ព្យុះទីហ្វុងឈ្មោះ Neoguri ដែលបោកបក់មកជិតដល់ទីក្រុងតូក្យូ ក្រោយពីវាយប្រហារលើផ្នែកមួយធំនៃប្រទេសជប៉ុន រយៈពេលជាច្រើនថ្ងៃនោះ នាថ្ងៃទី១១ កក្កដា បានចុះថយកម្លាំងប្រែក្លាយមកជាសម្ពាធត្រូពីកាល់មួយ ។ព្យុះនោះបណ្តាលឱ្យមនុស្សស្លាប់យ៉ាងតិច៧នាក់ និង
របួស៦៦នាក់ រួចផ្ទះជាច្រើនរយខ្នងរងការបំផ្លាញ ឬខូចខាត ។ យោងតាមទូរទស្សន៍ជប៉ុន NHK ថា ព្យុះនេះបានបោកបក់ដល់ភាគខាងត្បូងជប៉ុន កាលពីយប់ថ្ងៃទី១០ មក១១ កក្កដា គឺមកដល់ជីបាខាងកើតក្រុងតូក្យូ នាវេលាម៉ោង៥ព្រឹក ម៉ោងក្នុងស្រុកនាំឱ្យមានរលកសមុទ្រធំៗកម្ពស់ច្រើនម៉ែត្រ ។ មុនពេលព្យុះ Neoguri បោកបក់ចូលជ្រៅក្នុងដែនដីជប៉ុន កាលពីថ្ងៃទី១០ កក្កដា ព្យុះនោះញុំាងឱ្យមានភ្លៀងធ្លាក់ខ្លាំងបំផុត តាំងពីដើមសប្តាហ៍មក ក្នុងផ្នែកមួយធំរបស់ប្រទេស ចាប់ពីកោះអូគីណាវ៉ា ចុងខាងត្បូងរហូតដល់ភាគកណ្តាលប្រទេស ។ ពីភាគនិរតីដល់ភាគឦសាន ចាប់តាំងពីដើមសប្តាហ៍មកមានការប្រកាសអាសន្នពីភ្លៀងធ្លាក់ ខ្លាំង និងខ្យល់ខ្លាំង ព្រមទាំងរលកសមុទ្រធំៗ ៕
