កំពង់ចាម: អភិបាលនៃគណៈអភិបាលខេត្តកំពង់ចាម លោក អ៊ុន ចាន់ដា បានស្នើឲ្យក្រុមហ៊ុន ចិន ដែលមានបំណងដាក់ទុនបើករោង
ចក្រកែច្នៃសំរាមបម្លែងទៅជាថាមពលអគ្គិសនី ក្នុងខេត្តកំពង់ចាម ធ្វើការសិក្សាឲ្យបានស៊ីជម្រៅបន្ថែមទៀត មុននឹងឈានទៅសម្រេចគោលដៅក្នុងការវិនិយោគ ប្រកបដោយភាពជោគជ័យ ការថ្លែងយ៉ាងដូច្នេះក្នុងឱកាសអនុញ្ញាតឲ្យប្រតិភូក្រុមហ៊ុនចិន “ខនវេនឆ័រ ហូលឌីង គ្រប់” Conch Venchher Holding Group ចូលជួបសម្ដែងការគួរសម និងពិភាក្សាការងារ នារសៀលថ្ងៃទី២ ខែធ្នូ ឆ្នាំ២០១៩ នៅសាលាខេត្តកំពង់ចាម។
ក្នុងឱកាសជួបសម្ដែងការគួរសមនោះ គណៈប្រតិភូចិន “ខនវេនឆ័រ ហូលឌីង គ្រប់” Conch Venchher Holding Group បានឲ្យដឹងថា ក្រុមហ៊ុនរបស់ខ្លួន បានធ្វើការវិនិយោគ កែច្នៃសំរាមបម្លែងទៅជាថាមពលអគ្គិសនី សម្រេចបានគោលដៅជោគជ័យ នៅប្រទេសវៀតណាម រួចហើយ ក្នុងនោះក្រុមហ៊ុនក៏មានបំណងមកបណ្ដាក់ទុនវិនិយោគ កែច្នៃសំរាមផលិតថាមពលអគ្គិសនី នៅក្នុងខេត្តកំពង់ចាម នេះផងដែរ។
ជាមួយគ្ននោះ លោក អ៊ុន ចាន់ដា អភិបាលខេត្តកំពង់ចាម បានថ្លែងថា បច្ចុប្បន្ន នៅទូទាំងខេត្តកំពង់ចាម ក្នុង១ថ្ងៃមានសំរាម ប្រមាណជា២៥០តោន បេីក្រុមហ៊ុនមានបំណងមកធ្វើការវិនិយោគនោះ ពិតជាប្រសើរណាស់ តែសូមឲ្យក្រុមហ៊ុន ធ្វើការសិក្សាឲ្យបានស៊ីជម្រៅបន្ថែមទៀត មុននឹងឈានទៅសម្រេចគោលដៅក្នុងការវិនិយោគ ប្រកបដោយភាពជោគជ័យ ព្រោះយើងមិនចង់ឃើញការវិនិយោគ របស់ក្រុមហ៊ុនណាមួយ ហើយត្រូវទទួលការខាតបង់នោះឡើយ ៕
