ហេណាន់ៈ ប៉ុន្មានថ្ងៃកន្លងមកនេះ ព្យុះរ៉ាមម៉ាសាន់ បានបោកបក់យ៉ាងខ្លាំងចេញពីសមុទ្រចិនមកកាន់ខេត្តហេណាន់ ហៃគូ និង បណ្តាខេត្តជាប់មាត់សមុទ្រ ដោយបានសម្លាប់មនុស្សជាច្រើននាក់។ ប៉ុន្តែចាប់ពីថ្ងៃអាទិត្យនេះតទៅ ព្យុះកំណាចមួយនេះអាចបោកបក់មកលើប្រទេសវៀតណាម និងកម្ពុជា ជាពិសេសខេត្តក្រុងជាប់មាត់សមុទ្រ។ 
តាមវេបសាយបរទេសចិនឆាយណាដេលី ផ្សាយកាលពីថ្ងៃទី១៩ ខែកក្កដា ឆ្នាំ២០១៤នេះ បានឲ្យដឹងថា ព្យុះសង្ឃរារ៉ាមម៉ាសាន់ បានបោកបក់យ៉ាងខ្លាំងលើក្រុងហៃគូ ខេត្តហេណាន់ បណ្តាលឲ្យមានអន្តរាយយ៉ាងសម្បើមកាលពីថ្ងៃសុក្រ ដោយមានកម្ពស់ទឹកភ្លៀងជាង១០០ មីល្លីម៉ែត្រ គាំងដំណើរការដឹកជញ្ជូន កាត់ផ្តាច់ការផ្គត់ផ្គង់ទឹក និងអគ្គិសនី។
ព្យុះកំណាចនេះអាចវាយប្រហារខេត្តហេណាន់ និងមានឥទ្ធិពលខ្លាំងក្លាបំផុតមិនធ្លាប់មាន៤០ឆ្នាំមកហើយ។ តាមទូរទស្សន៍ស៊ីអិនអិន ផ្សាយកាលពីថ្ងៃទី១៩ កក្កដា នេះដែរថា ព្យុះសង្ឃរា typhoon Rammasun មួយនេះនឹង វាយប្រហារចិន វៀតណាម អាចដល់ហ្វីលីពីន ខណៈសេចក្តីជូនដំណឹងរបស់កម្ពុជា ឲ្យមានការប្រុងប្រយ័ត្នសម្រាប់អ្នករស់នៅតំបន់ឆ្នេរ ជាពិសេសអ្នកនេសាទចាប់ពីថ្ងៃទី២០ កក្កដា ២០១៤ នេះទៅ៕
