កំពង់ចាម: ស្ថិតក្នុងដំណើរអញ្ជើញចុះជួបសំណេះសំណាលជាមួយនឹងមន្ត្រីរាជការនៃស្រុកកោះសូទិន និងស្រុកស្រីសន្ធរ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម រួមនឹងមន្ត្រីពាក់ព័ន្ធ បានចុះពិនិត្យស្ថានភាពសាងសង់ផ្លូវកៅស៊ូ១ខ្សែ និងផ្លូវបេតុង ជាច្រើនគីឡូម៉ែត្រ តភ្ជាប់ពីស្រុក
កោះសូទិន និងស្រុកស្រីសន្ធរ ខេត្តកំពង់ចាម ខណៈដែលប្រជាពលរដ្ឋបានសំដែងនូវទឹកចិត្តត្រែកអរ និងថ្លែងអំណរគុណជាខ្លាំងចំពោះអជ្ញាធរគ្រប់លំដាប់ថ្នាក់ អង្គភាពពាក់ព័ន្ធក៏ដូចសប្បុរសជន ជាពិសេសរាជរដ្ឋាភិបាលកម្ពុជា ដែលបានផ្តល់ជាផ្លូវជាច្រើនគីឡូម៉ែត្រជូនដល់ពួកគាត់ងាយស្រួលក្នុងការធ្វើដំណើរ។
ដោយការស្ថាបនាផ្លូវ ក្រាលកៅស៊ូប្រភេទ DBST ១ខ្សែ ដែលមានមានប្រវែង ៣.២០០ម៉ែត្រ ទទឹង៨ម៉ែត្រ តភ្ជាប់ពីចំណុច ឃុំមហាខ្ញូង និងឃុំព្រែកតានង់ នៃស្រុកកោះសូទិន ឆ្ពោះទៅកាន់ស្រុកស្រីសន្ធរ ដែលសម្រេចលទ្ធផលបានប្រមាណជា៦០% ហើយ 
។ និងផ្លូវបេតុង១ខ្សែ ជាអំណោយដ៏ថ្លៃថ្លា របស់សម្តេចតេជោ ហ៊ុន សែន និងសម្តេចគតិព្រឹទ្ឋ បណ្ឌិត ប៊ុនរ៉ានីហ៊ុនសែន ផ្តល់ជូនប្រជាពលរដ្ឋក្នុងស្រុកស្រីសន្ធរ តាមរយះ ក្រុមហ៊ុន ប៉េងហួត ដែលរហូតមកដល់ពេលនេះគឺ ចាក់បេតុងទាំងសងខាងផ្លូវសម្រេចបាន ប្រវែង ១៣គីឡូម៉ែត្រ និងចាក់មួយចំហៀងបានប្រវែង១៤គីឡូម៉ែត្រ ។
បើទោះបីជាសមិទ្ធផល ដែលកំពុងតែដំណើរការស្ថាបនាក៏ដោយ ក៏បងប្អូនប្រជាពលរដ្ឋ សម្ដែងនូវសេចក្ដីរីរាយជាខ្លាំង ក៏ព្រោះតែ មកដល់ពេលនេះ ពួកគាត់មិននឹកស្មានថា បានទទួលបានផ្លូវកៅស៊ូ និងផ្លូវបេតុងយ៉ាងដូច្នេះឡើយ ។
គួរបញ្ជាក់ថាក្នុងដំណើរចុះពិនិត្យស្ថានភាពផ្លូវខាងលើនេះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានអញ្ជើញចូល
សំណេះសំណាលជាមួយមន្ត្រីរាជការ និងអជ្ញាធរមានសមត្ថកិច្ច ក្នុងស្រុកកោះសូទិន និងស្រុកស្រីសន្ធរ ដោយក្នុងនោះឯកឧត្តមក៏បានផ្តាំផ្ញើរទៅដល់មន្ត្រីរាជការនិងអជ្ញាធរមានសមត្ថកិច្ចទាំងអស់ក្នុងនាមជាអ្នកបម្រើរាស្ត្រពិតប្រាកដ និងជាអ្នកប្រតិបត្តករគឺ ត្រូវខិតខំបម្រើសេវាសាធារណៈ និងសេវារដ្ឋបាលជូនប្រជាពលរដ្ឋឲ្យបានលឿន និងធ្វើឲ្យបាន និងមានប្រសិទ្ធភាព។ ហើយត្រូវដោះស្រាយរាល់បញ្ហា និងក្តីកង្វល់ជូនប្រជាពលរដ្ឋឲ្យបានលឿនបំផុត។ ជាងនេះទៅទៀតឯកឧត្តម អភិបាល
ខេត្ត ក៏បានជម្រុញ និងលើកទឹកចិត្តទៅដល់រដ្ឋបាលស្រុកទាំងពីរខាងលើ ត្រូវយកចិត្តទុកដាក់ចំពោះបញ្ហាការគ្រប់គ្រងមន្ត្រីរាជការ បញ្ហាប្រឈមបាក់ច្រាំងទន្លេ និងបញ្ហាដីធ្លីដោយក្នុងនោះលោកមេភូមិលោកមេឃុំត្រូវពិនិត្យឯកសារឲ្យបានត្រឹមត្រូវមុននឹងស៊ីញ៉េទៅលើឯកសារណាមួយ៕
