កំពង់ធំ= ក្រោយសកម្មភាពដឹកជញ្ជូនឈើនៅក្នុងខេត្តកំពង់ធំ បានស្ងាត់ទៅមួយដង្ហើមចង្រិត រហូតមកដល់ពេលនេះ បទល្មើសព្រៃឈើ បានកំរើកសារជាថ្មី ក្រោមការដឹកជញ្ជូនជាលក្ខណៈបង្កប់ក្នុងរថយន្ត ដឹកអេតចាយ យកមកស្តប់ នៅតាមផ្ទះ លុះនៅពេលយប់ បទល្មើសនឹងត្រូវបានដឹកចេញជាបន្តបន្ទាប់ តែទោះជាមានសភាពលបលួចបែបនេះក្តី ក៏គណៈបញ្ជាការឯកភាពខេត្ត ដែលបានឯកឧត្តម អ៊ុត សំអន អភិបាលខេត្តកំពង់ធំ និងជាប្រធានគណៈបញ្ជាការឯក ភាពខេត្ត បានគាំទ្រនិងជម្រុញឲ្យមានការ បង្ក្រាបបទល្មើសដែលបានធ្វើសកម្មភាពដឹកបទល្មើសដោយខុសច្បាប់។
ជាក់ស្តែងលោក សាយ ណូរ៉ា ព្រះរាជអាជ្ញារងអមសាលាដំបូង ខេត្តកំពង់ធំ បានដឹកនាំកំលាំងចម្រុះ ឆែកទីតាំងស្តប់ ឈើមួយកន្លែងស្ថិតនៅ ក្នុងភូមិព្រៃពន្លិច សង្កាតអាចារ្យលាក់ ក្រុងស្ទឹងសែន ខេត្តកំពង់ធំ ដោយមានការឯកភាពពី លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ កាលពីរព្រឹក ថ្ងៃទី១៨ ខែកក្កដា ឆ្នាំ២០១៤ តាមការអោយដឹងពីសមត្ថកិច្ចមូលដ្ឋាន បានឲ្យដឹងថា ទីតាំងស្តប់ឈើខាងលើជាផ្ទះរបស់ឈ្មោះ រៀល នុន ជាប្ដីអាយុ ៧៣ឆ្នាំ ជាគ្រូបង្រៀនចូលនិវត្តន៍និង ប្រពន្ធឈ្មោះ នី បុប្ឋាវី អាយុ ៤៦ឆ្នាំ មានមុខរបរជាអ្នកទិញអេតចាយជារៀងរាល់ ថ្ងៃផ្ទះនេះតែងតែដឹកអេតចាយ តែប្រហែលជាមុខរបរដឹកអេតចាយ មិនសូវកាក់កប បានជាប្រែគំនិតដឹកអេតចាយពី លើឈើ
ពីក្រោម និងសូមបញ្ជាក់ផងដែរថា ទីតាំងស្តប់ឈើនេះ ត្រូវបានព្រះរាជអាជ្ញារង ចុះមកធ្វើកិច្ចសន្យា២ដង រួចមកហើយ ដើម្បីឲ្យបញ្ឈប់នូវការជួញដូរឈើ ដោយគំនរឈើប្រមាណជិត៣០០ដុំ ត្រូវរក្សាទុកនៅក្នុងផ្ទះហាមដឹកចូល បន្តទៀត តែម្ចាស់ផ្ទះបានលបលួចដឹកចូលដឹកចេញស្ទើរតែជារៀងរាល់យប់ ចំនែកចំនួនឈើដែលធ្លាប់ធ្វើកិច្ចសន្យា គឺនៅដដែល ថែមទាំងមានការអួតអាងថា ពុំមាននណារហ៊ានបង្ក្រាបទីតាំងរបស់គាត់បានដែរ ព្រោះមានខ្នងខ្សែកាប នៅពីក្រោយ លុះដល់បង្ក្រាបនេះសមត្ថកិច្ចបានប្រមូលគ្មានសល់ យកទៅរក្សាទុកនៅផ្នែករដ្ឋបាល
ព្រៃឈើស្ទោង។
សកម្មភាពបង្ក្រាបបទល្មើសព្រៃឈើ ដែលបានស្តប់ទុកនេះ សមត្ថកិច្ចរឹបអូសបានឈើចំនួន ៣០២ដុំ ប្រភេទឈើធ្នង់ ព្រមទាំងសន្លឹកនីវជាង២០០សន្លឹក ឈើបន្ទះជាច្រើនសន្លឹកផងដែរ ។ ដោយឡែកនៅក្នុងថ្ងៃដដែល សមត្ថកិច្ចមេព្រៃ បានរឹបអូសបានរថយន្ត ប្រភេទ សាំយ៉ុង មួយគ្រឿង ពណ៌ សរ អត់ស្លាកលេខ បានលួចដឹកឈើធ្នង់ ចេញពីខេត្តព្រះ វិហារ ឆ្លងកាត់ខេត្តកំពង់ធំ ក៏ត្រូវបានសមត្ថកិច្ច តាមប្រមាញ់ស្ទាក់ចាប់បាននៅ ចំនុចភូមិ ស្រយូវ សង្កាត់ស្រយូវ ក្រុង ស្ទឹងសែន ខេត្តកំពង់ធំ តៃកុងឡានក្រោយពីដឹងខ្លួនថាមាន សមត្ថកិច្ចតាមពីក្រោយ ក៏សម្រេចបើកចូលផ្ទះអ្នកភូមិ បង្ករឲ្យម្ចាស់ផ្ទះមានការភិតភ័យ ស្រឡាំងកាំង ដោយសារមិនដឹងមូលហេតុ នឹងសាច់រឿងពាក់ព័ន្ឋទៅនឹង
ជនល្មើស ទីបំផុតតែកុងឡានចតរថយន្តដោយមិនបានផ្ញើរនឹងម្ចាស់ផ្ទះហើយ ក៏រត់ដាក់មេប្រូចដោយសុវត្តិភាព បន្សល់ទុករថយន្ត ឲ្យសមត្ថកិច្ច យកទៅរក្សាទុកនៅផ្នែករដ្ឋបាលព្រៃឈើស្ទោង ដើម្បីរងចាំធ្វើការវាស់វែង រហូតមកដល់ខណៈនេះដោយសារតែ សមត្ថកិច្ចជាប់ភារៈកិច្ចក្នុងការបង្ក្រាបបទល្មើសជាច្រើនកន្លែង ទើបពុំទាន់បានធ្វើការវាស់វែងនៅឡើយ ក្នុងនោះដែរមហាជនទូទៅ បានកោតសរសើរចំពោះសមត្ថកិច្ចចម្រុះបានធ្វើការបង្ក្រាបស្មើរភាពគ្នា ដោយពុំមានការ លំអៀង មិនថាអាងខ្នងប៉ុន្មានក៏ចាប់គ្មានសល់ ហើយរងចាំដោះស្រាយគ្នាតាមផ្លូវច្បាប់ ។
