កំពង់ចាម: សាខាកាកបាទក្រហមកម្ពុជា ខេត្តកំពង់ចាម បានប្រារព្ធសន្និបាត អាណត្តិទី៥ (២០១៩-២០២៥) ក្រោមវត្តមាន លោកស្រី ពុំ ចន្ទីនី អគ្គលេខាធិការតំណាងកាកបាទក្រហមកម្ពុជា លោក ហ៊ុន ណេង ប្រធានកិត្តិយសាខាកាកបាទក្រហមកម្ពុជាខេត្ត និងលោក អ៊ុន ចាន់ដា អភិបាលខេត្តកំពង់ចាម ។ ដែលពិធីនេះធ្វើឡើងនាព្រឹកថ្ងៃទី១៦ ខែតុលា ឆ្នាំ២០១៩ នៅសាលាខេត្តកំពង់ចាម ដោយមានការអញ្ជើញចូលរួមពី គណៈកិត្តិយសសាខា គណៈកម្មាធិការសាខាអាណត្តិទី៤ សមាជិក-សមាជិកាពេញសិទ្ធិ មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជនកាកបាទក្រហមកម្ពុជា និងអ្នកស្ម័គ្រចិត្ត សរុបប្រមាណជា២៧៥នាក់ ផងដែរ។
គូសបញ្ជាក់ផងដែរថា អង្គសន្និបាតអាណត្តិទី៥ របស់កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់តាំង លោក ហ៊ុន ណេង ជាប្រធានកិត្តិ យសសាខា និងអនុប្រធានកិត្តិ យសសាខា សរុបចំនួន១៩រូប ។ សមាជិក សមាជិកាពេញសិទ្ធិបាន បោះឆ្នោតជ្រើសរើសគណៈកម្មាធិការសាខាអាណត្តិទី៥ ដែលមានសមាសភាព១៥រូប ក្នុងនោះបានបោះឆ្នោតជ្រើសរើស លោក អ៊ុន ចាន់ដា ជាប្រធានគណៈកម្មាធិការសាខា, លោកស្រី ប៉ាង ដានី អនុប្រធានអចិន្ត្រៃយ៍ លោក ហួត វុទ្ធី អនុប្រធាន លោក ប៉ែន ម៉ារឌី អនុប្រធាន លោកស្រី ចាន់ វ៉ាន់នី ហេរញ្ញិក និងលោក ស្រី សុភ័ក្រ្ត ជាលេខាធិការគណៈកម្មាធិការសាខា ។
ក្នុងឱកាសនោះ លោក អ៊ុន ចាន់ដា ប្រធានគណៈ កម្មាធិការសាខាកាកបាទក្រហមកម្ពុជា ខេត្តកំពង់ចាម អាណត្តិទី៥ បានធ្វើការប្តេជ្ញា ចិត្តយ៉ាងមុតមាំ ដោយ ៖ ១-ពង្រឹងអភិបាលកិច្ចល្អ ។ ២-ពង្រឹង និងពង្រីកសមត្ថភាព គៀរគររកមូលនិធិ និងគ្រប់គ្រង មានគណនេយ្យភាព និងតម្លាភាព ។ ៣-ខិតខំពង្រឹងសមត្ថភាពគ្រប់គ្រងគ្រោះមហន្តរាយប្រកបដោយប្រសិទ្ធភាព ។ ៤-ពង្រីក និងអភិវឌ្ឍកម្លាំងចលកររួមមាន៖ យុវជន និងអ្នកស្ម័គ្រចិត្ត ឲ្យកាន់តែសកម្មថែមទៀត ។
៥-ទំនាក់ទំនងល្អជាមួយមន្ទីរ អង្គភាព និង អនុសាខាក្រុង ស្រុក កាន់តែជិតស្និទ្ធថែមទៀត ។ និង៦-បន្តអភិវឌ្ឍសាខា អនុសាខា ឱ្យទៅជាសាខាមានដំណើរការល្អលើគ្រប់វិស័យ ។
លោក ហ៊ុន ណេង ប្រធានកិត្តិយសាខាកាកបាទក្រហមកម្ពុជា ខេត្តកំពង់ចាម បានសំដែងនូវការកោតសរសើរ និងវាយតម្លៃខ្ពស់ ចំពោះ ស្មារតីទទួលខុសត្រូវ គណៈកម្មាធិការសាខាកាកបាទក្រហមកម្ពុជា ខេត្តកំពង់ចាម អាណត្តិទី៤ សម្រេចបាន និងសំដែងនូវការគាំទ្រ ចំពោះ សមាជិក សមាជិកា គណៈកម្មាធិការសាខា ដែលទើបជាប់ឆ្នោត និងទិសដៅការងារបន្តសម្រាប់អាណត្តិទី៥ ដែលអង្គសន្និបាត បានអនុម័ត ផងដែរ។ ជាមួយគ្នានោះ ក៏សូមអំពាវនាវដល់ថ្នាក់ដឹកនាំ មន្ទីរ ស្ថាប័ន អង្គភាពដែលពាក់ព័ន្ធទាំងអស់ទាំងអាជ្ញាធរ មានសមត្ថកិច្ចគ្រប់លំដាប់ថ្នាក់ វិស័យឯកជន សង្គមស៊ីវិល សប្បរសជន ដៃគូសហប្រតិបត្តិការ សូមបន្តរក្សា និងពង្រឹងសាមគ្គីភាព លើកកម្ពស់វប្បធម៌ចែករំលែក បំផុសការចូលរួមយ៉ាងសកម្មក្នុងបុព្វហេតុមនុស្សធម៌ មគ្គុទ្ទេសក៍ ដ៏ឈ្លាសវៃរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងព្រះរាជវីរគំរូមនុស្សធម៌ សម្តេចព្រះមហាក្សត្រី ព្រះវរាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាសក្ការៈដ៏ខ្ពង់ខ្ពស់បំផុត នៃយើង ផងដែរ។
សូមបញ្ជាក់ដែរថា នៅព្រឹកថ្ងៃដដែលនេះ លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា បានដឹកនាំកិច្ចប្រជុំតម្រង់ទិសស្តីពីការដឹកនាំ និងគ្រប់គ្រងគណៈកម្មាធិការសាខាកាកបាទក្រហមកម្ពុជា ខេត្តកំពង់ចាម អាណត្តិទី៥ ដោយមានការចូលរួមពីសំណាក់លោក លោកស្រី គណៈកម្មាធិការសាខា និងអនុសាខាទាំង ១០ស្រុក/ក្រុង សរុបចំនួន ៣៥នាក់ផងដែរ៕
