កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា នៅពេលដែលបងប្អូនប្រជាពលរដ្ឋយេីងមានទុក្ខលំបាក គឺឃើញ
មានតែអាជ្ញាធរមូលដ្ឋានមុខដដែលៗទេ ដែលជាអ្នកយកអាសាចុះជួយយ៉ាងពិតប្រាកដ និងទាន់ពេលវេលា ដោយមិនមានការរេីសអេីង ឬប្រកាន់និន្នាការនយោបាយអ្វីឡើយ ដូច្នេះសូមឲ្យបងប្អូនប្រជាពលរដ្ឋយើង ផ្ដល់ការជឿទុកចិត្ត និងរាយការណ៍ទៅអាជ្ញាធរភូមិ-ឃុំ នៅពេលដែលមានបញ្ហាអ្វីកើតឡើង ឲ្យបានឆាប់រហ័សផងដែរ។ ការថ្លែងយ៉ាងដូច្នេះខណៈដែល ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ និងអាជ្ញាធរមូលដ្ឋាន បានអញ្ជើញនាំយកអំណោយចុះចែកជូនបងប្អូនប្រជាពលរដ្ឋ ដែលរងគ្រោះដោយខ្យល់កន្ត្រាក់ បណ្តាលឲ្យប៉ះពាល់ដល់លំនៅឋាន ចំនួន១៦គ្រួសារ ស្ថិតនៅក្នុងភូមិមេសរ ឃុំព្រែកកុយ ស្រុកកងមាស ខេត្តកំពង់ចាម នាព្រឹកថ្ងៃទី៣០ ខែកញ្ញា ឆ្នាំ២០១៩ ។
ឆ្លៀតក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានធ្វើការអំពាវនាវដល់បងប្អូនប្រជាពលរដ្ឋ សូមឲ្យការប្រកបមុខរបរនេសាទ ដោយគោរពតាមគោលការណ៍ច្បាប់កំណត់ ដេីម្បីរួមគ្នាថែរក្សានូវធនធានមច្ឆាជាតិយើង ឲ្យបាននៅសេសសល់ដល់កូនចៅយេីងជំនន់ក្រោយៗផងដែរ ។
ជាមួយគ្នានោះ ឯកឧត្តម អភិបាលខេត្តកំពង់ចាម បានថ្លែងដែរថា បន្ទាប់ពីទទួលបានព័ត៌មាន អំពីស្ថានភាពបងប្អូនប្រជាពលរដ្ឋយើង ទទួលរងគ្រោះដោយខ្យល់កន្ត្រាក់រលំផ្ទះនេះភ្លាម អាជ្ញាធរ ជាពិសេស គណៈកម្មាធិការគ្រប់គ្រងគ្រោះមហន្តរាយខេត្ត រួមជាមួយក្រុមការងារចុះពង្រឹងមូលដ្ឋាន បាននាំនូវអំណោយសង្គ្រោះបន្ទាន់ នូវសម្ភារៈ ជាស្បៀងអាហារ និងថវិកា ចែកជូនប្រជូនប្រជាពលរដ្ឋ ទាំង ១៦គ្រួសារ ដែលក្នុងនោះ ៖ អ្នករលំផ្ទះចំនួន ១៤គ្រួសារ ក្នុង ១គ្រួសារ ទទួលបាន អង្ករ ២០គ.ក្រ មី ១កេស ត្រីខ ១យួរ និងថវិកា ២០ម៉ឺនរៀល ។ ដោយឡែក អ្នករបើកដំបូលចំនួន ២គ្រួសារ ក្នុង ១គ្រួសារទទួលបានអង្ករ ២០គ.ក្រ មី ១កេស ត្រីខ ១យួរ និងថវិកា ១០ម៉ឺនរៀលផងដែរ។
គួររំលឹកផងដែរថា កាលពីយប់ថ្ងៃទី២៨ ខែកញ្ញា កន្លងទៅ មានបាតុភូតខ្យល់កន្ត្រាក់ បានធ្វើឲ្យប៉ះពាល់ផ្ទះរបស់ប្រជាពលរដ្ឋចំនួន ១៦គ្រួសារ ក្នុងនោះ នៅឃុំព្រែកកុយ ចំនួន ១៥គ្រួសារ និង ១គ្រួសារ នៅឃុំរាយប៉ាយ ។ ក្រៅពីការបង្កផលប៉ះពាល់រលំ និងប៉ើងតំបូលផ្ទះ គ្រោះធម្មជាតិនេះ ពុំបណ្ដាលឲ្យប៉ះពាល់ដល់អាយុជីវិត មនុស្ស និងសត្វឡើយ ៕
