កំពង់ចាម: ឯកឧត្តមឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារ
រាជរដ្ឋាភិបាលចុះមូលដ្ឋានខេត្តកំពង់ចាម នាឱកាសប្រារព្ធពិធីបិទសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្តកំពង់ចាម និងក្រុមការងាររាជរដ្ឋាភិបាលចុះមូលដ្ឋាន កាលពីរសៀលថ្ងៃ៥ ខែមីនា ឆ្នាំ ២០២០នេះ លោកបានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំរដ្ឋបាលគ្រប់ជាន់ថ្នាក់ ក្រុមការងាររាជរដ្ឋាភិបាលចុះមូលដ្ឋាន មន្រ្តីរាជការ និងកងកម្លាំងមានសមត្ថកិច្ចទាំងអស់ ដែលឈរលើមូលដ្ឋានខេត្តកំពង់ចាម ដែលបានខិតខំអនុវត្តគោលនយោបាយរបស់រាជរដ្ឋាភិបាលប្រកបដោយការទទួលខុសត្រូវខ្ពស់ ក្នុងការអភិវឌ្ឍន៍ខេត្ត និងលើកកម្ពស់ជីវភាពរស់នៅរបស់ប្រជាជនយើង នៅគ្រប់ភូមិ ឃុំ សង្កាក់ទាំងអស់ក្នុងខេត្ត បានរួមគ្នាធ្វេីការតម្លៃអំពីសមិទ្ធិផលនានា ដែលរដ្ឋបាលខេត្ត និងក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម សម្រេចបានក្នុងឆ្នាំ២០១៩កន្លងទៅនេះ បញ្ហាប្រឈមដែលនៅសេសសល់ ដេីម្បីលេីកទិសដៅការងារឆ្នាំ២០២០ ដែលជាឆ្នាំទី២ នៃការអនុវត្តន៍យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។
ឯកឧត្តមឧបនាយករដ្ឋមន្រ្តី បានលើកឡើងដែរថា នៅមូលដ្ឋានខេត្តកំពង់ចាម យើងបានខិតខំរួមគ្នាដោះស្រាយសំណូមពរ និងបញ្ហាប្រឈមនានារបស់ប្រជាពលរដ្ឋ បានយ៉ាងល្អប្រសើរគួរជាទីមោទនៈ ក្នុងនោះបានទទួលខុសត្រូវខ្ពស់ ក្នុងការសំរេចបានសមិទ្ធិផលលើគ្រប់វិស័យ នៃការចូលរួមថែរក្សាសន្តិភាពកម្រិតនយោបាយការពារជាតិ សន្តិសុខ សណ្តាប់ធ្នាប់សាធារណៈ ដើម្បីលើកកម្ពស់លទ្ធិប្រជាធិបតេយ្យពហុបក្ស និងលើកកម្ពស់ការអភិវឌ្ឍសេដ្ឋកិច្ចសង្គម សំដៅលើកកម្ពស់កម្រិតជីវភាព និងកសរកាត់បន្ថយភាពក្រីក្ររបស់ប្រជាពលរដ្ឋផងដែរ។
ជាមួយគ្នានោះ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានជំរុញឲ្យមានការចូលរួមសហការ ការពារថែរក្សាសុខសន្តិភាព ស្ថិរភាពនយោបាយ សណ្ដាប់ធ្នាប់សង្គមជូនសង្គមជាតិ និងប្រជាពលរដ្ឋ ឲ្យបានល្អប្រសើរ ក្នុងការអនុវត្តគោលនយោបាយយុទ្ធ
សាស្ត្រចតុកោណដំណាក់កាលទី៤របស់រាជរដ្ឋាភិបាល ដោយបានអនុវត្តនយោបាយសំខាន់ៗប្រកបដោយនិរន្តភាពការងារនៃការអនុវត្តតួនាទីភារកិច្ចសម្រាប់ដឹកនាំ នៅថ្នាក់ក្រោមជាតិប្រកបដោយចីរភាពតាមវិស័យការងារដូចជាការងារអត្រានុកូលដ្ឋាន ការងារធ្វើអត្តសញ្ញាណកម្មគំរូថ្មី ការប្រយុទ្ធប្រឆាំងគ្រឿងញៀន យុទ្ធនាការសុវត្ថិភាពចរាចរណ៍ផ្លូវគោក អនុវត្តន៍គោលនយោបាយការងារភូមិឃុំមានសុវត្ថិភាព ផងដែរ ៕
