ព្រះវិហារ៖ គ្រាប់មីនចាស់សល់ពីសម័យសង្គ្រាម បានផ្តាច់យកជីវិតមន្ត្រីយោធាម្នាក់ ខណៈពេលកំពុងបំពេញការងារ ចុះល្បាតតាមភូមិសាស្ត្រខ្សែត្រៀមជួរមុខបណ្តោយព្រំដែនកម្ពុជា.ថៃ ក្នុងទឹសទី១ប្រាសាទព្រះវិហារ ។
ហេតុការណ៍ផ្ទះគ្រាប់មីននេះ បានកើតឡើងកាលពីវេលាម៉ោង១២.១០នាទី ថ្ងៃទី១៤ ខែកុម្ភះ ឆ្នាំ២០២០ ក្នុងភូមិសាស្ត្រភ្នំ៣៩៨ ខាងត្បូងអន្លង់រាំងជើងភ្នំ៥០០ ស្ថិតក្នុងភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ ។
លោកអនុសេនីយ៍ទោ សុឹម ស៊ុន មេបញ្ជាការកងអនុសេនាតូច២ កងអនុសេនាធំទី៣ បានបញ្ជាក់ថា នៅមុនពេលហេតុការណ៍កើតឡើង លោកបានដឹកនាំកម្លាំងចំនួន៤នាក់ ដោយសហការជាមួយកម្លាំងនគរបាលអង្គភាពវរសេនាតូចលេខ១០៥ ចេញល្បាតតាមចំណុចខ្សែត្រៀមជួរមុខកម្ពុជា.ថៃ ក្នុងភូមិសាស្ត្រភ្នំ៣៩៨ លុះត្រឡប់មកវិញជិតដល់ទីតាំង ជនរងគ្រោះសុំដើកាត់មកកាន់កន្លែងមុន ក្រោយពីធ្វើដំណើរចេញពីផ្លូវល្បាតបានប្រវែង៥០ម៉ែត្រ ជនរងគ្រោះក៏បានជាន់លើគ្រាប់មីនចាស់ ដែលសេះសល់ពីសម័យសង្គ្រាមបណ្តាលឲ្យផ្ទុះស្លាប់នៅនិងកន្លែងយ៉ាងអាណោចអធ័ម ។
លោកអនុសេនីយ៍ទោ សុឹម ស៊ុន ក៏បានឲ្យដឹងដែរថា មន្ត្រីយោធាដែលរងគ្រោះមានឈ្មោះព្រិន្ទបាលឯក ជិត ហាត់ មេក្រុមកងអនុសេនាធំទី៣ ក្នុងអង្គភាពវរសេនាតូច៣៨៥ ចំណុះកងពលតូចអន្តរាគមន៍លេខ៨ ។
លោកថាបច្ចុប្បន្នសាកសពជនរងគ្រោះ ត្រូវបានអង្គភាពដឹកនាំយកមករៀបចំធ្វើបុណ្យ ឧទ្ទិសកុសលជូនដល់ដួងវិញ្ញាណក្ខន្ធសព ទៅតាមប្រពៃណី នៅភូមិចំបក់សែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ ក្រោមការយកចិត្តទុក្ខដាក់ខ្ពស់ពីសំណាក់ឯកឧត្តម មេបញ្ជាការ មេបញ្ជាការរង ព្រមទាំងកងកម្លាំង នៃបណ្ដាអង្គភាពចំណុះទូទាំងកងពលតូចអន្តរាគមន៍លេខ៨៕សួនលីណា
