កំពង់ធំ៖ បទល្មើសបានកើនឡើងជាលំដាប់ បន្ទាប់ពីឈានដល់រដូវត្រីពងកូន ដោយពុំមានការទប់ស្កាត់ បង្ក្រាបបទល្មើសនេសាទនោះឡើយ ក្នុងនោះបទល្មើសដាក់របាំងសាច់ របាំងស្បៃមុង និងរុញស៊ីប ព្រមទាំង ការលបលួចចិញ្ចឹមកូនត្រីឆ្តោរ កំពុងតែកើតមានឡើងយ៉ាងពេញបន្ទុក ស្ថិតនៅក្នុងឃុំពាមបាង ស្រុកស្ទោង ខេត្តកំពង់ធំ ក្រោមដែនគ្រប់គ្រងដោយលោក ហូន ផល នាយសង្កាត់រដ្ឋបាលជលផលពាមបាង។ ជាក់ស្តែងបទល្មើសកំពុងតែធ្វើសកម្មភាព យ៉ាងគគ្រឹកគ្រេងរីកដុះដាលដូចផ្សិត ស្ថិតនៅក្នុងភូមិសាស្ត្រពាម បាង ដែលត្រូវបានគេដឹងថា បណ្តាលមកពីការឃុបឃិតបើកភ្លើងខៀវ ពីសំណាក់នាយសង្កាត់រដ្ឋបាលជលផលពាមបាង និងបរិស្ថានក្នុងបឹងទន្លេច្មារ ដែលពុំមានឆន្ទះក្នុងការបង្ក្រាបបទល្មើស បែបជាមានការបណ្តែត បណ្តោយឲ្យមានការ ប្រើប្រាស់ឧបករណ៍នេសាទដោយខុសច្បាប់ ។
យោងតាមប្រភពពត៌មានពីប្រជាពលរដ្ឋបានឲ្យដឹងថា វាជាការពិតណាស់បទល្មើសបានកើតឡើងយ៉ាងពេញបន្ទុក តែនៅពេលដែលមានការចុះត្រួតពិនិត្យ ពីសំណាក់កំលាំងសមត្ថកិច្ចម្តងម្កាល ក៏ត្រូវបានបណ្តាញដែលធ្លាប់បានទទួលលាភស្ការៈ បោះដៃឲ្យក្រុមបក្សពួកឈ្មួញជាមុន ហើយក្រុមសមត្ថកិច្ចដែលត្រូវបាន ចុះទៅបង្ក្រាបនោះ ត្រូវបានគេវាស់ផែនទីឲ្យដើរតាមគន្លង រួចជាស្រេច ការធ្វើបែបនេះគឺជាការបញ្ជ្រៀសមិន ឲ្យកំលាំងសមត្ថកិច្ចដែលចុះទៅបង្ក្រាប មិនឲ្យជួបនូវបទល្មើសដោយមិនបានគ្រងទុក សម្រាប់បទល្មើស ដែលត្រូវបានបង្ក្រាប ត្រូវបានគេបង្វៀងឲ្យទៅបង្ក្រាបកន្លែងដែលរៀបចំទុក ។
ប្រភពបានបន្តថា ករណីដែលជួបប្រទះបទល្មើសដោយចៃដន្យ របាំងបទល្មើលនោះតែងតែកាត់តែចំណង ទំលាក់ចូលទឹក ហើយក៏បើកការណូតចេញទៅបាត់ ដោយពុំមានការស្រាវបទល្មើស ឬកាប់បំផ្លាញនោះទេ ទង្វើបែបនេះគឺជាការផ្តល់ឳកាសឲ្យ ជនល្មើសប្រព្រឹត្តដោយពុំមានការរាងចាល ពាក់ព័ន្ឋទៅនិងបញ្ហាចោទ ប្រកាន់នេះ អ្នកយកពត៌មានពុំអាចធ្វើការទំនាក់ទំនងទៅលោក ហួន ផល នាយសង្កាត់ពាមបាងបានទេ ។
ពាក់ព័ន្ឋទៅនិងការចោទប្រកាន់ សមត្ថកិច្ចជលផលមានការឃុបឃិតគ្នា ជាមួយនិងក្រុមជនល្មើលលបលួច ប្រើប្រាស់ឧបករណ៍នេសាទ ដែលត្រូវបានច្បាប់ហាមឃាត់ ប្រជាពលរដ្ឋបានសំណូមពរឲ្យ លោក ណៅ ធួក ប្រតិភូរាជរដ្ឋាភិបាល និងជាប្រធានរដ្ឋបាលជលផល ជួយទប់ស្កាត់បន្ថែមលើការនេសាទត្រីក្នុងរដូវត្រីពងកូន ដែលជារដូវហាមឃាត់ បើពុំដូច្នោះទេ ធនធានមឆ្ឆាជាតិនិងខ្សត់ខ្សោយ ដាច់ពូជជាមិនខានឡើយ ។
