បារ៉ាក់ អូបាម៉ា ជំនួយការពិសេស របស់លោកប្រធានាធិបតី សហរដ្ឋអាម៉េរិក បារ៉ាក់ អូបាម៉ា គឺ លោក អ៊ីវ៉ាន មេឌារ៉ូស បានមកបំពេញ ទស្សនកិច្ចនៅប្រទេស វៀតណាម ហើយបានជួប ពិភាក្សាទ្វេភាគីជាមួយនឹងលោកឧបនាយករដ្ឋមន្ត្រី និង ជារដ្ឋមន្ត្រីការបរទេសវៀតណាម ផាម ប៊ិញមិញ ជុំវិញបញ្ហាសំខាន់ជាច្រើន ជាពិសេសក៏រួមមានភាពជាដៃគូ TTP ផងដែរ។ ទីភ្នាក់ងារព័ត៌មានចិនស៊ិនហួ បានចេញផ្សាយនៅថ្ងៃអង្គារ ទី១៥ ខែកក្កដា ឆ្នាំ ២០១៤ នេះថា អំឡុងពេលដំណើរទស្សន កិច្ចរបស់លោក អ៊ីវ៉ាន នៅវៀតណាម កាលពីថ្ងៃចន្ទ ម្សិលមិញនេះ លោកបានពាំនាំ
យកមកនូវសេចក្តីផ្តាំផ្ញើពីសំណាក់លោក បារ៉ាក់ អូបាម៉ា ជូនចំពោះប្រទេស វៀតណាម ក្នុងឱកាសរំលឹកខួបនៃចំណងទាក់ទងទ្វេភាគី រវាងប្រទេសអតីតជា សត្រូវស៊ីសាច់ ហុតឈាមគ្នា កាលពីអំឡុងទសវត្សរ៍ ១៩៦០ និង ១៩៧០ ទាំងពីរនេះ។ សារព័ត៌មានវៀតណាម បានចេញផ្សាយផងដែរថា ដំណើរទស្សនកិច្ចរបស់ប្រេសិតពិសេស អាម៉េរិក មកកាន់ប្រទេស របស់ខ្លួន ពេលនេះ មានគោលដៅតែមួយគត់ គឺពង្រឹងនិងពង្រីក ទំនាក់ទំនងជាយុទ្ធសាស្ត្រទេ្វភាគី ដើម្បី សន្តិភាព, ស្ថិរភាព, និង កិច្ចសហប្រតិបត្តិការ ដើម្បី ការអភិវឌ្ឍនៅតំបន់អាស៊ី ប៉ាស៊ីហ្វិក និង ពិភពលោកទាំងមូល។
គួរបញ្ជាក់ថា ពិភពលោកបានមើលឃើញពីជំហរអាម៉េរិក ក្នុងការគាំទ្រប្រទេសហ្វីលីពីន និង វៀតណាមជានិច្ច ចំពោះបញ្ហាសមុទ្រចិនខាងត្បូង ដើម្បីទប់ទល់នឹងចិន ហើយវត្តមានមន្ត្រី ជាន់ខ្ពស់អាម៉េរិកពេលនេះ សហរដ្ឋអាម៉េរិក កំពុងតែបញ្ចុះបញ្ចូលឲ្យវៀតណាម ចូលរួមនៅ ក្នុងស្ថាប័នដៃគូយុទ្ធសាស្ត្រឆ្លងកាត់តំបន់ប៉ាស៊ីហ្វិក (TPP) ដើម្បីបង្កើតកិច្ចការពារសន្តិភាព និង ការអភិវឌ្ឍបន្ថែមទៀតនៅក្នុងតំបន់។
