កំពង់ចាម: ស្របពេលដែលក្រសួងធនធានទឹកនិងឧតុនិយម បានធ្វេីសេចក្តីជូនដំណឹងអំពីស្ថានភាពទឹកទន្លេមេគង្គលើ របស់កម្ពុជាអាច
នឹងហក់ឡើង ហើយក៏សូមឲ្យស្ថាប័នពាក់ព័ន្ធ និងអាជ្ញាធរដែនដី ពិសេសបងប្អូនប្រជាពលរដ្ឋដែលរស់នៅតាមដងទន្លេ បង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីបញ្ចៀសនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ។
ជាមួយគ្នានោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នារសៀលថ្ងៃទី០៤ ខែកញ្ញា ឆ្នាំ២០១៩នេះ បានដឹកនាំមន្ទីរអង្គភាពពាក់ព័ន្ធជុំវិញខេត្ត និងអាជ្ញាធរមូលដ្ឋាន ចុះពិនិត្យមេីលទីទួលសុវត្ថិភាពជាច្រេីនកន្លែង ដែលqរួមមាន ទីទួលសុវត្ថិភាពវត្តពោធិវ័ន្តកោះប៉ែន វត្តសិរីសាគរកោះកំពង់ត្រុំ ក្បាល់ស្ពានកោះប៉ែន និងក្បាលភូមិស្វាយជ្រុំ ស្ថិតនៅក្នុងឃុំកោះមិត្ត ស្រុកកំពង់សៀម និងទីទួលសុវត្ថិភាពកំពុងសំណាញ់ ឃុំមៀន ស្រុកព្រៃឈរ ដេីម្បីត្រៀមបង្ការជួយសង្គ្រោះបងប្អូនប្រជាពលរដ្ឋ សត្វពាហនៈ ជាដេីម ខណៈពេលដែលទឹកទន្លេមេគង្គខេត្តកំពង់ចាម នៅតែបន្តហក់ឡេីង។
ឯកឧត្តម អ៊ុន ចាន់ដា អភិបាលខេត្តកំពង់ចាម បានផ្ដាំផ្ញើ ដល់បងប្អូនប្រជាពលរដ្ឋទាំងអស់ ដែលរស់នៅតាមដងទន្លេមេគង្គ ត្រូវរៀបចំលក្ខណៈឲ្យបានគ្រប់គ្រាន់ ក្នុងការជម្លៀសខ្លួនចេញទៅរក ទីទួលសុវត្ថិភាព ជាពិសេសត្រូវប្រយ័ត្នចំពោះកុមារតូចៗ នឹងសត្វអសិរពិសផ្សេងៗផងដែរ ហើយក៏សូមឲ្យបងប្អូនប្រជាពលរដ្ឋទាំងអស់រក្សាឲ្យបាននូវ ការហូបស្អាត ទឹកស្អាត និងរស់នៅស្អាត ដែលកត្តាទាំងនេះធ្វើឲ្យសុខភាពរបស់បងប្អូនប្រជាពលរដ្ឋទាំងអស់មានសុខភាពល្អ ចៀសវាងពីជម្ងឺផ្សេងៗផងដែរ។
បេីយោងតាមរបាយការណ៍របស់ លោក អ៊ុំ វិបុល មន្ទីរធនធានទឹក និងឧត្តុនិយមខេត្តកំពង់ចាម បានបញ្ជាក់ថា សម្រាប់ខេត្តកំពង់ចាម ចាប់គិតត្រឹមថ្ងៃទី៥ កញ្ញា ២០១៩នេះ ទឹកទន្លេមេគង្គបានហក់ឡើងចូលតាមដងព្រែកបឹងបួរនានា១០០%ហេីយ ដោយទឹកមានកម្ពស់១៤.១០ម៉ែត្រ បេីប្រៀបធៀបនឹងថ្ងៃម្សិលមិញកេីនឡេីង០.៥០ម៉ែត្រ ដោយឡែកឆ្នាំ២០១៨កន្លងទៅទឹកមានកម្ពស់១៥.២៧ម៉ែត្រ ខណៈដែលកម្ពស់ទឹកត្រូវប្រកាសអាសន្ន១៥.២០ម៉ែត្រ។ យោងតាមការព្យាករណ៍ឆ្នាំនេះទឹកអាចនឹងហក់ឡើងខ្ពស់ជាងចំណុចប្រកាសអាសន្នផងដែរ ៕
