ភ្នំពេញ ៖ ដោយអនុវត្តន៍នូវបទបញ្ជារបស់ ឯកឧត្តម នាយឧត្តមសេនីយ៍ នេត សាវឿន អគ្គស្នងការដ្ឋាននគរបាលជាតិ នៅព្រឹកថ្ងៃទី២៥ ខែមីនា ឆ្នាំ២០២០នេះ ឯកឧត្តម ឧត្តមសេនីយ៍ឯក ចាន់ ស៊ី ថា អគ្គស្នងការរង នគរបាលជាតិ បានធ្វើការផ្សព្វផ្សាយសារអប់រំស្តីពីវិធានការបង្ការ ទប់ស្កាត់ ការ រីករាលដាលជំងឺកូវីដ១៩ (COVID19) ដល់ថ្នាក់ដឹកនាំនាយក ដ្ឋាន នគរបាលការពារ។ ការផ្សព្វផ្សាយនេះ ធ្វើនៅអគ្គស្នងការដ្ឋាន នគរបាល ជាតិ ដោយមានការចូលរួមពី ឯកឧត្តម ឧត្តមសេនីយ៍ឯក សំ ស៊ីយ៉ាន ប្រធាននាយកដ្ឋាននគរបាលការពារ និងលោក លោកស្រីអនុប្រធាន នាយកដ្ឋាន ប្រធានការិយាល័យ ប្រធានអង្គភាពចំណុះនាកដ្ឋានផងដែរ។
ក្នុ ងឱកាសនោះ ឯកឧត្តម ឧត្តមសេនីយ៍ឯក ចាន់ស៊ីថា បានណែនាំឲ្យ ថ្នាក់ដឹកនាំ និងមន្រ្តីទាំងអស់ ពិសេសកងកម្លាំងដែលមានភារកិច្ចប្រចាំ ការការពារសុវត្ថិភាព សន្តិសុខ សណ្តាប់ធ្នាប់ នៅតាមបណ្តាស្ថានទូត និវេសណដ្ឋាន និងស្ថាប័នរដ្ឋទាំងអស់ ត្រូវចេះការពារខ្លួនដោយពាក់ម៉ាស និងត្រូវសំអាតដៃឲ្យបានញឹកញាប់ដោយទឹកលាងដៃជេល ឬទឹកអាល់កុល និងផ្សព្វផ្សាយវិធានការ និងការណែនាំរបស់រាជរដ្ឋាភិបាល និងក្រសួង សុខាភិបាល ដល់បងប្អូនប្រជាពលរដ្ឋ និងក្រុមគ្រួសារឲ្យមាន ប្រសិទ្ធភាព ខ្ពស់ ជាពិសេសត្រៀមសហការជាមួយក្រសួងសុខាភិបាល និងសមត្ថកិច្ច ពាក់ព័ន្ធ។
ឯកឧត្តមអគ្គស្នងការរងនគរបាលជាតិ បានបញ្ជាក់ថា នៅតាម ក្រសួង ស្ថាប័នរដ្ឋមួយចំនួ ន បានដាក់ចេញនូវវិធានការឲ្យថ្នាក់ដឹកនាំ និងមន្រ្តី អាចធ្វើការងារប្រចាំថ្ងៃតាមប្រព័ន្ធអនឡាញ ប៉ុន្តែក្នុងនាម យើងជាអង្គភាពអនុវត្តច្បាប់ និងជាកងកម្លាំងប្រមូលផ្តុំ ចាំបាច់ត្រូវមាន មុខធ្វើការ និងប្រជុំជួរ ក៏ដូចជាការងារប្រចាំបញ្ជាជាប្រចាំផងដែរ។
ឯ កឧត្តមបញ្ជាក់ទៀតថា ចំពោះបងប្អូនប្រចាំការស្នាក់ នៅប្រមូលផ្តុំ ត្រូវ មាន អនាម័យខ្ពស់ ពិសេសរក្សាគម្លាតនៃការស្នាក់នៅ និងការប្រាស្រ័យ ទាក់ទងគ្នា។
សូមជម្រាបថា កាលពីថ្ងៃទី២៤ ខែមីនា ឆ្នាំ២០២០ ម្សិលមិញនេះ ស្ថានទូតចិនប្រចាំកម្ពុជា បានប្រគល់នូវសម្លៀកបំពាក់សម្រាប់ ពារការ ការចម្លងវីរុស COVID-19 ចំនួន២០០កំប្លេរ និងស្រោមដៃចំនួន៥០០គូ ដល់អគ្គស្នងការដ្ឋាននគរបាលជាតិ សម្រាប់ប្រើប្រាស់ជាប្រយោជន៍ ដើម្បីបង្ការ និងទប់ស្កាត់ការរីករាលដាលវីរុស COVID-19៕
