កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានស្នើឲ្យកម្លាំងសមត្ថកិច្ចទាំងអស់ ត្រូវយកចិត្តទុកដាក់ ក្នុងការអនុវត្តនូវតួនាទី ភារកិច្ច របស់ខ្លួន ដើម្បីការពារសន្តិសុខជូនជាតិ និងប្រជាជន ការថ្លែងយ៉ាងដូច្នេះក្នុងឱកាសជួបសំណេះសំណាល និងបើកវគ្គហ្វឹកហ្វឺនកងជួរមុខ មន្ត្រីនគរបាលជាតិ នៃស្នងការនគរបាល ខេត្តកំពង់ចាម នាព្រឹកថ្ងៃទី២៩ ខែតុលា ឆ្នាំ២០១៩ ។
ថ្លែងក្នុងឱកាសនោះដែរ ឯកឧត្ដម អ៊ុន ចាន់ដា ប្រធានគណៈបញ្ជាការឯកភាព ខេត្តកំពង់ចាម បានកោតសរសើរចំពោះ ស្នងការរដ្ឋាននគរបាល ខេត្តកំពង់ចាម ដែលបានដឹកនាំបញ្ជា ក្នុងការធានាបាននូវសន្តិសុខ សណ្ដាប់ធ្នាប់សាធារណៈ ជូនដល់ខេត្តកំពង់ចាម នាពេលកន្លងមក។ ជាមួយគ្នានោះ ឯកឧត្ដម ក៏បានវាយតម្លៃ ចំពោះ ថ្នាក់ដឹកនាំស្នងការ ដែលបានរៀបចំឲ្យមានវគ្គបំប៉ន នូវជំនាញពិសេស ទៅដល់កម្លាំងជួរមុខ ដើម្បី ឲ្យមានគោលជំហរហ្នឹងហ្នរ ប្រកបដោយទឹកចិត្តក្លៀវក្លា មុះមុត ក្នុងការបំពេញការងារ ដើម្បីការពារបាននូវសន្និសុខសណ្ដាប់ធ្នាប់សាធារណៈ ជូនប្រជាពលរដ្ឋ 
ប្រកដោយប្រសិទ្ធភាព ព្រោះបើកងកម្លាំងមានកាយសម្បទារឹងមាំ រួមផ្សំជាមួយនឹងទឹកចិត្តក្លៀវក្លាមុះមុតនោះ ទើបយើងអាចសម្រេចបាន នូវគោលបំណង ជូនដល់អង្គភាពបាន ។ ក្រៅពីនោះ ក្នុងនាមសមត្ថកិច្ចជំនាញ ដែលជាអ្នកអនុវត្តច្បាប់ ចាំបាច់ត្រូវយល់ច្បាស់ អំពីតួនាទីភារកិច្ច ដែលខ្លួនមាន និងប្រកបដោយការទទួលខុសត្រូវខ្ពស់ ផងដែរ ។
ឯកឧត្ដម ប្រធានគណៈបញ្ជាការឯកភាពខេត្ត ក៏បានចាត់ទុកថា ការជួបជុំគ្នានាពេលនេះ ក៏ដើម្បី បានត្រួតពិនិត្យកងកម្លាំង ក្នុងការត្រៀមបង្កា លើកិច្ចការពារសន្តិសុខ សណ្ដាប់ធ្នាប់សាធារណៈ ជូនខេត្តកំពង់ចាម នាពេលខាងមុខ ។ ដូច្នេះ ក្នុងនាមកងកម្លាំង ត្រូវយកចិត្តទុកដាក់ អនុវត្តនូវតួនាទី ភារកិច្ច របស់ខ្លួន ដើម្បី ការពារសន្តិសុខជាតិ និងប្រជាជន ព្រមទាំង ក្ដាប់ឲ្យបាននូវព័ត៌មានទាំងឡាយ ឲ្យបានគ្រប់ជ្រុងជ្រោយ ដើម្បីដាក់ចេញនូវវិធានការអន្តរាគមន៍ ទប់ស្កាត់នូវរាល់បាតុភាពទាំងឡាយ ដែលបង្កឲ្យអស្ថេភាពដល់សង្គមជាតិ ។ 
ក្រៅពីនោះ កងកម្លាំងទាំងអស់ ត្រូវអនុវត្តឲ្យបាននូវរាល់បទបញ្ជា របស់រាជរដ្ឋាភិបាល ដើម្បី ការពារនូវភាពសុខសាន្ត ជូនសង្គមជាតិ និងប្រជាពលរដ្ឋផងដែរ ។
ជាមួយគ្នានោះ លោកឧត្ដមសេនីយ៍ទោ ឯម កុសល ស្នងការនគរបាលខេត្តកំពង់ចាម បានឲ្យដឹងថា ក្នុងការត្រៀមកម្លាំងការពារសន្តិសុខសណ្ដាប់សាធារណៈជូនជាតិ និងប្រជាជន ស្នងការដ្ឋាន បានរៀបចំផែនការ ដើម្បី ដាក់កម្លាំងការពារ នៅតាមគោលដៅពិសេសៗមួយចំនួន នៅក្នុងទូទាំងខេត្តកំពង់ចាម ធ្វើយ៉ាងណា ដើម្បី ថែរក្សាសន្តិសុខ សុវត្ថិភាព ជូនប្រជាពលរដ្ឋ ឲ្យបានល្អប្រសើរ ។ 
ក្រៅពីនោះ យើងក៏បានត្រៀមនូវមធ្យោបាយ និងសម្ភារៈផ្សេងៗទៀត ដើម្បី បំរើដល់កងកម្លាំងចល័ត និងចុះអន្តរាគមន៍ នៅតាមគោលដៅនីមួយៗ ឲ្យទាន់ពេលវេលា ខណៈដែល មានព្រឹត្តិការណ៍ផ្សេងៗ កើតឡើងជាយថាហេតុនោះ ។
ក្នុងឱកាសនោះដែរ ឯកឧត្ដម អ៊ុន ចាន់ដា ក៏បានផ្ដល់ជូន មី ចំនួន ២០០កេស និងថវិកា ៥លានរៀល សម្រាប់ដោះស្រាយក្នុងការហ្វឹកហ្វឺន ព្រមទាំងបានអញ្ជើញពិនិត្យកន្លែងស្នាក់នៅរបស់កងអន្តគមន៍ និងអាគារការិយាល័យជំនាញ នៃស្នងការដ្ឋាននគរបាលខេត្តកំពង់ចាម ផងដែរ៕
