កំពង់ចាម: ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំមន្ត្រីជំនាញពាក់ព័ន្ធ នារសៀលថ្ងៃទី២៥ ខែកក្កដា ឆ្នាំ២០១៩នេះ បានអញ្ជើញចុះពិនិត្យដោះស្រាយនូវករណីបណ្តឹងរបស់ប្រជាពលរដ្ឋ ជាច្រេីនគ្រួសារ រស់នៅក្នុងភូមិក្រដាស ក និងភូមិក្រដាស ខ ឃុំតាំងក្រសាំង ស្រុកបាធាយ
ខេត្តកំពង់ចាម ដែលពួកគាត់កេីតទុក្ខ មិនសុទ្ធចិត្តក្នុងការកាយយកអាចម៍ដី និងថ្មភ្នំ របស់ក្រុមហ៊ុនមួយ ព្រោះកន្លងមកតំបន់ភ្នំនេះ គឺបងប្អូនប្រជាពលរដ្ឋធ្លាប់អាស្រ័យផល និងជាទីទួលសុវត្ថិភាពក្នុងរដូវទឹកឡេីង សម្រាប់ពួកគាត់យកសត្វគោក្របីមកជ្រកកោនផងដែរ ។
ការចុះដោះស្រាយបណ្តឹងនេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានសម្រេចចិត្ត ទី១-ឲ្យក្រុមហ៊ុនវិនិយោគថ្មភ្នំ ឈ្មោះ សុខ សុខា របស់លោកឧកញ៉ា សុខ សុខា ផ្អាកជាបណ្ដោះអាសន្ន ដេីម្បីរង់ចាំអនុវត្តន៍តាមច្បាប់អាជីវកម្មដែលកំណត់ដោយក្រសួងពាក់ពន្ធ័ជាមុនសិន ។ ទី២- តំបន៉ភ្នំទាំងអស់រក្សាទុកជូនប្រជាជនអាស្រ័យផល និងជាទីទួលសុវត្ថិភាពដូចកន្លងមក ។ និងទី៣-សូមប្រជាពលរដ្ឋថែរក្សាដើមឈើថ្មីៗ ដែលបានដាំលើភ្នំ ក្រោមការណែនាំពីឯកឧត្តម គួច ចំរើន អតីតៈអភិបាលខេត្តកំពង់ចាម ដើម្បីរក្សាព្រៃឈើទុកជាម្លប់និងប្រយោជន៍សម្រាប់ប្រជាពលរដ្ឋទូទៅផងដែរ ៕
