កំពង់ចាម: ដោយក្តីព្រួយបារម្ភចំពោះការខូចខាតផលដំណាំស្រូវ របស់បងប្អូនប្រជាកសិករ នាព្រឹកថ្ងៃទី១ ខែធ្នូ ឆ្នាំ២០១៩នេះ 
មន្ទីរធនធានទឹក និងឧតុនិយម ខេត្តកំពង់ចាម សហការជាមួយអាជ្ញាធរមូលដ្ឋាន បានដឹកនាំក្រុមការងារចុះអន្តរាគមន៍បូមទឹកជួយសង្រ្គោះស្រូវប្រាំង ចំនួន៣៨៥ហិកតា ស្ថិតនៅក្នុងភូមិតាំងរលៀង និងឃុំមេព្រីង ស្រុកបាធាយ ខេត្តកំពង់ចាម។
លោកអ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម បានឲ្យដឹងថា ការចុះអន្តរាគមន៍បូមទឹកជួយសង្រ្គោះផលដំណាំស្រូវ របស់បងប្អូនប្រជាពលរដ្ឋនេះ ក្រុមការងារមន្ទីរធនធានទឹក បានសហការជាមួយអាជ្ញាធរស្រុកបាធាយ ក៏ដូចជាអាជ្ញាធរភូមិ ឃុំ ដោយប្រេីប្រាស់ម៉ាសុីនកម្លាំង២៥សេស ចំនួន៤គ្រឿង ដេីម្បីទាញយកប្រភពទឹកពី បឹងជីច្រា ហើយបញ្ចូលទៅក្នុងដីស្រែនៅតំបន់ខាងលើនោះ បានចំនួន៣៨៥ហិកតា ស្ថិតនៅក្នុងភូមិតាំងរលៀង និងឃុំមេព្រីង ស្រុកបាធាយ ខេត្តកំពង់ចាម ។
គួរបញ្ជាក់ថា កាលពីថ្ងៃទី២១ ខែវិច្ឆិកា ឆ្នាំ២០១៩ កន្លងទៅថ្មីៗនេះ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន បានចេញសារាចរណែនាំ ស្ដីពីការចាត់វិធានការថែរក្សាទឹកទុក ខណៈដែលកម្ពុជានឹងជួបគ្រោះរាំងស្ងួត អាកាសធាតុក្ដៅខ្លាំង ហើយរដូវវស្សានឹងមកដល់មានសភាពយឺតយ៉ាវទៀតផង យោងតាមស្ថានភាពខាងលើនេះ រាជរដ្ឋាភិបាលបានធ្វើការណែនាំ ១- ការងារបង្កបង្កើនផលស្រូវប្រាំងក្នុងឆ្នាំ ២០១៩ – ២០២០ គឺអាចធ្វើបានតែ ១ដង ប៉ុណ្ណោះ ដោយមិនអាចធ្វើស្រែវប្រាំងលើកទី២ បានទេ បើទោះបីជាទឹកនៅតាមបណ្តាអាងដែលបានរក្សាទុក និងកន្លែងមួយចំនួនដែលមានទឹកជាធម្មជាតិក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀត ក្រៅពីស្រវ ។
២- ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរួមចាត់វិធានការថែរក្សាទឹកទុកឲ្យបានល្អ ដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះ រហូតដល់ពេលមានភ្លៀងធ្លាក់ល្អប្រសើរឡើងវិញ ៕
