កំពង់ចាម: អភិបាលនៃគណៈអភិបាលខេត្តកំពង់ចាម លោក អ៊ុន ចាន់ដា បានថ្លែងថា ការទទួលភាពជោគជ័យទៅបានលុះត្រាតែមានការសហការ រវាងបងប្អូនប្រជាពលរដ្ឋជាមួយនឹងអាជ្ញាធរមានសមត្ថកិច្ច ក្នុងការអនុវត្តន៍គោលនយោបាយភូមិឃុំមានសុវត្ថិភាព ដូច្នេះ
សូមឲ្យលោកយាយលោកតាបងប្អូនប្រជាពលរដ្ឋ ចូលរួមសហការជាមួយសមត្ថកិច្ចអាជ្ញាធរមូលដ្ឋាន ដេីម្បីទទួលបានភាពជោគជ័យសម្រាប់សហគមន៍យើងទាំងមូល គឺត្រូវផ្ដល់ព័ត៌មានរាយការណ៍ទៅអាជ្ញាធរមានសមត្ថកិច្ច ជាបន្ទាន់រាល់សកម្មភាពដែលសង្ស័យជាបទល្មើស និងសកម្មភាពប៉ុនប៉ងបង្កអសន្តិសុខរបស់ជនឆ្លៀតឱកាសមួយចំនួនផងដែរ។ ការថ្លែងយ៉ាងដូច្នេះក្នុងឱកាសដែលលោកអភិបាលខេត្តបានអញ្ជើញចូលរួមក្នុងពិធីបញ្ចុះបឋមសិលា ដើម្បីសាងសង់អគារអធិការដ្ឋាននគរបាលស្រុកកោះសូទិន នាព្រឹកថ្ងៃទី៦ ខែតុលា ឆ្នាំ២០១៩ ។
ថ្លែងក្នុងពិធីនោះដែរ លោក អ៊ុន ចាន់ដា អភិបាលខេត្តកំពង់ចាម បានលើកឡើងថា អគារអធិការដ្ឋាននេះគឺពិតជាមានសារៈសំខាន់ណាស់ ដូច្នេះត្រូវសាងសង់ឲ្យមានគុណភាព ត្រូវតាមស្តង់ដារលក្ខណៈបច្ចេកទេស ដើម្បីប្រយោជន៍ដល់ការប្រើប្រាស់បានយូរអង្វែង ក្នុងការបម្រើសេវាសាធារណៈ ជូនប្រជាពលរដ្ឋដោយមិនមានការរេីសអេីង។ ជាមួយគ្នានោះ លោកអភិបាលខេត្ត ក៏បានធ្វើការកោតសរសើរចំពោះអជ្ញាធរកងកម្លាំងសមត្ថកិច្ច ស្រុកកោះសូទិន ដែលសហការគ្នាបានយ៉ាងល្អ ក្នុងការការពារសុវត្ថិភាពជូនប្រជាពលរដ្ឋ ក្នុងឱកាសប្រារព្ធពិធីបុណ្យភ្ជុំបិណ្ឌ ការពារសុវត្ថិភាពជូនប្រជាពលរដ្ឋ ពេលមានគ្រោះទឹកជំនន់ និងរារាំងការប្រមូលផ្ដុំរបស់ជនឆ្លៀតឱកាសប៉ុនប៉ងបង្កអសន្តិសុខតាមការញុះញង់បំបែកបំបាក់សាមគ្គីជាតិផងដែរ ។
គួរបញ្ជាក់ផងដែរថា អគារអធិការដ្ឋាននគរបាលស្រុកកោះសូទិន ដែលត្រូវប្រារព្ធពិធីបញ្ចុះបឋមសិលានាពេលនេះ មានទំហំ ទទឹង១៨ម៉ែត្រ និងបណ្ដាយ៩ម៉ែត្រ សាងសង់លើផ្ទៃដី ទំហំ២,០២៥ម៉ែត្រការ៉េ ដែលជាអំណោយរបស់ក្រសួងមហាផ្ទៃ ។ ក្នុងឱកាសនោះដែរ លោក អភិបាលខេត្ត ក៏បានឧបត្ថម្ភថវិកាជូនតាអាចារ្យ១ម្នាក់ ថវិកា១០ម៊ឺនរៀល តាជី យាជី ៣៦នាក់ ក្នុងម្នាក់ៗទទួលថវិកា១ម៊ឺនរៀល និងក្រណាត់ស១ដុំផងដែរ៕
