ខេត្តកំពង់ឆ្នាំង ៖ អនុវត្តតាមបទបញ្ជាលេខ០១ ប.ប របស់រាជរដ្ឋាភិបាលកម្ពុជា រួមនិងអនុសាសន៍៧ចំណុចរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងដោយមានការចង្អុលបង្ហាញ ពីរដ្ឋបាលជលផល ឯកឧត្តមអភិបាលខេត្ត និងជាប្រធានគណៈបញ្ជាការឯកភាពខេត្ត នៅព្រឹកថ្ងៃទី១៧ ដល់ថ្ងៃទី១៨ ខែកក្កដា ឆ្នាំ២០១៤ ក្រោមការចាត់តាំងនិងបញ្ជា ដឹកនាំផ្ទាល់ពីលោក សេង ប៊ុន
ឈឿន នាយខ័ណ្ឌរដ្ឋបាលជលផល ខេត្តកំពង់ឆ្នាំង និងមានការចូលរួមដោយកម្លាំងសង្កាត់រដ្ឋបាលជលផល កំពង់លែង សហគមន៍នេសាទអន្លង់កញ្ចុះ និងសហគមន៍នេសាទច្រណូក រួមនិងអាជ្ញាធរមូលដ្ឋាន បានចុះបង្ក្រាបបទល្មើសនេសាទនារដូវបិទនេសាទនេះ ក្នុងភូមិសាស្ត្រទឹកដីស្រុកកំពង់លែង ខេត្តកំពង់ឆ្នាំង ដែលមានកម្លាំងសរុប២០នាក់ មធ្យោបាយបាឡាចំនួន៥គ្រឿង ។ ជាលទ្ធផល កម្លាំងចម្រុះរដ្ឋបាលជលផល ក្នុងយុទ្ធនាការបង្ក្រាបខាងលើនេះ បង្ក្រាបបានដោយរុះរើរបាំងសាច់អួនចំនួន៤កន្លែង ស្មើ៨០០ម៉ែត្រ លបលូចំនួន១១មាត់ បង្គោលចំនួន៤០០ដើម និងចាក់លែងកូនត្រីចំនួន៥០គីឡូក្រាម ចូលទៅក្នុងបឹងធម្មជាតិវិញ ។ 
លោក សេង ប៊ុនឈឿន នាយខណ្ឌរដ្ឋបាលជលផល កំពង់ឆ្នាំង នាឱកាសនោះ បានធ្វើការផ្សព្វផ្សាយ និងណែនាំច្បាប់ស្តីពីជលផល ដល់ក្រុមអ្នកនេសាទនៅទីនោះ សូមធ្វើការនេសាទជៀសវាងប្រើឧបករណ៍ខុសច្បាប់ ដោយអនុវត្តតាមប្រកាសលេខ៤៥៨ ក.ស.ក ស្តីពីការប្រើប្រាស់ឧបករណ៍នេសាទ ជាលក្ខណៈគ្រួសារ និងជៀសវាងធ្វើការនេសាទក្នុងដែនអភិរក្ស ដែលជាហេតុនាំអោយជាប់ទោសទណ្ឌ ។
សូមអោយមានការគោរពច្បាប់ជលផលទាំងអស់គ្នា នាំអោយមានការកើនឡើងវិញ នូវមច្ឆាជាតិទុកសម្រាប់កូនចៅជំនាន់ក្រោយ និងសូមរាយការណ៍ជូនសមត្ថកិច្ចមូលដ្ឋាន ក៍ដូចជាសមត្ថកិច្ចជំនាញ ក្នុងករណីជួបបទល្មើស អោយបានទាន់ពេលវេលាផងដែរ ។ ក្នុងនោះផងដែរ លោក សេង ប៊ុនឈឿន បានចាត់តាំងលោក លី ឡា នាយរងខណ្ឌ ចុះទៅផ្សព្វផ្សាយច្បាប់ស្តីពីជលផល នៅក្នុងឃុំផ្លូវទូក ស្រុកកំពង់លែង និងលោក សោម ភារុណ នាយរងខណ្ឌ ចុះទៅផ្សព្វផ្សាយច្បាប់ស្តីពីជលផល នៅភូមិកន្លែងភេ ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង ដល់សហគមន៍នេសាទ និងប្រជាពលរដ្ឋ អោយបានយល់ដឹងកាន់តែច្បាស់ ស្តីពីច្បាប់ជលផលនាំរដូវបិទនេសាទ ៕
