អ៊ុយក្រែនៈ បន្ទាប់ពីបាត់ដានយន្តហោះម៉ាឡេស៊ីកាលពីខែមីនា ពេលនេះយន្តហោះរបស់ក្រុមហ៊ុនអាកាសចរណ៍ម៉ាឡេស៊ី បានធ្លាក់នៅទឹកដីអ៊ុយក្រែន ក្បែរព្រំប្រទល់ដែនប្រទេសរុស្ស៊ីកាលពីថ្ងៃទី១៧ កក្កដា បណ្តាលឲ្យស្លាប់មនុស្សយ៉ាងហោចណាស់២៩៨នាក់ ដែលមហន្តរាយបង្កសោកនាដកម្មនេះត្រូវបានគេសង្ស័យថាមកពីត្រូវគ្រាប់មីស៊ីលដីអាកាស ហើយបណ្តាប្រទេសមហាអំណាចមួយចំនួនកំពុងចោទប្រកាន់គ្នានៅឡើយ។ 
នេះបើតាមវេបសាយបរទេស ទាំងដេលីមែល ក៏ដូចជាវេបសាយចិនឆាយណាដេលីនាថ្ងៃទី១៨ ខែកក្កដា ឆ្នាំ២០១៤ នេះ។ យោងតាមទីភ្នាក់ងារព័ត៌មានទាំងពីរនេះបានរាយការណ៍កាលពីថ្ងៃទី១៨ កក្កដា ថា យន្តហោះមួយគ្រឿងរបស់ក្រុមហ៊ុនអាកាសចរណ៍ម៉ាឡេស៊ី Malaysia Airlines MH17 ដែលដឹកអ្នកដំណើរ២៨០នាក់ និងសមាជិកក្រុមយានិក១៥នាក់ (ដេលីមែលថា២៩៨នាក់ ក្នុងនោះមានក្មេង១០០នាក់) បានធ្លាក់នៅប្រទេសអ៊ុយក្រែន ក្បែរព្រំដែនរុស្ស៊ី ។
អាជ្ញាធរអ៊ុយក្រែន និងហូឡង់បានឲ្យដឹងថា អ្នកស្លាប់បាត់បង់ជីវិតដោយសារការធ្លាក់យន្តហោះ (Flight MH17, a Boeing 777-200 aircraft on its way from Amsterdam to Kuala Lumpur) រួមមាន ជនជាតិហូឡង់ចំនួន154 នាក់ ម៉ាឡេស៊ី 45 នាក់ រួមទាំងអាកាសយានិក15 នាក់ផង អូស្ត្រាលី 27 នាក់ ឥណ្ឌូនេស៊ី 12 នាក់ អង់គ្លេស ៩នាក់ អាល្លឺម៉ង់៤នាក់ បែលហ្ស៊ិក៤នាក់ ហ្វីលីពីន៤នាក់ កាណាដា១នាក់ ឯ 41 មិនទាន់ស្គាល់អត្តសញ្ញាណទេ តែប្រភពខ្លះមាន រ៉យទ័រជាដើមផ្សាយថា មានជនជាតិអាមេរិក២៣នាក់ ក្នុងចំណោមអ្នកស្លាប់ដែរ។ 
លោកប្រធានាធិបតី អ៊ុយក្រែនភេត្រូ ប៉ូរ៉ូស្ហេនកូ (President Petro Poroshenko) បានចោទប្រកាន់លើក្រុមឧទ្ទាមជាអ្នកបង្កឡើង និងបានអំពាវនាវសុំឲ្យមានការស៊ើបអង្កេត ជាអន្តរជាតិមួយសម្រាប់ការធ្លាក់យន្តហោះម៉ាឡេស៊ីនេះ។ ប្រភពពីអាជ្ញាធរអ៊ុយក្រែន បានឲ្យដឹងថា បន្ទាប់ពីយន្តហោះធ្លាក់ គេឮការសន្ទនាគ្នារវាង មេបញ្ជាការកងកម្លាំងឧទ្ទាមគាំទ្ររុស្ស៊ី នៃសាធារណរដ្ឋប្រជាធិបតេយ្យដូណេតស្ក៍ Donetsk People's Republic និយាយតាមទូរស័ព្ទថា ពួកគេបានបាញ់យន្តហោះមួយកាលពី៣០នាទីមុន។ 
សូមបញ្ជាក់ថា យន្តហោះធុនប៊ូអ៊ីង៧៧៧នោះ របស់ក្រុមហ៊ុអាកាសចរណ៍ម៉ាឡេស៊ី បានហោះចេញពីទីក្រុងអាំស្ទែរដាម ទៅកាន់ទីក្រុងគូឡាឡាំពួ បានបន្ទាបខ្លួននៅកន្លែងមួយចម្ងាយ៥០គីឡូម៉ែត្រ ពីព្រំដែនអាកាសរុស្ស៊ី ហើយធ្លាក់នៅលើដែនដីអ៊ុយក្រែន ។ ដោយដកស្រង់ប្រភពព័ត៌មានរបស់អាជ្ញាធរអ៊ុយក្រែន បានរាយការណ៍ថា យន្តហោះ Flight MH17, a Boeing 777-200 នោះបានបាត់ដានពីរ៉ាដាពេលហោះហើរក្នុងកម្ពស់ ១០គីឡូម៉ែត្រ ហើយធ្លាក់នៅជិតទីក្រុង Chakhtarsk តំបន់ដូណេតស្ក៍ ភាគខាងកើតប្រទេសអ៊ុយក្រែន។ ក្រុមជួយសង្គ្រោះ បានប្រញាប់ទៅកាន់កន្លែងយន្តហោះធ្លាក់ផងដែរ ។ 
