កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងឯកឧត្ដម ខ្លូត ផន ប្រធានក្រុមក្រុមប្រឹក្សាខេត្ត ដោយមានការអញ្ជើញចូលរួមពីឯកឧត្តម លោកជំទាវ អភិបាលរងខេត្ត លោក លោកស្រី ថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត នាព្រឹកថ្ងៃទី៣០ ខែមិនា ឆ្នាំ២០២០នេះ បានអញ្ជើញទទួលឧបករណ៍សម្រាប់បាញ់ថ្នាំសម្លាប់មេរោគ កូវីដ១៩ ចំនួន៣០ធុង 
ដែលក្រុមហ៊ុនខាងស៊ាងលី បានផ្តល់ជូនរដ្ឋបាលខេត្តកំពង់ចាម តាមរយៈឯកឧត្តម ហេង វណ្ណនី អភិបាលរងខេត្ត ដេីម្បីរួមគ្នាបង្ការទប់ស្កាត់ការរីករាលដាល នៃមេរោគកូរ៉ូណា កូវីដ១៩ នៅក្នុងភូមិសាស្ត្រខេត្តកំពង់ចាម ក៏ដូចជានៅក្នុងប្រទេសកម្ពុជាទាំងមូលផងដែរ។
ថ្លែងក្នុងឱកាសនោះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានធ្វើការកោតសរសើរ និងថ្លែងអំណរគុណចំពោះកាយវិការសប្បុរសធម៌ ដ៏ប្រពៃ របស់ក្រុមហ៊ុន ខាងស៊ាងលី ដែលបានចូលរួមចំណែក ក្នុងការប្រយុទ្ធប្រឆាំងទប់ស្កាត់ការរីករាលដាល នៃវីរុសកូរ៉ូណា (កូវីដ-១៩) ដោយបានជួយឧបត្ថម្ភ ក្នុងការផ្ដល់ជាសម្ភារៈ ធុងសម្រាប់បាញ់ថ្នាំសម្លាប់មេរោគដ៏កាចសាហាវនេះ ស្របតាមតម្រូវការនាពេលបច្ចុប្បន្ននេះ។
ជាមួយគ្នានោះ ឯកឧត្តមអភិបាលខេត្ត បានថ្លែងផងដែរថា ឧបករណ៍នេះពិតជាមានសារៈសំខាន់ខ្ឲលាំងណាស់ ក្នុងការបាញ់សម្លាប់វីរុសកូរ៉ូណា(កូវីដ-១៩) និងមេរោគផ្សេងៗទៀត ដូច្នេះយើងត្រូវរក្សាទុកសម្រាប់ប្រើប្រាស់ឲ្យចំគោលដៅ ដេីម្បីជាការរួមចំណែក បេីកយុទ្ធនាការបង្ការទប់ស្កាត់ការរីករាលដាលនៃវីរុសកូរ៉ូណា នៅតាមស្ថាប័នសាធារណៈ និងឯកជន ក្នុងភូមិសាស្រ្តខេត្តកំពង់ចាម ផងដែរ។
គួរបញ្ជាក់ផងដែរថា ក្នុងឱកាសនោះ ឯកឧត្តមអភិបាលខេត្ត ក៏បានប្រគល់ធុងបាញ់ថ្នាំទាំងនោះបន្តទៅឲ្យអង្គភាពតំបន់ប្រតិបត្តិការសឹករងខេត្ត កងរាជអាវុធហត្ថខេត្ត ស្នងការរដ្ឋាននគរបាលខេត្ត ពន្ធធនាគារខេត្ត មន្ទីរសុខាភិបាលខេត្ត និងសម្រាប់រដ្ឋបាលខេត្តកំពង់ចាមផងដែរ ៕
