បន្ទាយមានជ័យ ៖ ការបើកបរដោយគ្មានការប្រុងប្រយ័ត្ន និង មិនគោរពច្បាប់ចរាចរបណ្ដាលអោយ យុវជន២នាក់បានរងរបួសធ្ងន់ស្រាល ខូចខាតម៉ូតូ និងត្រូវបានបញ្ជូនទៅព្យាបាលនៅមន្ទីរពេទ្យដើម្បីព្យាបាល ហេតុការគ្រោះថ្នាក់ចរាចរមួយនេះកើតឡើងរវាងរថយន្តក្រុងបុកម៉ូតូ កាលពីវេលាម៉ោង១០និង៣០នាទីថ្ងៃទី១៩ ខែកក្កដា ឆ្នាំ២០១៤ តាមបណ្តោយផ្លូវជាតិលេខ៥ ក្នុងភូមិថ្នល់បត់ ឃុំភ្នំតូច ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ទោ រស់ សំបូរ មេបញ្ជាការកងរាជអាវុធហត្ស្រុកមង្គលបូរីបានអោយដឹងថា យុវជនទាំង២នាក់មានឈ្មោះទុយ កេង ភេទប្រុស អាយុ១៨ ឆ្នាំ មានទីលំនៅភូមិ-ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ បានរងរបួសមធ្យម និងឈ្មោះញិល ពន្លឺ ភេទប្រុស អាយុ១៥ឆ្នាំ រស់នៅក្នុងភូមិ-ឃុំកើតហេតុ រងរបួសធ្ងន់។ 
លោក រស់ សំបូរ បន្តថា មុនពេលកើតហេតុយុវជនទាំង២បានជិះម៉ូតូមួយគ្រឿងម៉ាកវ៉េវ ពណ៌ខ្មៅ ពាក់ស្លាកលេខភ្នំពេញ ១M៦២២៤ បើកបរដោយមានអូសរទេះពីក្រោយតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូងលុះដល់ចំណុចកើតហេតុបានបត់ឆ្វេងឆ្លងថ្នល់ពីលិចទៅកើត បណ្តាលអោយរថយន្តក្រុងមួយគ្រឿងរបស់ក្រុមហ៊ុនកាពីតូល ម៉ាកហ៊ីយ៉ាន់ដាយ ពណ៌ស ស្លាកលេខ ភ្នំពេញ ៣B-១២៧២ អ្នកបើកបរមិនស្គាល់អត្តសញ្ញាណ (រត់គេចខ្លួនបាត់) បានបុកចំរទេះខាងក្រោយ ជាហេតុធ្វើអោយយុវជនទាំង២ខាងលើរងរបួស។ 
ក្រោយកើតហេតុ ជនរងគ្រោះទាំង២ត្រូវបានបញ្ជូនទៅព្យាបាលនៅមន្ទីរពេទ្យមិត្តភាពកម្ពុជា-ជប៉ុនស្រុកមង្គលបូរី ចំណែករថយន្ត និងម៉ូតូដែលខូចខាតស្រាលត្រូវបានយកមករក្សាទុកនៅអធិការដ្ឋាននគរបាលស្រុកមង្គលបូរី។ ការបើកបរដោយគ្មានការប្រុងប្រយ័ត្ន និង មិនគោរពច្បាប់ចរាចរបណ្ដាលអោយ យុវជន២នាក់បានរងរបួសធ្ងន់ស្រាល ខាតពេលវេលាក្នុងការព្យាបាល និងខូចខាតទ្រព្យសម្បាត្តិ៕ដោយ:ឃិន គន្ធា
