងដូច្នេះក្នុងឱកាសដែល ឯកឧត្ដម រួមជាមួយ ឯកឧត្ដម អ៊ុន ចាន់ដា អភិបាលខេត្តកំពង់ចាម បានអញ្ជើញចូលរួមក្នុងពិធីសម្ពោធដាក់ឲ្យប្រើប្រាស់នូវអាគារសិក្សា ១ខ្នង ៥បន្ទប់ នៅសាលាបឋមសិក្សាមេមាំង ស្ថិតនៅឃុំល្វា ស្រុកព្រៃឈរ ខេត្តកំពង់ចាម នាព្រឹកថ្ងៃទី១៤ ខែកក្កដា ឆ្នាំ២០១៩ ។
ថ្លែងក្នុងពិធីនោះដែរ ឯកឧត្តម ហ៊ុន ម៉ាណែត បានលើកឡើងថា ទោះបីសប្បុរជនជាខ្មែរទៅនៅបរទេសក៏ដោយ ក៏បេះដូងនៅតែជាខ្មែរ ហើយជួយគៀងគរសប្បុរសជនកសាងសមិទ្ធផលផ្សេងៗ នៅក្នុងដំណាក់កាលប្រទេសមានសុខសន្តិភាព ធ្វើឲ្យប្រជាពលរដ្ឋខ្មែរទាំងក្នុង និងក្រៅប្រទេសមានលទ្ធភាពចូលរួមកសាងសមិទ្ធផល និងជួយស្រុកកំណើត។
នេះហើយ គឺជាគោលនយោបាយឈ្នះ-ឈ្នះរបស់រាជរដ្ឋាភិបាលធ្វើឲ្យប្រទេសមានសុខសន្តិភាព និងធ្វើឲ្យខ្មែរនៅលើពិភពលោកបានជួយគ្នា រួមគ្នាកសាងសមិទ្ធផលនៅក្នុងស្រុក។ នេះគឺជាមោទនភាពណាស់ដែលខ្មែររួបរួមគ្នា ជួយគ្នា។
ឯកឧត្តម ហ៊ុន ម៉ាណែត បានបន្តថា រាជរដ្ឋាភិបាលបានខិតខំដោះស្រាយណាស់នៅអ្វីដែលជាតម្រូវការប្រជាជនចង់បាន ខិតខំកសាងសមិទ្ធផលនានា និងបង្កឱកាសសប្បុរសជន អង្គការ សមាគមចូលរួមកសាងសមិទ្ធផលផ្សេងៗរួមមានមន្ទីរពេទ្យវត្តអារាម សាលារៀន ដែលអាចជួយដោះស្រាយតម្រូវការប្រជាពលរដ្ឋ និងបង្កលក្ខណៈងាយស្រួលដល់កូនចៅ។ នេះគឺជាគោលគំនិតសំខាន់របស់រាជរដ្ឋាភិបាលក្នុងការយកចិត្តទុកដាក់ចំពោះវិស័យអប់រំ។
ឯកឧត្ដម ហ៊ុន ម៉ាណែត បានបន្តទៀតថា អ្នកដែលដើរតួសំខាន់ក្រៅពីរដ្ឋាភិបាលនៅក្នុងវិស័យអប់រំ គឺលោកគ្រូ អ្នកគ្រូ ដែលជួយកសាងប្រព័ន្ធអប់រំនៅកម្ពុជា។ នេះគឺជាគុណបំណាច់របស់លោកគ្រូ អ្នកគ្រូ មិនត្រឹមតែកសាងធនធានមនុស្ស ជួយឱ្យមនុស្សមានអនាគត មានចំណេះដឹងនោះទេ ប៉ុន្តែបានលើកស្ទួយប្រទេសជាតិយើងតាមរយៈកសាងសមត្ថភាពមន្ត្រីអប់រំរបស់យើង។ យើងក្លាយជាប្រទេសកូនខ្លាសេដ្ឋកិច្ចមួយនៅអាស៊ីដោយសារតែការអភិវឌ្ឍសមត្ថភាពរបស់មន្ត្រីយើង ដោយសារប្រព័ន្ធអប់រំខ្មែរយើង។ ដូច្នេះគុណបំណាច់របស់លោកគ្រូ អ្នកគ្រូគ្រប់ជំនាន់គឺមានគុណខ្លាំងណាស់ក្នុងអាជីពសំខាន់បំផុតដែលធានានិរន្តភាពនៃការរីកចម្រើន។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ដេីម្បីពង្រឹងគុណភាពសិក្សា រាជរដ្ឋាភិបាលបានតំឡើងប្រាក់បៀវត្សជូនគ្រូបង្រៀនជាបន្តបន្ទាប់ ហើយក៏ត្រូវទាមទារឲ្យប្អូនៗ
សិស្សានុសិស្ស ត្រូវខិតខំសិក្សារៀនសូត្រ ក្រេបជញ្ជក់យកចំណេះដឹងផងដែរ ព្រោះការមានចំណេះដឹងយ៉ាងពិតប្រាកដនេះហើយ ទេីបអាចផ្តល់ឱកាសឲ្យប្អូនៗកសាងអនាគតខ្លួនឯងបានយ៉ាងល្អប្រសើរ និងឈានទៅដល់ជួយកសាងសង្គមជាតិយើងឲ្យមានភាពរីកចម្រេីនប្រសើរឡើងទៀតផង ជាមួយគ្នានោះ គ្រូបង្រៀនក៏ត្រូវបង្កើតបរិយាកាសល្អ សម្រាប់ទាក់ទាញ ឲ្យកូនក្មួយចាប់អារម្មណ៍ចង់រៀនសូត្រផងដែរ ។
