កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានថ្លែងអះអាងថា លោកគ្រូអ្នកគ្រូ គឺជាមាតាបិតាទី២របស់សិក្សានុសិស្ស លោក គឺជាអ្នកកសាងស្ពានចំណេះដឹងដល់សិស្ស ដែលយើងមានវាសនាខ្ពង់ខ្ពស់ដូចសព្វថ្ងៃនេះ ក៏ដោយសារគុណគ្រូបង្រៀន ដូច្នេះសូមឲ្យប្អូនៗជាសិស្សានុសិស្សត្រូវខិតខំសិក្សារៀនសូត្រ ត្រឹមរៀននៅសាលាមិនទាន់គ្រប់គ្រាន់នោះទេ គឺត្រូវរៀននៅផ្ទះបន្ថែមទៀត បន្ទាប់ពីជួយធ្វើការងារឪពុកម្ដាយ។ ការថ្លែងយ៉ាងដូច្នេះក្នុងឱកាសជួបសំណេះសំណាល និងរំលឹកគុណគ្រូ នាព្រឹកថ្ងៃទី០៨ ខែមិនា ឆ្នាំ២០២០ នៅវត្តមាន់ដប់ ស្ថិតនៅក្នុងឃុំមានជ័យ ស្រុកស្រីសន្ធរ ខេត្តកំពង់ចាម។
ថ្លែងក្នុងឱកាសនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានលើកឡើងថា ការជួបជុំគ្នាសប្បាយរីករាយនាពេលនេះ ព្រោះថាយើងមិនមានបញ្ហាអ្វីដែលត្រូវលំបាកទៀតទេ ក្រោមដំបូលនៃសុខសន្តិភាព ដែលយើងទទួលបានមកពីនយោបាយដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន ហ៊ុន នាយករដ្ឋមន្ត្រីកម្ពុជា បានផ្ដល់ជូននូវការអភិវឌ្ឍន៍រីកចម្រើនលេីគ្រប់វិស័យ នាំមកនូវជីវភាពរបស់បងប្អូនប្រជាពលរដ្ឋ មានការរីកចម្រើន ហើយការរីកចម្រើននេះហើយ ដែលធ្វើឲ្យលោកយាយលោកតា លោកគ្រូ អ្នកគ្រូ មានការសប្បាយចិត្ត ក្នុងការធ្វើបុណ្យកុសលរួមគ្នា ដេីម្បីផ្សារជាប់រវាងព្រះពុទ្ធសាសនា ជាមួយនឹងសង្គម។ 
ជាមួយគ្នានោះ ឯកឧត្តមអភិបាលខេត្ត បានថ្លែងក្រេីនរំលឹកដល់បងប្អូនប្រជាពលរដ្ឋផងដែរថា ដោយក្រសួងសុខាភិបាលកម្ពុជាបានបញ្ជាក់ថា មានបុរសជនជាតិខ្មែរវ័យ៣៨ឆ្នាំម្នាក់ ត្រូវបានធ្វើតេស្ដរកឃើញភាពវិជ្ជមាននៃមេរោគ Covid-19 ដូច្នេះសូមឲ្យមានការប្រុងប្រយ័ត្នខ្ពស់លើការបង្ការការចម្លងជំងឺ Covid-19 នេះ គឺត្រូវជៀសវាងការប៉ះពាល់ជិតស្និទ្ធជាមួយអ្នកមានជំងឺ លាងដៃឲ្យបានញឹកញាប់ ជាមួយសាប៊ូ និងទឹកស្អាត ត្រូវប្រកាន់យកនូវអនាម័យដៃស្អាត និងអនាម័យផ្លូវដង្ហើម ខ្ទប់មាត់និងច្រមុះ នៅពេលក្អកឬកណ្ដាស់ ប្រកាន់ខ្ជាប់នូវការ
អនុវត្ដន៍អនាម័យស្អាត សុវត្ដិភាពម្ហូបអាហារ និងពិសារអាហារដែលចំអិនឆ្អិនល្អ។ បេីមានករណីសង្ស័យថាកេីកជម្ងឺអ្វីមួយ សូមប្រញាប់រួសរាន់ទៅកាន់មន្ទីរពេទ្យភ្លាមៗ ដើម្បីទទួលការពិនិត្យព្យាបាលទាន់ពេលវេលា ដោយមិនត្រូវមានការព្រួយបារម្ភឡេីយ។ 
គួរបញ្ជាក់ផងដែរថា ក្នុងឱកាសនោះ ឯកឧត្ដមអភិបាលខេត្ត ក៏បានផ្ដល់នូវគ្រឿងឧបភោគ បរិភោគ និងថវិកាមួយចំនួន ជូនដល់លោកយាយលោកតា បងប្អូនប្រជាពលរដ្ឋ ផងដែរ ៕
