ខេត្តកំពត កាលពីព្រឹកថ្ងៃទី២៩ខែកក្កដា ឆ្នាំ ២០១៩ អគ្គនាយកដ្ឋានរដ្ឋបាលនៃក្រសួងមហាផ្ទៃសហការជាមួយរដ្ឋបាលខេត្ត បានបើកកិច្ចប្រជុំផ្សព្វផ្សាយពីគោលបំណងស្ដីពីការចុះតាមដាន ត្រួតពិនិត្យ និងវាយតម្លៃលើការអនុវត្តកិច្ចការរដ្ឋបាល ក្នុងការិយបរិច្ឆេទ ២០១៨ ក្រោមវត្តមានចូលរួមអធិបតីភាព ឯកឧត្ដម ជាវ តាយអភិបាលនៃគណៈអភិបាលខេត្ត ឯកឧត្ដម ជឹង ផល្លាប្រធានក្រុមប្រឹក្សាខេត្ត លោកសួស ប្រាថ្នា ប្រធានក្រុមការងារនៃអគ្គយកដ្ឋានរដ្ឋបាលក្រសួងមហាផ្ទៃ និងមានការចូលរួមជាសមាជីក សមាជិកាពីសំណាក់ឯកឧត្ដម លោកជំទាវ លោក-លោកស្រីសមាជីកក្រុមប្រឹក្សាខេត្ត គណៈអភិបាលខេត្ត និងមន្រ្តីរាជការចំណុះសាលាខេត្ត។
កិច្ចប្រជុំនេះបានផ្ដោតលើកិច្ចការមួយចំនួនសំខាន់គឺ៖
-ពិនិត្យនិងវាយតម្លៃលើការងារគ្រប់គ្រងចាត់ចែងរដ្ឋបាល។
-ពិនិត្យលើការបំពេញតួនាទី ភារកិច្ចរបស់ក្រុមប្រឹក្សា គណៈអភិបាលនិងមន្រ្តីរាជការ។
-ពិនិត្យលើការអនុវត្តមុខងារនៃការផ្ដល់សេវារដ្ឋបាលនិងសេវាសាធារណៈនានា
-ពិនិត្យនុកូលភាពលើសំណុំឯកសារលិខិតស្នាមរដ្ឋបាលនិងលិខិតបទដ្ឋានគតិយុត្តនិងពិនិត្យលើការងារផ្សេងៗមួយចំនួនទៀត។
មានប្រសាសន៍ក្នុងប្រជុំឯកឧត្ដម ជាវ តាយអភិបាលខេត្ត បានចាត់ទុកកិច្ចប្រជុំពេលនេះពិតជាមានសារៈសំខាន់គឺក្នុងគោលដៅពង្រឹងប្រព័ន្ធគ្រប់គ្រងរដ្ឋបាលនៅថ្នាក់ក្រោមជាតិអោយកាន់តែមានប្រសិទ្ធភាពខ្ពស់ សំដៅលើកកម្ពស់ស្មារតីនិងការទទួលខុសត្រូវក្នុងការ
អនុវត្តតួនាទី ភារកិច្ចរបស់ខ្លួនអោយស្របតាមគោលការណ៍ច្បាប់ លិខិតបទដ្ឋានគតិយុត្ត និងជាពិសេសជំរុញការចាត់ចែងអនុវត្តមុខងារ នៃការផ្ដល់សេវារដ្ឋបាលនិងសេវាសាធារណៈ ដើម្បីជួយលើកស្ទួយគុណភាពជីវិតរបស់ប្រជាពលរដ្ឋក្នុងមូលដ្ឋាន ប្រកបដោយគណនេយ្យភាព តម្លាភាព ប្រសិទ្ធភាពខ្ពស់ និងបរិយាប័ន។
ឯកឧត្ដមអភិបាលខេត្ត ក៏បានស្នើដល់ឯកឧត្តមលោកជំទាវលោក-លោកស្រីសមាជីកសមាជិកាក្រុមប្រឹក្សា គណៈអភិបាលនិងមន្ត្រីរាជការចំណុះសាលាខេត្តនៅពេលនេះ សូមចូលរួមកិច្ចសហការសម្របសម្រួលជាមួយក្រុមការងារដើម្បីអោយការងារនេះបានសម្រេចឆាប់រហ័សនិងទទួលបានលទ្ធផលល្អប្រសើរ។
