ក្រុងញូវយ៉កៈ កាលពីថ្ងៃសុក្រកន្លងទៅនេះ ក្រុមប្រឹក្សាសន្តិសុខអង្គការសហប្រជាជាតិ បានចាប់ផ្តើមកិច្ចប្រជុំជាបន្ទាន់របស់ខ្លួនមួយ បន្ទាប់ពីយន្តហោះម៉ាឡេស៊ី MH17 បានធ្លាក់នៅ ក្នុងប្រទេសអ៊ុយក្រែន ដោយសារត្រូវគ្រាប់មីស៊ីលដីអាកាស បណ្តាលឲ្យមនុស្ស២៩៨នាក់ស្លាប់ ក្នុងនោះមានមន្ត្រីអ្នកប្រាជ្ញ អ្នកជំនាញជំងឺអេដស៍ ដែលត្រូវទៅចូលរួមក្នុងសន្និសីទអន្តរជាតិផង និងស្របពេលដែលអាជ្ញាធរអ៊ុយក្រែន និងក្រុមឧទ្ទាមចោទប្រកាន់គ្នាទៅវិញទៅមក។
អង្គប្រជុំកាលពីថ្ងៃសុក្រ បានលើក យករបៀបវារៈសំខាន់បំផុតនោះគឺ បញ្ហាជាច្រើនជុំវិញ ការធ្លាក់យន្តហោះរបស់ក្រុមហ៊ុនអាកាសចរណ៍ម៉ាឡេស៊ី MH17នេះ រួមទាំងលទ្ធភាពនៃការបាញ់ទម្លាក់ដោយកាំជ្រួចពីសំណាក់ក្រុម ប្រដាប់អាវុធណាមួយរវាងអាជ្ញាធរអ៊ុយក្រែន និងក្រុមឧទ្ទាមដែលគាំទ្ររុស្ស៊ី។ បើតាមប្រភពមួយ កិច្ចពិភាក្សាបានប្រព្រឹត្តឡើង ដោយមានការសួរដេញដោល ទៅលើមូលហេតុនៃការធ្លាក់យន្តហោះនោះ បើទោះបីជាលោកប្រធានាធិបតីអាមេរិក បារ៉ាក់ អូបាម៉ា ធ្លាប់អះអាងថា យន្តហោះនោះត្រូវបានបាញ់ធ្លាក់ដោយមីស៊ីលផលិតនៅអតីតសូវៀត រុស្ស៊ី ។
លោកបានបន្តថា ភ្នាក់ងារស៊ើបអង្កេត FBI និងមន្ត្រីដឹកជញ្ជូនសុវត្ថិភាពជាតិ ត្រូវបានបញ្ជូនទៅអ៊ុយក្រែនដើម្បីកំណត់ពីអ្វីដែលបានកើតឡើងពិតប្រាកដលើយន្តហោះម៉ាឡេស៊ី ដែលត្រូវគ្រាប់មីស៊ីលងាយៗបែបនេះ។ នេះជាករណីគ្រោះថ្នាក់ធ្លាក់ យន្តហោះលើកទី២ហើយរបស់ម៉ាឡេស៊ីដោយកាលពីលើកទី១MH370 ដែលដឹកមនុស្សរាប់រយនាក់ដែរនោះនៅមិនទាន់រក ឃើញនៅឡើយ ។
ហេតុការណ៍ខាងលើត្រូវបានគេសន្និដ្ឋានថា បណ្តាលមកពីអាកាសយានិកធ្វេសប្រហែសមិនស្តាប់តាមការបញ្ជាណែនាំពី ទីបញ្ជាការហោះហើរ ខណៈ អ្នកស្រាវជ្រាវអូស្ត្រាលី ក៏បាននិយាយថា យន្តហោះម៉ាឡេស៊ីមិនគួរហោះកាត់តីនោះទេ ស្របពេលដែលជើងហោះហើរជាច្រើនបានបង្វែរទិសដៅរបស់ខ្លួន ៕ 
