កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានថ្លែងសំណូមពរដល់បងប្អូនប្រជាពលរដ្ឋ ឲ្យចូលរួមជាមួយនឹងអាជ្ញាធរមូលដ្ឋាន ដេីម្បីឈានទៅដល់ ការអនុវត្តន៍គោលនយោបាយភូមិឃុំមានសុវត្ថិភាព ដោយត្រូវទប់ស្កាត់បទល្មើស
គ្រឿងញៀន និងល្បែងស៊ីសងខុសច្បាប់គ្រប់ប្រភេទផងដែរ ការថ្លែងយ៉ាងដូច្នេះក្នុងឱកាសសម្ពោធដាក់ឲ្យប្រើប្រាស់ជាផ្លូវការ ផ្លូវបេតុង១ខ្សែប្រវែង ៥.០០០ម៉ែត្រ ដែលសរុបជាទឹកប្រាក់ប្រមាណជិត៣០ម៊ឺនដុល្លារ និងសមិទ្ធផលនានា នៅវត្តទួលច័ន្ទ ស្ថិតក្នុងភូមិស្វាយរក្ស ឃុំសូរសែន្យ ស្រុកព្រៃឈរ ខេត្តកំពង់ចាម នាព្រឹកថ្ងៃទី២ ខែមិនា ឆ្នាំ២០២០ ។
ឆ្លៀតក្នុងឱកាសនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានលើកឡើងថា វិស័យផ្លូវថ្នល់ គឺជាប៉ូលអាទិភាពមួយ ក្នុងចំណោមប៉ូលទាំង ៤ ដែលជាអាទមាន ៖ មនុស្ស ផ្លូវ ភ្លើង និងទឹក ។ យ៉ាងណាម៉ិញ ប្រមុខរាជរដ្ឋាភិបាល បានចាត់ទុកវិស័យផ្លូវថ្នល់ គឺជាវិស័យអាទិភាពមួយ ដែលនៅតែបន្តអនុវត្ត ដើម្បី ធ្វើការអភិវឌ្ឍនៅតាមមូលដ្ឋានជានិច្ច ។ ជាមួយនឹងកិច្ចអភិវឌ្ឍនេះដែរ រាជរដ្ឋាភិបាលកម្ពុជា បានបើកទូទាយ ឲ្យមានការចូលរួមចំណែកពីសប្បុរសជន និងអង្គការដៃគូអភិវឌ្ឍនានា ផងដែរ ។
ជាក់ស្ដែង សមិទ្ធផល ដែលត្រូវសម្ពោធដាក់ឲ្យប្រើប្រាស់ នាពេលនេះ គឺស្ថិតក្រោមការដឹកនាំកសាង ពីព្រះគ្រូចៅអធិការវត្ត ដែលបានចលនាបច្ច័យ ពីសំណាក់ប្រជាពលរដ្ឋ ពុទ្ធបរិស័ទគ្រប់ទិសទី ហើយត្រូវបានចំណាយថវិកាសន្ធឹកសន្ធាប់ ប្រមាណ ជិត ៣០ម៉ឺនដុល្លារអាមេរិក ឯណោះ ។
ជាមួយគ្នានោះដែរ ឯកឧត្ដមអភិបាលខេត្ត ក៏បានសំណូមពរដល់បងប្អូនប្រជាពលរដ្ឋទាំងអស់ ចូលរួមជាមួយអាជ្ញាធរ និងសមត្ថកិច្ចមូលដ្ឋាន អនុវត្តគោលនយោបាយ ភូមិ ឃុំ មានសុវត្ថិភាព ដើម្បី ភាពសុខដុមរមនា ក្នុងសហគមន៍ ផងដែរ ។ ទន្ទឹមនឹងនោះ ពេលនេះ យើងទាំងអស់គ្នា បានទទួលបានផ្លូវល្អសម្រាប់ប្រើប្រាស់ហើយ ដូច្នេះ សូមណែនាំ ដល់កូនចៅ របស់ខ្លួន ចូលរួមគោរពច្បាប់ចរាចរណ៍ នៅរាល់ពេលធ្វើដំណើរ ត្រូវពាក់មួក និងខ្សែក្រវ៉ាត់សុវត្ថិភាព ជានិច្ច ។
ជាមួយនោះ ក៏សូមអប់រំកូនចៅ ឲ្យជៀសចាក់ឆ្ងាយ ពីគ្រឿងញៀនគ្រប់ប្រភេទ ។ ដោយឡែក បច្ចុប្បន្ននេះ អាកាសធាតុក្ដៅហួតហែង សូមឲ្យបងប្អូនយកចិត្តទុកដាក់ខ្ពស់ អំពីសុខភាព និងប្រុងប្រយ័ត្នជានិច្ច អំពីបញ្ហាអគ្គិភ័យគ្រប់ប្រភេទ ដែលអាចបង្កគ្រោះឆេះផ្ទះ ផងដែរ ៕
