កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នាព្រឹកថ្ងៃទី២៤ ខែមករា ឆ្នាំ២០២០នេះ បានដឹកនាំកិច្ចប្រជុំរៀបចំយន្តការ ដើម្បីពង្រឹងប្រសិទ្ធភាពក្នុងការថែទាំសៅ និងដើមឈើ ដែលបានដាំលម្អលើ
ទ្រូងផ្លូវជាតិលេខ៦ ស្ថិតនៅក្នុងស្រុកជើងព្រៃ និងស្រុកបាធាយ ខេត្តកំពង់ចាម។
ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា ការថែសួនច្បារ នៅតាមបណ្ដោយផ្លូវជាតិលេខ ៦ ពីមុនស្ថិតនៅក្រោមការគ្រប់គ្រងថែទាំរបស់ក្រសួងសាធារណការ និងដឹកជញ្ជូន និងមន្ទីរសាធារណការខេត្ត ប៉ុន្តែឥឡូវនេះ អាជ្ញាធរខេត្ត បានដាក់ចេញនូវវិធានការដោយបង្កើតគណៈកម្មការ ថែទាំបណ្តោះអាសន្នក្នុងរដូវប្រាំង ចាប់ផ្ដើមពីពេលនេះតទៅ ដោយត្រូវចំណាយថវិការបស់រដ្ឋបាលខេត្ត ហើយត្រូវធ្វើរបាយការណ៍ទៅក្រសួងសាធារណការ និងដឹកជញ្ជូន ផងដែរ។
ឯកឧត្តមអភិបាលខេត្តបានឲ្យដឹងទៀតថា ការស្ដារឡើងវិញ នូវសួនច្បារដែលបានរងការខូចខាត គឺត្រូវធ្វើការថែទាំឲ្យបានម៉ត់ចត់ ដោយត្រូវបានចាត់ចែងការស្រោចទឹកឲ្យបានត្រឹមត្រូវជាប្រចាំ ដើម្បីលើកកម្ពស់សណ្តាប់ធ្នាប់ សោភ័ណ្ឌភាពតាមដងផ្លូវ ក្នុងគោលបំណងបង្កើនសុខដុមនីយកម្មក្នុងសង្គមជាតិរបស់យើងឲ្យកាន់តែប្រសើរឡើងថែមទៀត ៕
