កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានអះអាងថា សមិទ្ធផលថ្មីៗ ដែលជាចំណងដៃប្រវត្តិសាស្ត្រ និងជាចំណងដៃនៃក្ដីស្រឡាញ់ បានកើតមានឡើងជាបន្តបន្ទាប់ ដោយសារប្រទេសជាតិយើងមានសុខសន្តិភាព។ ការថ្លែងយ៉ាងដូច្នេះក្នុងពិធីសម្ពោធដាក់ឲ្យប្រើប្រាស់ ផ្លូវបេតុង ២ ខ្សែប្រវែងជាង៥០០០ម៉ែត្រ និងសាលារៀនមួយខ្នងមាន៥បន្ទប់ ស្ថិតនៅក្នុងភូមិមេមាំង ឃុំល្វា ស្រុកព្រៃឈរ ខេត្តកំពង់ចាម នាព្រឹកថ្ងៃទី២២ ខែកុម្ភៈ ឆ្នាំ២០២០ ។
ឆ្លៀតក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងថា ក្រោមការដឹកនាំរបស់រាជរដ្ឋាភិបាល ដែលមានសម្ដេចអគ្គមហាសេនាបតី តេជោ ហ៊ុន សែនជាប្រមុខ បានខិតខំប្រឹងប្រែងក្នុងការកសាង នូវសុខសន្តិភាព ហើយនាំមកនូវការអភិវឌ្ឍ ក្នុងគោលដៅដើម្បីលើកកម្ពស់ កម្រិតជីវភាពរបស់ បងប្អូនប្រជាពលរដ្ឋ ។ 
ហើយការអភិវឌ្ឍន៍នេះ រាជរដ្ឋាភិបាលបានយកវិស័យផ្លូវថ្នល់ និងវិស័យធនធានមនុស្ស ជាវិស័យអតិភាព ក្នុងចំណោមវិស័យ ៤ ដែលរដ្ឋាភិបាល បានដាក់ចេញជាទិសដៅក្នុងការអភិវឌ្ឍ ។ 
ជាមួយគ្នានោះ ឯកឧត្តមអភិបាលខេត្ត បានថ្លែងqqថា សមិទ្ធផលថ្មីៗ ដែលជាចំណងដៃប្រវត្តិសាស្ត្រ និងជាចំណងដៃនៃក្ដីស្រឡាញ់ បានកើតមានឡើងជាបន្តបន្ទាប់ ដោយសារប្រទេសជាតិយើងមានសុខសន្តិភាព។ ជាក់ស្ដែងដូចជានៅថ្ងៃនេះ សមិទ្ធផលដែលប្រជាពលរដ្ឋយើង នឹកស្មានមិនដល់ គឺផ្លូវបេតុង២ខ្សែ ប្រវែងជាង៥០០០ម៉ែត្រ ទទឹងប្រវែង៦ម៉ែត្រ ត្រូវបានស្ថាបនារួច រាល់ជាស្ថាពរ និងសាលារៀន១ខ្នង មាន៥ បន្ទប់ ត្រូវបានសម្ពោធដាក់ឲ្យប្រើប្រាស់នាពេលនេះ។ 
ម្យ៉ាងទៀត សន្តិភាពនាំមកនូវតម្លៃ ធ្វើឲ្យបងប្អូនប្រជាពលរដ្ឋយើង បានរស់នៅជួបជុំសាច់ញាតិ ប្រកបការងារ ដោយសុខដុមរមនាគ្រប់ៗ ។
ទន្ទឹមនឹងនោះ រាជរដ្ឋាភិបាល បានរៀបចំ កិច្ចការរដ្ឋបាលច្រកចេញចូលតែមួយ ដើម្បីសម្រួលដល់ការបំរើសេវាជូនដល់បងប្អូនប្រជាពលរដ្ឋយើង។ ជាមួយគ្នានេះ អាជ្ញាធរគ្រប់លំដាប់ថ្នាក់ បានរួមគ្នា រងចាំជួយដោះស្រាយ នូវបញ្ហានានា ជូនប្រជា ពលរដ្ឋយើងផងដែរ ៕
