ខេត្តកំពង់ធំ ៖ យុទ្ធនាការឡោមព័ទ្ធផ្ទះរបស់លោក ញ៉ែម សុផល ដើម្បីនាំខ្លួនមកកាន់តុលាការ តាមដិកា ព្រះរាជអាជ្ញាអមសាលាដំបូង ខេត្តកំពង់ធំ ដឹកនាំដោយលោក សាយ ណូរ៉ា ព្រះរាជអាជ្ញារង ព្រមទាំងកំលាំងប៉ូលិស ព្រហ្មទណ្ទ និងលោក ញ៉ែម ឈុនលី អធិការក្រុង ស្ទឹងសែន កំលាំងប៉ុស្តិ៍រដ្ឋបាលឃុំស្រយូវ កាលពីរសៀលម៉ោង ៣.៣០នាទីថ្ងៃទី ១៨ ខែ កក្កដា ឆ្នាំ ២០១៤ ស្ថិតនៅចំនុចក្រោយសាលារៀន បឋមសិក្សាត្រពាំងវែង ក្នុងភូមិ ពោធិសែនស្នាយ សង្កាត់ស្រយូវ ក្រុងស្ទឹងសែន ខេត្តកំពង់ធំ។ 
តាមការរបាយការណ៍ ករណីដែលឈានទៅដល់ការចាប់ខ្លួន លោក ញ៉ែម សុផល គឺត្រូវបានអនុវត្តន៍តាមដិកាសាលាដំបូងខេត្តកំពង់ធំ លេខ៤៥ ពស ព្រទ១៤ ចេញដោយចៅក្រមស៊ើបសួរ ស៊ិត វណ្ណៈ តាមសំណុំ រឿងព្រហ្មទណ្ទលេខ ១៨៥ ចុះថ្ងៃទី ៣១ខែ មិនា ឆ្នាំ២០១៤ បានចោទប្រកាន់លើឈ្មោះ ញ៉ែម សុផល ឈ្មោះពីកំណើតឈ្មោះ ឈឹម ឈួរ អតីតជាមន្ត្រីកងរាជអាវុធហត្ថ ត្រូវបានក្រសួងការពារជាតិសម្រេចដក ចេញ មានប្រពន្ឋឈ្មោះ សុន ចាន់លេវី មានកូន២នាក់ ។
លោក ញ៉ែម សុផល ឬលោក ឈឹម ឈួរ ត្រូវបានចោទប្រកាន់ចំនួន៤ករណី ទី១ធ្វើឲ្យខូចខាតដោយចេតនា ២ហឹង្សាដោយចេតនាមានអាវុធ ៣គំរាមគំហែងថានឹងសម្លាប់៤ កាន់កាប់និងដឹកជញ្ជូនអាវុធដោយគ្មានលិខិត អនុញ្ញាត ដែលជនសង្ស័យបានប្រព្រឹត្តកាលពី ថ្ងៃទី០២ ខែកក្កដាឆ្នាំ ២០១៤ ស្ថិតនៅចំនុចភូមិតាឡែក ឃុំ សាលាវិស័យ ស្រុកប្រាសាទបាល្ល័ង្គ ខេត្តកំពង់ធំកន្លងមក។
សកម្មភាពចុះឡោមព័ទ្ធផ្ទះលោក ញ៉ែម សុផល ត្រូវបានដឹកនាំផ្ទាល់ដោយលោក សាយ ណូរ៉ា ព្រះរាជអាជ្ញា រង អមសាលាដំបូង ខេត្តកំពង់ធំ ព្រមទាំងកំលាំងសមត្ថកិច្ចជិត៣០នាក់ ត្រូវបានសំរុកចូលឆែកឆេរនៅក្នុង ផ្ទះនឹងបរិវេណផ្ទះ តែជនសង្ស័យត្រូវបានរត់គេចខ្លួនមុនពេលសមត្ថកិច្ចទៅដល់ ក្រោយពីឆែកឆេររុករកគ្រប់ គៀនកោះក៏មិនប្រទះជនសង្ស័យ តែត្រូវបានប្រទះឃើញឈើគ្រញូង ចំនួន ៥៦ដុំ ធំបានទុកលាក់នៅក្នុងផ្ទះ ក៏ត្រូវបានសមត្ថកិច្ចរឹបអូសឈើគ្រញូងទាំង ៥៦ដុំ ប្រគល់ឲ្យសមត្ថកិច្ចជំនាញរដ្ឋបាលព្រៃឈើ នាំយកទៅរក្សាទុកនៅផ្នែករដ្ឋបាលព្រៃឈើស្ទោង ។
រីឯសមត្ថកិច្ចមេព្រៃក៏មានសំណាងល្អម្យ៉ាងដែរ មិនចាំបាច់ប្រដេញតាមប្រម៉ាញ់ បង្ក្រាបរថយន្តដឹកបទល្មើស ដោយសារតែរកអុសប៉ះចង្ក្រានហ្គាស សម្រាប់សមត្ថកិច្ចប្រដាប់អាវុធ ក៏មានស្នាដៃដោយមិនខាតពេលវេលា ឥតប្រយោជន៍ ចាប់មនុស្សមិនបានតែបានឈើគ្រញូងមកទប់ តែវាសូយត្រង់ម្ចាស់ផ្ទះ ម្ចាស់រត់រួចតែបែរជា មកជាន់លាមកទៅវិញ។ដោយ ប៊ុន រដ្ឋា
