កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ និងអាជ្ញាធរមូលដ្ឋាន នៅវេលាថ្ងៃត្រង់ ថ្ងៃទី២៤ ខែកញ្ញា ឆ្នាំ២០១៩នេះ បានអញ្ជើញចុះពិនិត្យស្ថានភាពទឹកជំនន់ និងគម្រោងជួសជុល ផ្លូវ១ខ្សែ ប្រវែង ៦,៥០ គីឡូម៉ែត្រ ចាប់ពីចំណុច ភូមិជាលា ឆ្ពោះទៅកាន់ភូមិទួលចាន់ នៃឃុំច្បារអំពៅ ស្រុកបាធាយ ខេត្តកំពង់ចាម ។ 
សូមបញ្ជាក់ថា គម្រោងផ្លូវខាងលើនេះជាប្រភេទផ្លូវក្រាលកៅស៊ូ ដែលជាអំណោយដ៏ថ្លៃថ្លា របស់សម្ដេចអគ្គមហាសេនាបតីតេ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ 
បើតាមការអះអាង របស់អាជ្ញាធរមូលដ្ឋាន ឲ្យដឹងថា មកដល់បច្ចុប្បន្ន គម្រោងនេះ បានស្ថាបនា ជាតួផ្លូវដីជាមុន ដើម្បី ឈានទៅក្រាលកៅស៊ូពីលើ ទៅតាមលក្ខណៈបច្ចេកទេស ។ ប៉ុន្ដែ ដោយសារទឹកជំនន់ ត្រូវបានផ្អាក ជាបណ្ដោះអាសន្ន។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានអញ្ជើញបន្តដំណើរ ដឹកនាំមន្ត្រីជំនាញពាក់ព័ន្ធ ចុះពិនិត្យការដ្ឋានស្ថាបនាផ្លូវក្រាលកៅស៊ូប្រភេទ DBST មួយខ្សែមានប្រវែង៤,៥០០ម៉ែត្រ ស្ថិតនៅក្នុងភូមិបឹងជ្រោយ ឃុំសូទិព្វ ស្រុកជើងព្រៃ ដែលសម្រេចបានប្រមាណជា៥០% ផងដែរ ៕
