បន្ទាយមានជ័យ ៖ ស្រុកមង្គលបូរី ខេត្តបន្ទាយមានជ័យកាលពីវេលាម៉ោង៤ទាបភ្លឺថ្ងៃទី១៦ កក្កដា ២០១៤ ស្ត្រីម្នាក់ត្រូវបានរថយន្តបុកស្លាប់ខណៈពេលដើរឆ្លងផ្លូវនៅតានបណ្តោយផ្លូវជាតិលេខ៥ មុខវត្តនិវេសន៍ ភូមិសាលាដែង ឃុំឫស្សីក្រោក និងបុរសវ័យ៥៤ឆ្នាំម្នាក់ទៀត ដោយសារតែការតូចចិត្តខ្លួនឯងមានជម្ងឺប្រចាំកាយ និងរ៉ាំរ៉ៃ បានដាច់ចិត្តចងក ដោយប្រើខ្សែអង្រឹងធ្វើអត្តឃាតខ្លួនឯងនៅលើដើមអំពិលទឹកក្បែរផ្ទះ នៅភូមិកោះកែវ ឃុំឫស្សីក្រោក ។
លោករស់ សំបូរ មេបញ្ជាការកងរាជអាវុធហត្ថស្រុកមង្គលបូរីបានអោយដឹងថាគ្មាននរណាម្នាក់អាចកំណត់ពីអត្ត សញ្ញាណរបស់ជនរងគ្រោះបានឡើយ ព្រោះជនរងគ្រោះរូបនេះជាជនអនាថា (វិកលចរិត) តែបានមកស្នាក់នៅក្នុងវត្តនិវេសន៍បាន២ទៅ៣ថ្ងៃមកហើយ។ ចំពោះរថយន្តបង្កវិញក្រោយកើតហេតុក៏បានធ្វើការបើករត់គេចខ្លួនបាត់ស្រមោលដោយមិនដឹងថា ម៉ាកអ្វី ពណ៌អ្វី និងបើកបរពីទិសណាទៅទិសណាទេ ដោយសារតែហេតុការណ៍នេះកើតឡើងនៅពេលទាបភ្លឺ និងមិនសូវមានអ្នកធ្វើដំណើរទើបគ្មានសាក្សីណាឃើញហេតុការណ៍។
ចំពោះបុរសដែលធ្វើអត្តឃាតខ្លួនឯងខាងលើមានឈ្មោះ វ៉ាន់ ឌី ភេទប្រុស អាយុ៥៤ឆ្នាំ មានទីលំនៅក្នុងភូមិ-ឃុំ កើតហេតុខាងលើជាជនដែលមានជម្ងឺរ៉ាំរ៉ៃជាប់នឹងខ្លួនច្រើនឆ្នាំមកហើយ កាលរស់នៅទៅណាមកណាអាស្រ័យលើឈើច្រត់។ តាមការធ្វើកោសល្យវិច័យទៅលើសពជនរងគ្រោះ សមត្ថកិច្ចបញ្ជាក់អោយដឹងថា ជនរងគ្រោះពិតជាបានធ្វើអត្តឃាតដោយចងក សម្លាប់ខ្លួនឯងមែន។ សពជនរងគ្រោះត្រូវបានបញ្ជូនទៅអោយក្រុមគ្រួសារចាត់ចែងធ្វើបុណ្យតាមប្រពៃណីក្រោយពិនិត្យរួច៕ដោយ:ឃិន គន្ធា 
