ឧត្តរមានជ័យ. អាវភ្លៀងជាង៥ពាន់អាវ ត្រូវបានប្រគល់ជូនដល់វីរៈជនកងទ័ព និងនគរបាលការពារព្រំដែនដែលកំពុងឈរជើងក្នុងសមរភូមិទិសទី២នៃយោធភូមិទី៤ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តាមរយៈឯកឧត្តមឧត្តមនសេនីយ៍ឯក ហ៊ុន ម៉ាណែត នាយរងសេនាធិការចំរុះនៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក ឯកឧត្តមនាយឧត្តមសេនីយ៍ ជា តារាអគ្គមេបញ្ជាការងនៃកងយោធពលខេមរភូមិន្ទ និងជានាយសេនាធិការចំរុះ រួមដំណើរដោយឯកឧត្តមគណៈប្រតិភូកងទ័ពជើងគោកចុះសួរសុខទុក្ខសំណេះសំណាលដល់នាយទាហានពលទាហានដែលកំពុងឈរជើងនៅសមរភូមិមុខទិសទី២ នៃយោធភូមិភាគទិសទី៤។ 
ថ្លែងក្នុងឱកាសចុះសួរសុខទុក្ខពាំនាំអំណោយអាវភ្លៀងដល់យុទ្ធជន វរសេនាតូច៤១២ នៃកងពលតូចថ្មើរជើងលេខ៤១ ឯកឧត្តមឧត្តមសេនីយ៍ទោ នួន នៅ ប្រធានគណៈបញ្ជាការឯកភាពសមរភូមិមុខទិសទី២ បានមានប្រសាសន៍ថា ថ្លែងអំណគុណចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលបានផ្តល់អាវភ្លៀងជូនដល់កងទ័ពនៅសមរភូមិមុខ ហើយចំពោះវត្តមានរបស់ប្រតិភូពេលនេះ គឺជាសក្ខីភាពឆ្លុះបញ្ចាំងយ៉ាងច្បាស់ អំពីការយកចិត្តដាក់របស់សមរភូមិក្រោយចំពោះសមរភូមិមុខជានិច្ចនៅគ្រប់កាលៈទេសៈ។ 
ឯកឧត្តមបន្តថា ពិតជាមានអត្ថន័យដ៏ជ្រាលជ្រៅជាទីបំផុត ដែលធ្វើឲ្យកងទ័ពសមរភូមិមុខកាន់តែមានភាពកក់ក្តៅទ្វេឡើងថែមទៀត និងបានស្ថិតក្នុងមនោសញ្ចេតនាមួយប្រកបដោយមោទនភាព នៃមហាគ្រួសារខ្មែរគ្រប់អង្គភាពក្រោមចំណុះរាជរដ្ឋាភិបាលតែមួយដោយមានទំនាក់ទំនងរវាងគ្នានិងគ្នាបានល្អប្រសើរ សាមគ្គី បង្កើនសមត្ថភាពលើខឿនការពារជាតិដ៏រឹងមាំបំផុតឱ្យបានគង់វង្សយូរអង្វែង។ បន្ទាប់មក
ឯកឧត្តមឧត្តមសេនីយ៍ឯក ហ៊ុន ម៉ាណែត បានមានប្រសាសន៍ពាំនាំនូវការផ្តាំផ្ញើរសាកសួរសុខទុកពីសំណាក់សម្តេចជោ និងសម្តេចកិត្តិព្រឹទ្ធបណ្ឌិត លោកតែងតែគិតគូរពីស្ថានភាពរស់នៅរបស់យុទ្ធជនក្នុងសមរភូមិមុខជានិច្ចនៅរដូវរងារបញ្ជូនអាវរងារ នៅរដូវភ្លៀងធ្លាក់បញ្ជូនអាវភ្លៀវតាមខែគ្រប់រដូវជានិច្ច បើទោះបីជាសម្តេចទាំងពីរមិនបានចុះមកផ្ទាល់ក្តី ដោយលោកជាប់រវល់មមាញឹកក្នុងកិច្ចការទំនាក់ទំនងក្នុងប្រទេស នឹងក្រៅប្រទេស តែសំភារៈទាំងនេះ បានប្រគល់ជូនដល់ដៃកងទ័ពនៅគ្រប់កន្លែង តាមរយៈថ្នាក់ដឹកនាំក្រសួងការពារជាតិ ដែលជាសេនាធិការរបស់សម្តេចទាំងពីរ ។ 
ឯកឧត្តមបន្តថា នៅរដូវភ្លៀងធ្លាក់ចូលមកដល់ សម្តេចតេជោលោកបានបញ្ជាឱ្យ ក្រុមការងារ អាវភ្លៀវទាំងនេះមកចែកជូនដល់យុទ្ធជនសមរភូមិមុខទាំងយប់មិនបង្អុងយូរឡើយ ព្រោះដោយសារនៅរដូវនេះជារដូវភ្លៀងធ្លាក់ជោកជាំជាខ្លាំង ដែលជាហេតុធ្វើឱ្យពលទាហានយើងមានការលំបាកក្នុងការយាមល្បាត ត្រូវទឹកភ្លៀងដែលងាយនឹងមានជំងឺធ្វើឱ្យខកខានក្នុងការងារ។ ក្នុងនោះឯកឧត្តមបានក្រើនរំលឹកថា រដូវភ្លៀងធ្លាក់ជោកជាំច្រើនសូ
មបងប្អូនយុទ្ធជនត្រូវស្លៀកពាក់ឱ្យបានជិតការពារប្រយ័ត្នកំឱ្យមូលខាំ និងហូបស្អាត ផឹកស្អាត រស់នៅស្អាត ដើម្បីបញ្ជៀសនូវជំងឺផ្សេងៗ។ ក្នុងឱកាសនោះឯកឧត្តមឧត្តមសេនីយ៍ឯក ហ៊ុន ម៉ាណែត ក៏បានកោតសសើរចំពោះវីរភាពដ៏អង់អាចក្លារបស់ពលទាហាន និងនគរបាលការពារព្រំដែន ដែលបានពាក់លីជីវិត បូរជាឈាមស្រស់ សាច់ស្រស់ តស៊ូប្រយុទ្ធដេញសត្រូវដែលឈ្លានពានទឹកដីប្រទេស ក្នុងភារៈកិច្ចការពារជាតិមាតុភូមិ ដោយមិនបានឈ្លានពានទឹកប្រទេសណាមួយសូម្បីតែមួយមីលីម៉ែត្រឡើយ។