រដ្ឋមន្ត្រីមហាផ្ទៃអ៊ុយក្រែន លោក Anton Hersshchenko អះអាងថា អ្នកដំណើរទាំង២៨៣នាក់ និងសមាជិកក្រុមយានិកទាំង១៥នាក់ ត្រូវស្លាប់ទាំងអស់ ។ របាយការណ៍គូសបញ្ជាក់ម្យ៉ាងទៀតថា យន្តហោះនេះត្រូវបាញ់ធ្លាក់ដោយពួកជីវពលនៅភាគខាងកើតអ៊ុយក្រែនតែត្រូវបានបដិសេធភ្លាមៗដោយថ្នាក់ដឹកនាំនៃសាធារណរដ្ឋប្រជាមានិតស្វ័យប្រកាសដូណេតស្ក៍។ រដ្ឋាភិបាលអ៊ុយក្រែនបានចោទប្រកាន់ក្រុមបះបោរជា អ្នកបាញ់ទម្លាក់យន្តហោះខាងលើ ។ ចំណែកមេដឹកនាំក្រុមផ្តាច់ខ្លួនចោទប្រកាន់ទៅលើទាហានរដ្ឋាភិបាលអ៊ុយ ក្រែនវិញជាអ្នកបាញ់ទម្លាក់។ មេដឹកនាំក្រុមប្រឆាំងនៅភាគខាងត្បូងប្រទេសអ៊ុយក្រែនបានបញ្ជាក់ថា ក្រុមរបស់ខ្លួនគ្មានកាំជ្រូចមីស៊ីលដែលអាចបាញ់ទម្លាក់យន្តហោះ ដែលកំពុងហោះហើរក្នុងកម្ពស់ដល់ទៅ១ម៉ឺនម៉ែត្រនោះឡើយ។ប៉ុន្តែទាហានបះបោរនៅភាគខាងត្បូងធ្លាប់បានបង្ហាញកាំជ្រូចមីស៊ីលប្រភេទ Buk ដែលមានសមត្ថភាពអាចចាញ់ទម្លាក់ខាងលើបាន។ កាំជ្រូចមីស៊ីល នេះផលិតនៅក្នុងប្រទេសរុស្ស៊ី ។
ក្រុមប្រឹក្សាសន្តិសុខអ.ស.ប. បានកោះប្រជុំជាបន្ទាន់មួយស្តីពីយន្តហោះម៉ាឡេស៊ីដែលជួប គ្រោះថ្នាក់នៅលើដែនអាកាសអ៊ុយក្រែនសម្លាប់មនុស្សជិត៣០០នាក់ ។ ក្នុងពេលជាមួយគ្នានេះដែលអនុប្រធានាធិបតីអាមេរិក ចូប៉ៃឌិន បានជួបពិភាក្សាជាមួយប្រធានាធិបតីអ៊ុយក្រែន ពីគ្រោះថ្នាក់ខាងលើដោយសន្យាថា រដ្ឋាភិបាលក្រុងវ៉ាស៊ីនតោននឹងជួយជ្រោមជ្រែងស្រាវជ្រាវស្វែងរក មូលហេតុពិតពីសោកនាដកម្មនោះ ។ លោកប្រធានាធិបតីរុស្ស៊ី វ្វ្លាឌីមៀ ពូទីន បានផ្ញើសារចូលរួមមរណទុក្ខ និងថ្លែងថានៅលើទឹកដីអ៊ុយក្រែនគ្មានសន្តិភាព និងសុវត្ថិភាពទេ ខណៈប្រធានាធិបតីអាមេរិក បារ៉ាក់ អូបាម៉ា បានរិះគន់ដល់ទង្វើអ្នកបាញ់យន្តហោះស៊ីវិលបែបនេះ។
នេះជាករណីគ្រោះថ្នាក់ធ្លាក់ យន្តហោះលើកទី២ហើយរបស់ម៉ាឡេស៊ីដោយកាលពីលើកទី១MH370 ដែលដឹកមនុស្សរាប់រយនាកដែរនោះនៅមិនទាន់រក ឃើញនៅឡើយ ។ ហេតុការណ៍ខាងលើត្រូវបានគេសន្និដ្ឋានថា បណ្តាលមកពីអាកាសយានិកធ្វេសប្រហែសមិនស្តាប់តាមការបញ្ជាណែនាំពី ទីបញ្ជាការហោះហើរ ខណៈ អ្នកស្រាវជ្រាវអូស្ត្រាលី ក៏បាននិយាយថា យន្តហោះម៉ាឡេស៊ីមិនគួរហោះកាត់តីនោះទេ ស្របពេលដែលជើងហោះហើរជាច្រើនបានបង្វែរទិសដៅរបស់ខ្លួន ៕
