កងទ័ពរដ្ឋាភិបាលអ៊ុយក្រែន កាលពីថ្ងៃទី៩ កក្កដា បានគំរាមពួកបំបែកខ្លួននិយមស្និទ្ធរុស្ស៊ីនៅក្រុងដូណេតស្ក៍ នាភាគខាងកើតអ៊ុយក្រែនថា កងទ័ពត្រៀមធ្វើការវាយលុកដណ្តើមយកទីក្រុងនោះ ដែលពួកបះបោរអះអាងថា បានទទួលកម្លាំងបន្ថែមជាអ្នកស្ម័គ្រចិត្តកាន់តែច្រើនឡើង។ កាលពីថ្ងៃទី៥ កក្កដា កន្លងមក កងទ័ពអ៊ុយក្រែនបានបណ្តេញពួកឧទ្ទាមឱ្យចេញពីទីក្រុងស្លាវីយ៉ានស្ក៍ ។ ពួកសកម្មប្រយុទ្ធនៃទីក្រុងនេះបាននាំគ្នាដកខ្លួនថយទៅកាន់ ទីក្រុងដូណេតស្ក៍ ជាទីក្រុងធំមួយមានប្រជាជន១លាននាក់ ។ ពួកបះបោរក៏កាន់កាប់ផងដែរនូវអគារយុទ្ធសាស្ត្រជាច្រើននៅ ទីក្រុងលូហ្គានស៍ ជាទីក្រុងធំមួយទៀតស្ថិតនៅជិតព្រំដែនរុស្ស៊ី ។
មេបញ្ជាការរបស់កងកម្លាំងបំបែកខ្លួននិយមនៅ ទីក្រុងដូណេតស្ក៍ ត្រូវបានប្រគល់ដល់លោកអុីហ្គ័រស្ត្រែលកូវ ជានាយទាហានរុស្ស៊ីម្នាក់ដែលរហូតមកដល់ចុងសប្តាហ៍កន្លងមកនេះ ជាអ្នកដឹកនាំបណ្តាកងឯកភាពរបស់ពួកឧទ្ទាមនៅទីក្រុងស្លាវីយ៉ានស្ក៍ ។ដើម្បីកុំឱ្យប្រជាជនស៊ីវិលរងគ្រោះ ប្រធានាធិបតីអ៊ុយក្រែនលោកប៉េត្រូប៉ូរូ៉ឆេនកូ បានបដិសេធមិនចេញបញ្ជាឱ្យធ្វើការវាយប្រហារតាមអាកាស ឬបាញ់កាំភ្លើងធំលើទីក្រុងដូណេតស្ក៍ ដែលក៏ជាទីក្រុងឧស្សាហកម្មសំខាន់មួយ ។
ក៏បុ៉ន្តែរដ្ឋាភិបាលលោកអះអាងថា មានផែនការមួយដើម្បីដណ្តើមកាន់កាប់ទីក្រុងដូណេតស្ក៍ និងទីក្រុងលូហ្គានស្ក៍ ។ កាលពីថ្ងៃទី៩ កក្កដា អ្នកនាំពាក្យកងទ័ពអ៊ុយក្រែន លោកអានឌ្រីយលីសសេនកូវ ក៏និយាយបែបនោះដែរ ។យោងតាមពួកឧទ្ទាមនៅក្រុងដូណេតស្ក៍ថា អ្នកស្ម័គ្រចិត្ត៣០០នាក់បានចូលខ្លួនចាប់តាំងពីថ្ងៃទី៨ កក្កដា មកដើម្បីចូលរួមការពារទីក្រុង រួចបណ្តាកម្លាំងបន្ថែមបន្តមកដល់ ។ ពួកបំបែកខ្លួននិយមបានផ្តាច់ស្ពាន ហើយធ្វើរបាំងរារាំងផ្លូវ ព្រមទាំងជីកជង្ហុកនានានៅតាមបណ្តាសង្កាត់នៃទីក្រុង ។
ចំពោះការអះអាងកាលពីពេលមុននេះរបស់បណ្តាមេ ដឹកនាំអ៊ុយក្រែនថា នឹងដណ្តើមយកតំបន់គ្រីមេវិញក្រោយកម្ទេចពួកបះបោរស្និទ្ធរុស្ស៊ីនៅ ភាគខាងកើតប្រទេស រដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវ ថ្លែងកាលពីថ្ងៃទី៩ កក្កដា ថា រុស្ស៊ីនឹងឆ្លើយតបវិញដោយសមស្របបំផុតចំពោះរាល់ការឈ្លានពាន ប្រឆាំងរុស្ស៊ី ។ 
ក្រោយជួបជាមួយសមភាគីអុីតាលី លោក FEDERICH MOGHERINI លោកឡាវរ៉ូវ ថ្លែងទៅកាន់ក្រុមអ្នកកាសែតថា នោះជាការឈ្លានពានប្រឆាំងដែនដីរុស្ស៊ី ដែលរួមមានទាំងតំបន់គ្រីមេ និងទីក្រុងសេបាស្តូប៉ូវផង ។ លោកឡាវរ៉ូវ គូសបញ្ជាក់ថា លទ្ធិស្តីពីសន្តិសុខជាតិរុស្ស៊ី ច្បាស់បំផុតអំពីវិធីដែលរុស្ស៊ីនឹងបញ្ចេញប្រតិកម្មចំពោះរាល់ការ បុ៉នប៉ងសំដៅធ្វើឱ្យប៉ះពាល់ដល់បូរណភាពដែនដីខ្លួន ។ ទោះបីយ៉ាងណា លោកពន្យល់ថា រុស្ស៊ីត្រៀមពិភាក្សាពី បញ្ហាវិនិយោគបរទេសជាមួយគ្រប់មនុស្សដែលចាប់អារម្មណ៍ចំពោះគ្រីមេ ៕
