កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានថ្លែងថា សូមចាត់ទុកខ្ញុំជាកូនជាចៅរបស់លោកយាយលោកតាផង បេីមានការអីហៅ បេីត្រូវការអីប្រាប់ផង ដេីម្បីយេីងរួមគ្នាជាចង្កោមគ្រួសារតែមួយ នៃប្រជាពលរដ្ឋខេត្តកំពង់ចាមរបស់យេីង ហេីយការជួបជុំគ្នានេះ ជាការនិយាយគ្នាលេងក្នុងនាមជាថ្នាក់ដឹកនាំ ជាមួយលោកយាយលោកតា 
ចាស់ព្រឹទ្ធាចារ្យ ដោយក្តីស្រលាញ់ ក្រោមដំបូលនៃសុខសន្តិភាព ដោយថ្នាក់ដឹកនាំដែលនៅទីនេះធ្វើការបម្រើផ្តល់សេវាយ៉ាងពិតប្រាកដ មិនមែនជាម្ចាស់របស់ប្រជាពលរដ្ឋឡេីយ ការថ្លែងយ៉ាងដូច្នេះក្នុងឱកាសដែលឯកឧត្តមអភិបាលខេត្ត បានអញ្ជើញជួបសំណេះសំណាលជាមួយលោកយាយ លោកតា ប្រមាណជា២០០នាក់ នៅភូមិតាមាស ឃុំគរ ស្រុកព្រៃឈរ ខេត្តកំពង់ចាម កាលពីព្រឹកថ្ងៃទី៦ ខែកញ្ញា ឆ្នាំ២០១៩ ដោយមានការអញ្ជើញចូលរួមពីលោក លោកស្រី អភិបាលរងខេត្ត មន្ទីរអង្គភាពពាក់ព័ន្ធជុំវិញខេត្ត និងអាជ្ញាធរមូលដ្ឋានជាច្រើនរូបផងដែរ។
ឯកឧត្ដមអភបាលខេត្ត បានបញ្ជាកថា សុខសន្តិភាពយូរអង្វែង នាំមកនូវការរីកចម្រើនសម្រាប់ប្រទេសជាតិ ជាពិសេស ប្រជាពលរដ្ឋទទួលបានផលប្រយោជន៍ ជាបន្តបន្ទាប់ ហេីយសន្តិភាព ពិតជាមានតម្លៃណាស់ សម្រាប់យើងទាំងអស់គ្នា ពោលគឺ សម្រាប់ប្រជាពលរដ្ឋ នៅទូទាំងប្រទេសកម្ពុជា សន្តិភាព គឺបានមកពីការរួមចំណែក ពីយើងទាំងអស់គ្នា ក្រោមការដឹកនាំដ៏ឆ្លៀសវៃ របស់សម្ដេចតេជោ ហ៊ុន សែន ហើយបានមក ដោយក្ដីលំបាកបំផុត ។ យើងទាំងអស់គ្នា ឆ្អែតហើយ ក្នុងជីវិតរស់នៅក្នុងភ្លើងសង្គ្រាម ។ អញ្ចឹងទេ យើងត្រូវចូលរួមចំណែក ថែរក្សាសន្តិភាពនេះ ឲ្យបានគង់វង់ស្ថិតស្ថេរ ទៅមុខបន្តទៀត ។ 
ឯកឧត្ដមបានបញ្ជាក់ទៀតថា ថ្វីត្បិតតែ នាបច្ចុប្បន្ន យើងកំពុងរស់នៅ ជាមួយនឹងប្រទេស ដែលសុខសន្តិភាព និងសំបូរសប្បាយ ក៏ពិតមែន ក៏ប៉ុន្តែ យើងម្នាក់តោងគិតគូដោយខ្លួនឯង ទៅលើបញ្ហាសុខភាព ។ តាមរយៈនេះ សូមឲ្យលោកតា យាយ យកចិត្តទុកដាក់ អំពីសុខភាព បើមានជម្ងឺដង្កាត់ផ្សេងៗ សូមទៅកាន់មន្ទីរពេទ្យ ឲ្យបានទាន់ពេលវេលា ។
នាឱកាសនោះដែរ ឯកឧត្ដម អ៊ុន ចាន់ដា អភិបាល ខេត្តកំពង់ចាម ក៏បានផ្ដល់ជូននូវវត្ថុកំដរដៃ សម្រាប់យាយ តា ទាំង ២០០នាក់ ដោយម្នាក់ៗក្រណាត់ស ១ដុំ និងថវិកា ២ម៉ឺនរៀល ផងដែរ ៕
