ព្រះវិហារ៖ គិតត្រឹមថ្ងៃទី១១ ខែកុម្ភះ ឆ្នាំ២០២០ ក្រុមហ៊ុន ThaiWha តាមរយៈសាជីវកម្មសហគមន៍កសិកម្មកម្ពុជា CACC បានប្រមូលទិញដំឡូងមីសរីរាង្គ ពីប្រជាសហគមន៍អនុវត្តកសិកម្មតាមកិច្ចសន្យា នៃប្រជាសហគមន៍ខេត្តព្រះវិហារ ហើយដឹកចេញប្រមាណជិត៥.០០០តោន ។
ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ លោកពឹង ទ្រីដា បានឱ្យដឹងថាលោកអរគុណដល់សមាជិក សហគមន៌ទាំងអស់ ដែលបានចូលរួម នៅក្នុងការខិតខំប្រឹងប្រែងផលិត នូវដំណាំដំឡូងមីសរីរាង្គបានយ៉ាងល្អ និងត្រឹមត្រូវតាមការកំណត់ជូនក្រុមហ៊ុន ធ្វើឲ្យទទួលបានតម្លៃល្អ សម្រាប់ដំឡូងមីស្រស់ចាប់ពី ៣៧៤ ទៅ៣៩០រៀល ក្នុងមួយគីឡូក្រាម ។
លោកពឹង ទ្រីដា សម្រាប់ឆ្នាំ២០១៩ និងឆ្នាំ២០២០នេះ នៅទូទាំងខេត្តព្រះវិហារ មានសហគមន៍កសិកម្មចំនួន ៨ដែលបានចុះកិច្ចសន្យាលក់ដំឡូងមីសរីរាង្គជូនក្រុមហ៊ុនThaiWha តាមរយៈសាជីវកម្មសហគមន៍កសិកម្មកម្ពុជា CACC ។
លោកថា កសិករដែលបានចុះកិច្ចសន្យាកសិកម្មសរីរាង្គ រឺអេសអភីជាមួយក្រុមហ៊ុនអេមរូរាយស៍ (AmruRice) រឺក្រុមហ៊ុនស៊ីអេស៊ីសី (CACC) ដែលជាបុត្រសម្ព័ន្ធ របស់អេមរូរាយស៍ តែងតែទទួលបានតម្លៃល្អ ។
លោកពឹង ទ្រីដា ប្រធានមន្ទីរកសិកម្ម បានបន្តថាមានបងប្អូនជាច្រើនដែលតែងតែសួរលោកថាហេតុអ្វីតម្លៃស្រូវធ្លាក់ចុះខ្លាំង? ហើយតើត្រូវធ្វើដូចម្តេច? លោកប្រធានបានបញ្ជាក់ថា ១,កសិករមានទីផ្សារស្រាប់មិនភ័យខ្លាចឈ្មួញក្រឡុក។ ២,កសិករទទួលបានជំនួយបច្ចេកទេសនិងចំណេះដឹងផ្សេងៗ។ ៣,កសិករទទួលបានកម្ចីពីស្ថាប័នហិរញ្ញវត្ថុដែលមានអត្រាការប្រាក់សមរម្យ។
៤,កសិករផលិតនូវស្រូវឬដំឡូងមីដែលទីផ្សារត្រូវការនិងតាមស្តង់ដាការនាំចេញ៕សួនលីណា
